FLASH
Shkruar nga Pamfleti
Një ditë pas mbajtjes së Kongresit të Partisë Socialiste, kryesocialisti Edi Rama mblodhi këtë të hënë në Kryesinë Kuvenit Grupin Parlamentar.
Në mbledhje, përveç deputetëve socialistë kanë qenë edhe ministrat e vjetër si dhe ata të rinjtë të cilët u propozuan nga vetë kreu i qeverisë ditën e djeshme.
Mësohet se në mbledhjen e sonte socialistët diskutuan lidhur me ndryshimet në Qeveri dhe Kuvend si dhe për përgatitjet për zgjedhjet e vitit të ardhshëm.
Rama në takim sikurse edhe dje në Kongres ka patur një sërë kritikash për deputetët e tij duke u thënë se disa prej tyre nuk e kanë bërë punën ashtu si duhet dhe nuk meritojnë të jenë në Kuvend.
Për këtë arsye ai u është drejtuar atyre duke i thënë se nga sot deri në prillin e vitit të ardhshëm do të jenë të test për një vend në listat e kandidatëve për deputet.
Në mbledhje nuk ishte Ervin Mete, i cili u hoq nga drejtimi i ministrisë së Financave.
Ndërkohë seanca e jashtëzakonshme parlamentare që pritej të zhvillohej sot në orën 18:00, ku do të votohej kryetarja e re e Kuvendit, Elisa Spiropali dhe do të kalonin dekretet e Presidentit Bajram Begaj për ministrat e rinj të qeverisë Rama, është shtyrë për ditën e nesërme.
Deputetët e PS u njoftuan në mbledhjen e grupit se seanca do të shtyhet për nesër për shkak se Presidenti ende nuk i ka dekretuar ndryshimet në qeveri.
Presidenca ka bërë me dije se ndryshimet në qeveri janë në proces verifikimi, ndërsa kryeministri Rama u ka kërkuar deputetëve që të rrinë në gatishmëri për çdo orë kur mund të thirren.
Në mbledhjen ku ka folur vetëm Rama, shefi i qeverisë ka falënderuar ministrat e ndryshuar dhe të larguar për punën e bërë, por tashmë mësohet të ketë thënë ai është koha për të forcuar punën në Parlament.
Sakaq, ditën e djeshme kryeministri tregoi nxitim për të dorëzuar personalisht në Presidencë dekretet për ndryshimet e reja në qeveri, pak pas përfundimit të Kongresit të Partisë Socialiste.
Ndryshimet në qeveri që u shpallën në Kongres:
Ministria e Brendshme – Largohet Taulant Balla, vjen Ervin Hoxha
Ministria e Financave – Largohet Ervin Mete, vjen Petrit Malaj
Ministria e Mbrojtjes – Largohet Niko Peleshi, vjen Pirro Vengu
Ministria e Shtetit për Marrëdhëniet me Parlamentin – Largohet Elisa Spiropali, vjen Taulant Balla
Lini një Përgjigje