FLASH
Shkruar nga Pamfleti
Një rast i paprecedentë ka ndodhur sot në Bashkinë e Tiranës. Erion Veliaj u betua sot për mandatin e tretë, por në fakt ai nuk zgjodhi ta bënte këtë në Këshillin Bashkiak, por në tarracën e bashkisë, aty ku celebron dasmat.
Këshilltarët e opozitës e quajnë të paligjshëm betimin e tij, pasi sipas tyre betimi duhej të bëhej në Këshillin Bashkiak.
Këshilltari Ilir Alihmehmeti thotë se është e paprecedentë që kryetari i zgjedhur refuzon të betohet siç e parashikon ligji para Këshillit Bashkiak.
“E paprecedentë nga Bashkia Tiranë! Kryetari i zgjedhur i Bashkisë refuzon të betohet siç e parashikon ligji dhe rregullorja në fuqi. Njoftimi i nisur nga vetë Bashkia Tiranë, pika 6 e rendit të ditës për mbledhjen e parë, flet qartë ku duhet të betohet Kryetari i Bashkisë. Neni 18, mbi mandatin e kryetarit, thotë se: Pika 1: Shpallja e vlefshmërisë dhe betimi i Kryetarit bëhet në mbledhjen e parë të Këshillit Bashkiak. Pika 3: Ushtrimi i mandatit të Kryetarit fillon në çastin kur bën betimin përpara Këshillit Bashkiak”, thuhet në reagimin e Ilir Alimehmetit.
Endrit Braimllari shprehet se betimi në tarracë thellon paligjshmërinë dhe tenton të ulë autoritetin e Këshillit Bashkiak që përfaqëson qytetarët e Tiranës
“Turp i madh Erion Veliaj betohet ne tarracë dhe jo në sallën e këshillit bashkiak ku e përcakton ligji dhe rregullorja. Betimi i Erion Veliaj në tarracë thellon paligjshmërinë dhe tenton të uli autoritetin e Këshillit Bashkiak që përfaqëson qytetarët e Tiranës. Ky vendim poshtëron qytetarë të cilët duan transparencë. Sindroma e frikës nga hajdutëria dhe bunkerizimi e udhëheq kudo”, tha ai.
Edhe Tedi Blushi nuk ndali kritikat: “Erion Veliaj refuzon të betohet para anëtarëve të Këshillit Bashkiak të Tiranës, në shkelje të rregullores, ligjit, procedurave dhe traditës. Ky “betim” në një “ambient dasmash”, vijim i precedentit të betimit të gjyqtares kushtetuese tek Lana është nul dhe i papranueshëm! Asnjë surprizë nga një Kryetar i zgjedhur me vota të blera, ekzemplar në paligjshmërinë që e karakterizon! Partia e Lirisë e vendosur në mbrojtje të ligjshmërisë dhe interesit qytetar!”.
Lini një Përgjigje