Minutë pas minute/ A do të ketë një marrëveshje për paqe? Trump pret Zelenskyn dhe liderët e BE

Trump ka takuar udhëheqësit evropianë pas takimit me Zelenskyn.

Ata mbërritën përpara takimit të udhëheqësit amerikan me Volodymyr Zelenskyy. Por Trump dhe Zelenskyy u ulën së bashku për t'iu përgjigjur pyetjeve të gazetarëve.

Më pas Trump është zhvendosur te udhëheqësit evropianë ku ata realizuan një "foto familjare". Më pas u ulën në një tryezë ku do të flasin lidhur me situatën dhe atë që pritet nga takimi.

Atmosfera në Zyrën Ovale, të hënën e 18 gushtit, ndihej shumë ndryshe nga përplasja e tensionuar e shkurtit midis dy udhëheqësve

Volodymyr Zelenskyy dhe një grup udhëheqësish evropianë takohen me Donald Trump në Shtëpinë e Bardhë për bisedime kritike mbi luftën me Rusinë, ndërsa presidenti amerikan ia vë barrën Ukrainës për të arritur një marrëveshje paqeje.

Pas një takimi kokë më kokë me Presidentin rus Vladimir Putin në Alaska të premten, Trump ka shtuar presionin mbi Kievin për t'i lëshuar tokë Moskës. Zelensky ka paralajmëruar se një gjë e tillë do të thotë që Ukraina do të humbasë  pozicione kyçe mbrojtëse  dhe do të jetë më e ndjeshme ndaj sulmeve ruse në të ardhmen.

Kievi dhe aleatët e tij po shtyjnë përpara garancitë e sigurisë, për të mbrojtur të ardhmen e Ukrainës dhe të Evropës në përgjithësi . i dërguari i Trump për Rusinë sugjeroi të dielën se mbrojtja "e ngjashme me Nenin 5" ishte në tryezë për Ukrainën, një referencë për dispozitat e mbrojtjes së ndërsjellë të NATO-s.

3 piketat kryesore nga takimi Trump-Zelenskyy

Trump dhe Zelensky iu përgjigjën pyetjeve nga mediat në Zyrën Ovale për 25 minuta, duke i dhënë kështu start një dite të gjatë takimesh me udhëheqësit evropianë në Shtëpinë e Bardhë.

Por cilat ishin 3 momentet pikante?

Atmosfera në Zyrën Ovale, të hënën e 18 gushtit, ndihej shumë ndryshe nga përplasja e tensionuar e shkurtit midis dy udhëheqësve. Trump ishte i përzemërt, pasi tha se donte të shihte fundin e luftës. "Është një nder që kemi presidentin e Ukrainës me ne. Kemi pasur shumë diskutime të mira, shumë bisedime të mira dhe mendoj se po bëhet përparim", tha Trump. Zelensky e nisi takimin duke e falënderuar Trumpin për përpjekjet e tij, ndërsa ishte i veshur me një kostum, gjë që u vu re si nga presidenti ashtu edhe nga gazetari që sulmoi presidentin ukrainas në shkurt për veshjen e tij.

Mbi garancitë e sigurisë dhe NATO-n: Disa nga lajmet më të fundit ishin ato që Trump nuk përjashtoi trupat amerikane në terren në Ukrainë. Ai përsëriti se ndërsa Evropa do të marrë një rol udhëheqës në ofrimin e sigurisë, SHBA-të do të “ndihmojnë”. “Do ta diskutojmë sot, por do t’u japim atyre mbrojtje shumë të mirë, siguri shumë të mirë”, tha Trump në lidhje me sugjerimin se është i gatshëm të ofrojë mbrojtje të ngjashme me NATO-n për Ukrainën.

Mbi atë që Trump dëshiron nga sot: Trump dëshiron një takim trepalësh si me Zelenskyn ashtu edhe me Putinin, të cilin ai e sheh si hapin tjetër në përfundimin e luftës. Ai gjithashtu ofroi një pasqyrë të mundshme se si mund të duken bisedimet në vazhdim. Trump tha se një armëpushim nuk është i nevojshëm, që mund të nënkuptojë se luftimet mund të vazhdojnë ndërsa Putini i zgjat bisedimet. Sa i përket udhëheqësit rus, Trump tha se planifikon ta telefonojë atë pas përfundimit të takimeve të së hënës. "Do të kemi një telefonatë menjëherë pas këtyre takimeve sot. Dhe mund të kemi ose jo një takim trepalësh. Nëse nuk kemi një takim trepalësh, atëherë luftimet vazhdojnë", tha Trump para se media të nxirrej nga Zyra Ovale. "Mendoj se nëse kemi një takim trepalësh, mendoj se ka një shans të mirë për ta përfunduar atë. Por [Putin] pret telefonatën time kur të mbarojmë me këtë takim."

