FLASH
Shkruar nga Pamfleti
Kryeministri i Kosovës, Albin Kurti, ka kritikuar ashpër presidenten Vjosa Osmani nga foltorja e Kuvendit, në një moment kur pritet përfundimi i mandatit të saj.
Në fjalën e tij, Kurti u ndal te dekreti i Osmanit për shpërndarjen e Kuvendit dhe shpalljen e zgjedhjeve, duke theksuar se ky veprim ka qenë në kundërshtim me Kushtetutën.
“Dekreti i lëshuar është në shpërputhje me Kushtetutën e Republikës së Kosovës dhe ka krijuar një situatë që kërkon qartësi, jo konfuzion, dhe përgjegjësi, jo shmangie”, tha ai.
Kurti theksoi se edhe Gjykata Kushtetuese ka sqaruar kufijtë e veprimit të institucioneve, duke shtuar se shpërndarja e Kuvendit nuk mund të përdoret për zgjidhjen e krizave politike.
Sipas tij, “shpërndarja e Kuvendit nuk është instrument për të tejkaluar vështirësi politike”, ndërsa shtoi se presidenti nuk mund të ndërhyjë në vullnetin e qytetarëve.
“Vullneti i popullit nuk anulohet me dekrete dhe rrjedhimisht as nuk shpërndahet”, u shpreh Kurti.
Kurti e cilësoi situatën aktuale jo si një krizë institucionale, por si një mundësi për të vijuar proceset politike, edhe pse ende nuk ka lëvizje konkrete për zgjedhjen e presidentit të ri.
“Mirë se gjejmë njëri-tjetrin në seancën plenare të Kuvendit të Republikës sërish, në rikthimin e shtëpisë së demokracisë pothuajse një muaj pas dekretit të Presidentes për shpërndarjen e tij. Dekreti i lëshuar është në shpërputhje me Kushtetutën e Republikës së Kosovës dhe ka krijuar një situatë e cila kërkon qartësi jo konfuzion, e cila kërkon përgjegjësi jo shmangie. Gjykata Kushtetuese ka folur për natyrën e Republikës sonë demokratike parlamentare dhe për kufijtë që Kushtetuta i vendos çdo institucioni.
Në këtë rend, shpërndarja e Kuvendit nuk është instrument për të tejkaluar vështirësi politike dhe mbi të gjitha është vërtetuar e dëshmuar edhe nga Gjykata Kushtetuese tani që Presidenti nuk mund të shpërndajë vullnetin e popullit as nën presion të afateve e të paqartësive kushtetuese. Vullneti i popullit nuk anulohet me dekrete dhe rrjedhimisht as nuk shpërndahet”, tha Kurti në fjalën e tij të plotë.
Lini një Përgjigje