FLASH
Shkruar nga Pamfleti
Kryeministri i Kosovës, Albin Kurti ka dhënë detaje të reja mbi sulmin terrorist në kanalin e Ibër Lepencit. Sipas tij, përveçse janë konfiskuar armë, uniforma dhe pajisje të ndryshme, janë gjetur emblema ruse dhe serbe të strukturave të inteligjencës, ushtrisë dhe sigurisë.
Kryeministri Albin Kurti përmes një postimi në Facebook ka shfaqur përmes grafikut emblemat e grupeve që u përkasin uniformat ushtarake dhe paraushtarake.
“Ky zbulim shqetësues dëshmon për përfshirjen potenciale të grupeve ekstremiste dhe terroriste serbo-ruse, me lidhje të forta në Serbi, që kanë për qëllim destabilizimin e Kosovës dhe krijimin e një mjedisi të pasigurt në rajon”, ka shkruar Kurti.
Kryeministri ka theksuar se ky është një kërcënim i drejtpërdrejtë ndaj stabilitetit dhe paqes në Ballkan, duke kërkuar një reagim të unifikuar dhe vendimtar ndaj këtyre aktiviteteve destabilizuese.
Ai ka potencuar se këto aksione rrezikojnë sigurinë e përgjithshme dhe vlerat demokratike në rajon. “Stabiliteti dhe paqja në Ballkan kërkojnë një reagim të unifikuar dhe vendimtar kundër këtyre aksioneve terroriste dhe aktiviteteve destabilizuese që rrezikojnë sigurinë e përgjithshme dhe vlerat demokratike në rajon”, ka shkruar tutje Kurti.
Pas sulmit në Ibër-Lepenc, situata mbetet ende e nxehtë. Janë kryer bastisje, arrestime, konfiskim armësh e pajisjesh ushtarake në Kosovë ka thuajse çdo ditë.
Lini një Përgjigje