Trump mban qëndrimin e Putinit

Trump tha se Rusia dhe Ukraina nuk kanë nevojë të arrijnë një armëpushim për të arritur një marrëveshje për t'i dhënë fund luftimeve, duke miratuar qëndrimin e Putinit dhe duke zvogëluar mundësinë e sanksioneve të menjëhershme amerikane.

Pa një armëpushim, Putini mund të pretendojë se i përkushtohet një procesi ose të angazhohet në diplomaci, ndërkohë që vazhdon të luftojë pa ndonjë sanksion të ri apo presion tjetër nga Uashingtoni, duke e zgjatur kështu luftën në vend që ta përfundojë.

Trump tha se “nuk mendoj se keni nevojë për një armëpushim. E di që mund të jetë mirë ta kemi, por gjithashtu mund ta kuptoj strategjikisht pse, e dini, një vend ose tjetri nuk do ta dëshironte atë.”

Evropa dhe Ukraina e shohin kërcënimin e sanksioneve të reja amerikane si një mjet të rëndësishëm për ta detyruar Putinin të angazhohet seriozisht dhe të bëjë lëshime. Me Trumpin që pothuajse i ka hequr këto nga tavolina, Putini mund ta “përfshijë atë”.

Trump mbron Zelenskyn nga gazetarët

Trump ka bërë çmos për ta mbrojtur Zelenskyn, shumë ndryshe nga vizita e fundit e udhëheqësit ukrainas në Zyrën Ovale, nga pyetjet e gazetarëve.

I pyetur në lidhje me anëtarësimin në NATO dhe garancitë e sigurisë për Ukrainën, Trump e pranoi pyetjen, duke thënë me vendosmëri se asgjë nuk ishte vendosur ende dhe la të kuptohej se kjo gjë do të diskutohej me udhëheqësit evropianë më pas.

Më parë ai tha: “Do të ketë shumë, shumë ndihmë kur bëhet fjalë për sigurinë. Do të ketë shumë ndihmë. Do të jetë mirë.” /Përshtatur nga Politico/

Mbrëmja e sotme ku prej orës 19:00 ka nisur në Shtëpinë e Bardhë, Samiti për Ukrainën, konsiderohet si një nga momentet më të rëndësishme nga liderët botërorë për të mbyllur një luftë. Në rast dështimi luftimet do të vazhdojnë, gjë që u pohua edhe nga Presidenti amerikan Donald Trump.

Por SHBA janë të gatshme të mbajnë Rusinë në tryezën e bisedimeve me çdo çmim. Kjo të paktën pohohet nga udhëheqësi i shumicës në Senatin amerikan, John Thune.

Ky i fundit ka deklaruar se Senati do t’i ofrojë Trumpit “çfarëdo që të duhet” për ta mbajtur Rusinë në tryezën e bisedimeve. Deklaratat e Thune erdhën pak para nisjes së Samitit në Shtëpinë e Bardhë, rezultatet e të cilit do t’I njoftohen Vladimir Putinit përmes një telefonate nga homologu amerikan.

Pyetja e fundit nga media që iu drejtua Trumpit ishte se çfarë donte më shumë nga takimi i tij i fundit me Vladimir Putin.

"Po i thashë presidentit... Sapo fola tërthorazi me Presidentin Putin dhe do të kemi një telefonatë menjëherë pas takimeve të sotme.

Mund të kemi një takim trepalësh, mund të mos kemi. Nëse nuk kemi një takim trepalësh, atëherë luftimet do të vazhdojnë.

Dhe nëse e bëjmë, kemi një shans të mirë, mendoj se nëse kemi një takim trepalësh, ka një shans të mirë që të mbarojë.

Por, ai po pret telefonatën time kur të mbarojmë këtë takim", tha Trump.  

Ka nisur në Shtëpinë e Bardhë Samiti për Ukrainën, ku Presidenti Donald Trump dhe homologu ukrainas, Volodymyr Zelensky, kanë folur për fundin e luftës, ndërsa një takim trepalësh, bashkë me Vladimir Putin, duket se është në horizont.

Zelensky tha se është gati për këtë takim, ndërsa Trump foli për garancitë që do i afrohen Ukrainës nga SHBA, nëse pranohet dhënia fund e luftës.

Tema e cila nuk u prek në konferencën për mediat ishte shkëmbimi i territoreve mes Ukirainës dhe Rusisë.

Gjithsesi mbrëmja e sotme është konsideruar historike për përfaqësuesit politikë dhe institucionalë të Bashkimit Evropian, që i janë bashkuar bisedimeve në Shtëpinë e Bardhë.

