FLASH
Shkruar nga Pamfleti
Presidentja në detyrë e Kosovës, Albulena Haxhiu, u takua të mërkurën me kryetarin e Komisionit Qendror të Zgjedhjeve, Kreshnik Radoniç.
Ky takim zhvillohet një ditë pasi Kuvendi i Kosovës nuk arriti të zgjedhë Presidentin brenda afatit kushtetues, duke e çuar vendin automatikisht drejt zgjedhjeve të reja parlamentare. Sipas përcaktimeve ligjore, procesi duhet të organizohet brenda një periudhe 45-ditore.
Situata erdhi pasi Lëvizja Vetëvendosje, që mban pushtetin, nuk siguroi konsensus me partitë opozitare për zgjedhjen e kreut të shtetit, duke lënë të hapur vetëm rrugën e zgjedhjeve të parakohshme.
Për të përcaktuar datën e votimit, Haxhiu duhet të nisë konsultime me forcat politike, në përputhje me procedurat. Sipas Radios Evropa e Lirë, në diskutim janë dy opsione konkrete: 31 maji dhe 7 qershori.
Hulumtuesi i Institutit të Kosovës për Drejtësi, Melos Kolshi, ka sqaruar se këto data përputhen me afatet ligjore dhe praktikat procedurale për organizimin e zgjedhjeve në raste të tilla.
Lini një Përgjigje