FLASH
Shkruar nga Pamfleti
Kuvendi i Shqipërisë do të shqyrtojë më 12 mars kërkesën e SPAK për autorizimin e arrestimit të deputetes Belinda Balluku, e cila do të jetë pika e parë e seancës plenare në orën 10:00. Në të njëjtën orë, Partia Demokratike ka thirrur protestë para Kuvendit.
Të enjten e 12 marsit, në Kuvendin e Shqipërisë mazhoranca pritet të rrëzojë kërkesën e SPAK për dhënien e autorizimit për arrestimin e deputetes Belinda Balluku.
Në njoftimin e rendit të ditës, Kuvendi bën me dije se kjo pikë do të jetë e para, fill pas nisjes së seancës në ora 10:00.
Sipas agjendës së Kuvendit, para prezantimit të dy raporteve të përgatitur nga PD dhe PS në Këshillin e Mandateve, do të shprehet deputetja Belinda Balluku.
Më pas opozita do të paraqesë raportin e hartuar nga anëtarët e Këshillit për Rregulloren, Mandatet dhe Imunitetin
Po ashtu dhe shumica parlamentare, anëtarë të Këshillit për Rregulloren, Mandatet dhe Imunitetin do të paraqesin qëndrimin e tyre dhe më pas do të hidhet për votim.
Ky projektvendim kërkon shumicë të thjeshtë votash për miratim.
Nga ana tjetër, Partia Demokratike ka njoftuar se protesta e radhës kombëtare do të mbahet po në datën 12 mars, ndërsa kryedemokrati Sali Berisha u ka bërë thirrje mbështetësve demokratë që të mblidhen përpara Kuvendit.
Ora e protestës është njoftuar 10:00, e cila përkon me nisjen e seancës plenare.
Thirrjet e Berishës për protestuesit jashtë Kuvendit dhe paradite, ndryshe nga protestat e tjera kombëtare që janë zhvilluar në orët e pasdites, në fokus ka pikërisht votimin për heqjen e imunitetit të Belinda Ballukut.
Lini një Përgjigje