Giorgia Meloni, kryeministrja e Italisë, tha se nuk ka zgjidhje të lehta. “Mendoj se duhet t'i shqyrtojmë të gjitha për të garantuar paqen dhe sigurinë për kombet tona. Puna që do të bëjmë sot është e rëndësishme", tha Meloni, ndërsa Kryeministri britanik, Keir Starmer, theksoi se nuk ka nevojë për armëpushim, për të arritur në fundin e luftës.

Presidenti amerikan pohoi se mënjëherë pasi të përfundojë bisedimet me Zelenskyn dhe liderët europianë do të komunikojë me Putin në telefon. Një gjë të ngjashme, Trump e bëri me Zelenskyn dhe liderët europianë, pasi përfundoi takimin me Putin në Alaskë.

Po ku mund të mbahet takimi trepalësh, nëse Samiti i sotëm ecën sipas planeve të Trump?

Këtu janë tre propozime. Meloni ka shprehur gadishmërinë për të organizuar takimin në Romë, ide që e hodhi edhe më herët, kur diskutohej mbi samitin Trump-Putin.

Propozimi tjetër ka ardhur nga Presidenti francez, Emmanuel Macron, sipas të cilit ky takim mund të mbahet në Gjenevë.

Por Zelensky dhe Trump po anojnë nga mbajtja e takimit në Vatikan.

Ndërkohë, Trump ka një ftesë nga Putin që takimin e ardhshëm me Presidentin rus, ta zhvillojnë në Moskë, teksa ky liderët botërorë thyen akujt në takimin e Alaskës.

Lufta do të mbarojë, besoj se do ta arrijmë marrëveshjen, tha Presidenti amerikan Donald Trump, nga Zyra Ovale, atje ku mirëpriti homologun ukrainas, Volodymyr Zelensky.

Për më tepër, Presidenti i Shteteve të Bashkuara tha se " besoj se takimi do të jetë vendimtar. Nëse gjithçka shkon mirë, ne mund të organizojmë një takim trepalësh për të ecur përpara me përfundimin e konfliktit."

“Nuk është fundi i rrugës, por shanset janë në favorin tonë . Kanë kaluar pothuajse katër vjet dhe shumë njerëz janë vrarë; shpresoj që edhe Presidenti Putin dëshiron të shohë një fund të kësaj situate. Ajo që po shohim është rezultat i veprimeve të Joe Biden, por unë nuk kam lidhje të drejtpërdrejtë me të. Dëshira ime është që ne të arrijmë fundin e kësaj krize", tha Trump.

Nga ana tjetër, Zelensky u shpreh se është gati për një takim trepalësh.

Një gazetar e pyet Volodymyr Zelenskyn nëse është gati të “dërgojë ushtarët ukrainas drejt vdekjes” ose “të rivizatojë hartat”.

“Ne jetojmë nën sulme çdo ditë”, përgjigjet Zelensky, duke iu referuar vrasjes së fundit të një fëmije.

"Ne duhet ta ndalojmë këtë luftë për të ndaluar Rusinë dhe na duhet mbështetja e partnerëve tanë amerikanë dhe evropianë.

Ne do të bëjmë gjithçka që mundemi për këtë.

Ne tregojmë se jemi një popull i fortë dhe mbështetëm idenë e Presidentit Trump për të ndaluar këtë luftë.

Jemi gati për një takim trepalësh [me Putinin]”, tha Zelensky.

Presidenti Donald Trump nuk e përjashtoi dërgimin e trupave amerikane në Ukrainë për të ndihmuar në ruajtjen e një marrëveshjeje të mundshme paqeje.

"Do t'ju njoftojmë për këtë, ndoshta më vonë sot," tha Trump gjatë takimit me Zelenskyn.

Hapja e tij për të lejuar trupat amerikane në terren në Ukrainë mund të sjellë një ndryshim të madh, pasi Ukraina i konsideron garancitë e sigurisë si kritike për çdo marrëveshje përfundimtare paqeje me Rusinë.

Trump tha se Evropa do të marrë drejtimin në sigurimin e paqes, por se SHBA-të do të jenë të përfshira.

“Ata janë vija e parë e mbrojtjes, sepse janë atje, në Evropë. Por ne do t’i ndihmojmë. Gjithashtu, do të jemi të përfshirë”, tha ai.

Trump tha se nëse do të kishte një marrëveshje paqeje, ajo do të zbatohej.

Donald Trump ka refuzuar të thotë nëse ky është fundi i mbështetjes së Uashingtonit për Ukrainën.

Të dy udhëheqësit tani po u përgjigjen pyetjeve në Zyrën Ovale.

Trump u pyet nëse samiti i sotëm ishte "me apo pa marrëveshje".

Ai u tha gazetarëve: “Nuk mund ta them kurrë këtë.

"Nuk është kurrë fundi i rrugës.

