FLASH
Shkruar nga Pamfleti
Ish-futbollisti i njohur kroat, Dario Simiç, është vënë në pranga nga autoritetet kroate, pasi dyshohet se është përfshirë në një skemë korrupsioni që lidhet me ndërtimin e një kampingu turistik në bregdetin e Kroacisë.
Sipas agjencisë kroate të lajmeve Hina, ish-mbrojtësi akuzohet se ka siguruar në mënyrë të paligjshme lejet e ndërtimit, përmes ryshfetit dhe procedurave që bien ndesh me ligjin. Mediat kroate kanë publikuar edhe pamje të momentit kur Simiç shoqërohet me pranga nga forcat e policisë.
Në kuadër të të njëjtit hetim janë arrestuar edhe dy persona të tjerë: ish-zyrtarja rajonale e turizmit, Neda Livljaniç, si dhe një biznesmen vendas, të cilët dyshohet se kanë bashkëpunuar në realizimin e skemës.
Çështja lidhet me ndërtimin e një kampingu në Tisno, një qytezë bregdetare pranë Splitit. Sipas hetuesve, objekti është ngritur në kundërshtim me legjislacionin, pasi një pjesë e territorit nuk ishte e destinuar për ndërtime dhe nuk përmbushte kriteret e planifikimit urban.
Prokuroria pretendon se gjatë viteve 2020-2021, ish-zyrtarja Livljaniç ka miratuar lejet e nevojshme për ndërtimin e kampingut, pavarësisht shkeljeve të konstatuara, në këmbim të përfitimeve të paligjshme.
Hetimet vijojnë dhe autoritetet kroate po mbledhin prova për të sqaruar plotësisht skemën e dyshuar të korrupsionit. Deri në këtë fazë nuk ekziston asnjë vendim gjyqësor që i shpall fajtorë personat e arrestuar.
Lini një Përgjigje