FLASH
Shkruar nga Pamfleti
Qytetarë nga Shqipëria dhe diaspora i janë bashkuar protestës së 14-të radhazi në Tiranë, ndërsa refreni më i dëgjuar gjatë marshimit ishte “Rama në burg, Berisha në burg”.
Nën thirrjet “Rama jepe dorëheqjen” dhe “Shqipëri e Re”, qindra protestues kanë nisur marshimin drejt Kryeministrisë në kuadër të protestës së 14-të radhazi që po zhvillohet në kryeqytet.
Atmosfera në bulevardin “Dëshmorët e Kombit” është shoqëruar nga pankarta, flamuj kombëtarë dhe thirrje të vazhdueshme kundër klasës politike. Mes sloganeve më të dëgjuara gjatë protestës ishte edhe “Rama në burg, Berisha në burg”, një mesazh që u përsërit nga protestuesit gjatë marshimit dhe që u kthye në refrenin kryesor të tubimit.
Në protestë ranë në sy dhjetëra pankarta me mesazhe politike, ironike dhe satirike, të drejtuara ndaj figurave kryesore të politikës shqiptare. Një prej tyre mbante mbishkrimin “Çdo gjë ndryshon... edhe Çezari ishte perandor, tani është sallatë”, shoqëruar me karikatura që ironizonin kultin e individit në politikë.
Një tjetër mesazh që u dëgjua shpesh gjatë protestës ishte edhe thirrja “Bashkohuni me ne”, përmes së cilës organizatorët dhe pjesëmarrësit u bënin apel qytetarëve të tjerë t’i bashkoheshin lëvizjes.
Një nga momentet që tërhoqi më shumë vëmendje gjatë protestës ishte një protestuese që ishte me një maskë që paraqiste kryeministrin Edi Rama me brirë, ndërsa duart i kishte të lidhura simbolikisht me zinxhirë dhe një dry.
Krahas këtij aksioni simbolik, ajo mbante edhe një pankartë me mbishkrimin “I pandehuri Edi Rama, tradhtar i kombit”, duke përcjellë një mesazh të drejtpërdrejtë politik ndaj kreut të qeverisë.
Pjesëmarrësit shprehën pakënaqësinë e tyre ndaj situatës politike në vend, ndërsa kërkuan përgjegjësi për atë që e konsiderojnë dështim të elitës politike në këto tre dekada.
Përmes thirrjeve dhe pankartave, protestuesit synuan të përcjellin mesazhin se pakënaqësia e tyre nuk lidhet vetëm me qeverinë aktuale, por me të gjithë klasën politike që ka drejtuar vendin ndër vite.
Në marshim bie në sy edhe pjesëmarrja e emigrantëve shqiptarë, të cilët kanë mbërritur nga vende të ndryshme të Europës dhe më gjerë për t'iu bashkuar protestës. Në shesh janë valëvitur flamuj shqiptarë, por edhe simbole të shteteve ku jetojnë komunitete të mëdha shqiptare, me flamujt britanikë që dominojnë dukshëm mes turmës.
Protesta të ngjashme po zhvillohen edhe në vende të ndryshme të botës ku jetojnë shqiptarë, në një përpjekje për të koordinuar zërin e diasporës me atë të qytetarëve në Shqipëri.
Teksa marshimi po afrohet drejt Kryeministrisë, protestuesit vijojnë thirrjet kundër qeverisë dhe klasës politike, duke kërkuar ndryshim, drejtësi dhe një model të ri qeverisjeje për vendin.
Lini një Përgjigje