FLASH
Shkruar nga Pamfleti
Deputeti Oerd Bylykbashi ka reaguar në Facebook në lidhje për inceneratorët.
Ai ka rikthyer një histori e cila ishte lënë në harresë për disa kohë, grabitjen e kryer nga pastruesja Rozeta Dobi në banesën e ish-zyrtares së Kryeministrisë Alda Klosi.
Sipas Bylykbashit, inceneratorët janë proces tipik mafioz.
“Në vitin 1799 një oficer francez, gjatë fushatës së Napoleonit në Egjipt, gjeti një pllakë me mbishkrime në dy gjuhë: njëra me hieroglife egjptiane, dhe tjetra në greqishten antike.
Askush nuk i kishte zbërthyer deri atëherë hieroglifet egjiptiane, por teksti në greqishten antike shërbeu si çelës për një zbulim të madh, të kuptohej alfabeti egjiptian antik. “Guri i Rozetës” sot shërben si term për të nënkuptuar diçka që shërben si kod për të çkoduar një mister.
Kërcim në kohë dhe ja tek jemi sot, kemi një “Gur Rozete” modern
Tubi i Rozetës, pastrueses së shefes së kabinetit të zëvendësit te kryeministrit.
Ky tub aspiratori shërben si një tjetër çelës që zgjidh misterin mes shkakut dhe pasojës, mes të korruptuarit dhe korrupsionit. Ditën kur foli, Rozeta e shtriu tubin deri tek kryeministri.
Tubi i Rozetës, pastrueses, ishte plot me “llum” me vlerë”, shkruan Bylykbashi.
Sipas tij, mjafton që prokuroria të ndjekë paratë. Ai ka përmendur këtu edhe shprehjet e prokurorit italian Giovani Falcone.
“Inceneratorët janë aferë tipike mafioze. Tubi i aspiratorit me paratë që vazhdojnë e thithen nga xhepat e shqiptarëve, është Guri i Rozetës që zbërthen këtë aferë mafioze.
Mjafton që SPAK të ndjekë paratë e tubit të Rozetës, pastrueses së shefes së kabinetit të zëvendësit të Kryeministrit dhe do të kishim zgjedhje të parakohshme. Sepse atë ditë do të ishte hapur Kutia e Pandorës”, tha ai.
Lini një Përgjigje