FLASH
Shkruar nga Pamfleti
Kuvendi i Shqipërisë ka rrëzuar me shumicë votash kërkesën e grupit parlamentar të Partisë Demokratike për zhvillimin e një interpelance me ministrin e Bujqësisë, Andis Salla.
Kërkesa për interpelancë u paraqit nga deputeti i opozitës Xhelal Mziu, i cili synonte të merrte sqarime nga ministri lidhur me fondet e IPARD. Megjithatë, gjatë votimit në seancë plenare, shumica parlamentare votoi kundër, duke mos e lejuar zhvillimin e interpelancës.
Në reagim, Xhelal Mziu e konsideroi këtë vendim si të pavend. Gjatë fjalës së tij ai ngriti shqetësimin lidhur me bllokimin e fondeve të IPARD, duke theksuar se janë 33 milionë euro që OLAF i ka konsideruar si vjedhje.
“Unë dhe një grup deputetësh kishim kërkuar interpelancë me ministrin e Bujqësisë dhe në mënyrë të papritur ju bëni anulimin e kësaj interpelance. Ju pa të drejtë, meqë përmenden fondet e IPARD, bie ndesh me SPAK, Parlamenti dhe SPAK janë dy institucione të ndryshme. Është e padrejtë dhe e pavend. Duhet të më jepet e drejta e interpelancës. U fshehët pas një justifikimi që është SPAK që po heton fondet e IPARD. Ne nuk kërkuam të bëhemi prokuror për ministrin e Bujqësisë, por avokatë të situatës së bujqësisë. Kemi një regres duke filluar që nga viti 2020 në bujqësi, që ka rënë me 1% dhe ka vijuar çdo vit deri te viti 2026 është më fatkeqi, sepse fondet për bujqësinë janë ulur ndjeshëm ndryshe nga buxheti që vazhdon të rritet.
Është viti i tretë që ne nuk marrim para nga fondet e BE, janë 33 milionë euro që OLAF I ka konsideruar si vjedhje dhe kanë qenë të qartë, që paratë të kthehen dhe të bëhen përgjegjës personat përkatës për këtë skandal. Mos të harrojmë efektet që patën përmbytjet, kanë sjellë dëme prej më shumë se 300 milionë euro.
Në Shqipëri ka 145 milionë euro buxhet për bujqësinë dhe vetëm 43 milionë euro shkojnë drejtpërdrejt te fermerët.
Kemi mbështetjen më të vogël buxhetore në rajon, vetëm 1.8% nga buxheti i shtetit, 2 herë më pak se Kosova dhe 5 herë më pak se Serbia. Ne sot kemi çmimin më të lartë të naftës në Shqipëri. Cili është ai fermer që bën punimin e naftës me këto çmime.
Jeni e vetmja e qeveri në botë që fërkoni duart kur ka luftë sepse rrisni çmimet në shifra stratosferike.
Kjo është arsyeja që unë kërkova interpelancë, sepse është shqetësim real, nuk dua të bëj rolin e prokurorit për Ministrin e Bujqësisë”, u shpreh Mziu.
Lini një Përgjigje