FLASH
Shkruar nga Pamfleti
Lulzim Basha ka kërkuar zyrtarisht kthimin në krye të PD. Edhe pse deri më sot nuk e kishte deklaruar me gojën e tij një gjë të tillë, sot ai ka dorëzuar zyrtarisht kandidaturën për të qenë pjesë e zgjedhjeve të 29 korrikut.
Në mesditë u mblodh Këshilli Kombëtar i PD, i cili zyrtarizoi mbajtjen e zgjedhjeve për kryetarin. Edhe pse pati kritika dhe kundërshti, 29 korriku u vulos si data kur do votohet për kreun e ri. Ndërkohë sot ishte afati për dorëzimin e kandidaturave. Basha ishte në Londër dhe mësohet se pas kthimit ka dorëzuar formularin duke u bërë në këtë mënyrë kandidati i dytë që shfaq interes. Më herët ka dorëzuar kandidaturën Gjergj Hani. Pra duket se do kemi një proces formal, i cili do i mundësojë Bashës që të marrë drejtimin e partisë.
Këshilli Kombëtar ka sjellë dhe përplasje brenda PD-së që ka vulën. 7 deputetë dolën me një deklaratë dhe u shprehën se ai u mblodh në kundërshtim me Statutin.
“Me përgjegjësinë për të mbrojtur interesin e demokratëve dhe Partisë Demokratike, konstatojmë se sot nuk ka patur një mbledhje legjitime të Këshillit Kombëtar të PD. Duke e konsideruar antistatutor rezultatin e takimit të sotëm, për të shmangur një tjetër ngërç në PD, për të ndalur përçarjen e mëtejshme të Partisë Demokratike, si dhe për të garantuar forcimin e Partisë Demokratike, deklarojmë se: Duke nisur nga sot do të ndërmarrim iniciativën për të kontaktuar individualisht dhe vlerësuar vullnetin e secilit anëtar legjitim të Këshillit Kombëtar mbi situatën në Partinë Demokratike dhe do të vazhdojmë përpjekjet për forcimin e Partisë Demokratike, të bindur se aktet përçarëse, përjashtimet, njëanshmëria dhe nxitimi, nuk ndihmon në ringritjen e PD”, shprehen ata.
Pra duket se Basha me rikthimi në krye të partisë nuk do të ketë më një PD si ajo që la. Në Këshillin Kombëtar shkuan vetëm 7 deputetë dhe përveç grupit të Berishës, tani është krijuar dhe një grup që është kundër të dyve.
Lini një Përgjigje