FLASH
Shkruar nga Pamfleti
Deputeti i Partisë Demokratike, Kreshnik Çollaku foli klidhur me deklaratën e bërë më parë, ku thoshte se me marrëveshjen për Kodin Zgjedhor, opozita i ka dhënë Edi Ramës 12-13 mandate në tavolinë në zgjedhjet e 2025.
I pyetur se me çfarë motiv i kërkojnë qytetarëve që t’i bashkohen opozitës në protesta si ajo e 7 tetorit, pas të tilla deklaratash, Çollaku tha se ai vijon të ndajë bindjen se Kodi i Ri zgjedhor ishte dorëzim i Partisë Demokratike përballë Ramës.
“Unë vazhdoj të them që marrëveshja, vota që bashkoi një pjesë e opozitës, sepse u nda disi me thikë sepse brenda opozitës ata që votuan kundra Kodit janë gati-gati më shumë se ata që votuan pro Kodit. Ka qenë një gabim jashtëzakonisht i rëndë strategjik. Ua kam thënë edhe kolegëve të mi”, u shpreh deputeti demokrat, në “A2 CNN”.
Në vijim Çollaku deklaroi se pasojat e kësaj marrëveshje, opozita do t’i shohë të konkretizuara në zgjedhjet parlamentare të vitit të ardhshëm, ku e pranoi se do të humbasin përballë mazhorancës aktuale.
“Me përfitim zero, sepse opozita dha gjithçka. Dorëzoi luftën më të rëndësishme që duhet të bënte që ishte ajo beteja për koalicionet, e vetmja gjë që kishte interes opozita. Është një gabim që ende nuk e kam kuptuar në thelb pse ndodhi. Jam i bindur se ne të gjithë do ta pësojmë në 2025 sepse i kemi dhënë një avantazh të pamerituar kësaj opozite. Përtej kësaj mund t’iu numëroj dhe dhjetëra gabime të tjera që kemi bërë ne si opozitë në këto 3 vite”, tha Çollaku.
Lini një Përgjigje