FLASH
Shkruar nga Pamfleti
Botërori 2026 po zhvillohet në përmasa të paprecedenta. Me tre vende organizatore, 16 qytete pritëse, 48 skuadra pjesëmarrëse dhe 104 ndeshje në program, ky është edicioni më i madh në historinë e Kupës së Botës. Megjithatë, përveç yjeve të futbollit që kanë lënë gjurmën e tyre, statistikat tregojnë një tjetër protagonist të pazakontë: autogolin.
Deri më 25 qershor, në turne janë shënuar 173 gola në 59 ndeshje, prej të cilëve 12 janë autogola. Kjo shifër barazon rekordin e vendosur në Botërorin e Rusisë 2018, ku i gjithë kompeticioni u zhvillua në vetëm 64 ndeshje.
Autogoli i parë i këtij Botërori u regjistrua në ndeshjen debutuese të Paraguajit ndaj Shteteve të Bashkuara. Damian Bobadilla devijoi në portën e tij një top të harkuar nga Ueston MekKeni në minutën e shtatë, duke i dhënë avantazhin 1-0 skuadrës së drejtuar nga Mauricio Poçetino. Më pas, edhe Burges shënoi autogol në një tjetër përballje me SHBA-në, e cila deri tani rezulton skuadra që ka përfituar më shumë nga gabimet e kundërshtarëve.
Në listën e autogolave bie në sy edhe Katari, që ka regjistruar dy të tillë. Mohamed Manai shënoi në portën e tij në ndeshjen ndaj Kanadasë, ndërsa portieri Mahmud Abunada bëri të njëjtin gabim në sfidën kundër Bosnjës. Autogola kanë regjistruar gjithashtu Arabia Saudite, Jordania, Iraku dhe Uzbekistani. Më i fundit në këtë statistikë është ai i Tunizisë në përballjen me Holandën.
Historikisht, autogolat kanë qenë një fenomen i rrallë në Kupën e Botës. Gjatë shekullit XX, në shumicën e edicioneve janë regjistruar vetëm një ose dy autogola, ndërsa në Botërorët e viteve 1934, 1950, 1958, 1962 dhe 1990 nuk u shënua asnjë.
Rritja e këtij treguesi nisi në Francë 1998, ndërsa kulmi u arrit në “Rusi 2018”, ku u vendos rekordi prej 12 autogolash në 64 ndeshje. Pas rënies së ndjeshme në vetëm dy autogola në “Katar 2022”, Botërori 2026 e ka barazuar tashmë këtë rekord, ndërkohë që ka ende dhjetëra ndeshje për t'u zhvilluar. Duke pasur parasysh formatin e zgjeruar të turneut, gjithçka lë të kuptohet se rekordi i autogolave do të thyhet në ditët në vijim.
Lini një Përgjigje