"Njerëz po vriten dhe ne duam ta ndalojmë këtë. Kështu që nuk do të thoja se është fundi i rrugës. Jo, mendoj se kemi një shans të mirë për ta bërë tani."

Trump shton se ai "beson" se Putini dëshiron gjithashtu t'i japë fund luftës.

Në Shtëpinë e Bardhë ka nisur takimi mes Presidentëve Donald Trump dhe Volodymyr Zelensky, ndërsa kreu i Shtëpisë së Bardhë, shprehu besimin se do të ndalojë luftën, pa i hyrë detajeve lidhur me idenë e shkëmbimit të territoreve.

Volodymyr Zelenskyy falenderoi Donald Trump për samitin e sotëm në Uashington dhe gjithashtu falënderoi bashkëshorten e tij Melania. Zonja e parë i shkroi një letër Vladimir Putinit, e cila iu dorëzua të premten.

I ulur në Zyrën Ovale, Zelensky tha: “ Faleminderit shumë, z. President. Para së gjithash, dua t’ju falënderoj për ftesën tuaj.

Faleminderit shumë për përpjekjet tuaja dhe përpjekjet tuaja personale për të ndaluar vrasjet dhe për t'i dhënë fund kësaj lufte.

Faleminderit bashkëshortes suaj, zonjës së parë të Shteteve të Bashkuara.

Ajo nënshkroi një letër drejtuar Putinit në lidhje me fëmijët tanë të rrëmbyer", tha Zelensky, teksa i dorëzoi Presidentit të SHBA një letër për bashkëshorten e tij.

Trump: Presim diçka pozitive, kemi bërë përparim të konsiderueshëm

Donald Trump theksoi gjithashtu se "kemi pasur diskutime të rëndësishme dhe kemi bërë përparim të konsiderueshëm . Besoj se ekziston mundësia që diçka pozitive të dalë nga takimi ynë i sotëm, i cili është vendimtar. Faleminderit për praninë tuaj."

Donald Trump tha se do të ketë një lloj garancie sigurie për Ukrainën. Udhëheqësi amerikan, duke folur në Shtëpinë e Bardhë pak minuta më parë, tha: “Do të ketë ndihmë të madhe, të madhe në aspektin e sigurisë. Do të ketë ndihmë të madhe. Do të jetë e mirë.”

"Ata janë vija e parë e mbrojtjes sepse janë atje, por edhe ne do t'i ndihmojmë. Do të përfshihemi."

Më herët,  Trump tha se SHBA i do ukrainasit.

Presidenti amerikan Donald Trump dhe homologu ukrainas Volodymyr Zelenskyy kanë dalë para gazetarëve në Shtëpinë e Bardhë, ku folën për mundësinë e një takimi trepalësh me presidentin rus Vladimir Putin.

Trump tha se ekziston një “shans i arsyeshëm” për t’i dhënë fund luftës nëse zhvillohet një samit SHBA–Ukrainë–Rusi. “Mendoj se do të kemi një takim. Nëse gjithçka shkon mirë sot, do të kemi një trilateral dhe mendoj se ka një mundësi reale për t’i dhënë fund luftës,” u shpreh ai, duke fajësuar paraardhësin Joe Biden për shpërthimin e konfliktit.

Nga ana e tij, Zelenskyy u shpreh se është “gati për një takim trepalësh” dhe se një format i tillë “do të ishte shumë i mirë”.

Trump gjithashtu konfirmoi se SHBA do të përfshihet në garancitë e sigurisë për Ukrainën, duke theksuar: “Do të ketë shumë ndihmë kur të vijë puna te siguria. Ata janë vija e parë e mbrojtjes, por ne do t’i ndihmojmë. Ne do të jemi të përfshirë.”

Megjithatë, presidenti amerikan nuk sqaroi nëse kjo do të nënkuptonte përfshirjen e trupave amerikane, çka sinjalizon një lëvizje të re në krahasim me qëndrimet e tij të mëparshme.

Presidenti ukrainas Volodymyr Zelensky mbërriti në Shtëpinë e Bardhë të hënën i veshur me veshje më formale sesa veshja e tij e zakonshme ushtarake, por nuk veshi një kostum të plotë dhe kravatë.

Më parë, një zyrtar evropian i tha CNN se zgjedhja e veshjes së Zelensky-t kishte qenë një temë bisede midis zyrtarëve amerikanë dhe ukrainas përpara bisedimeve të së hënës në Shtëpinë e Bardhë. Zyrtari tha se administrata Trump kishte sugjeruar që Zelensky të mos vinte i veshur me veshjen e tij të zakonshme ushtarake.

Veshja e Zelensky-t u shndërrua në një objekt debati gjatë takimit të tij katastrofik në Zyrën Ovale me Trump në shkurt. Kur e priti udhëheqësin ukrainas në Shtëpinë e Bardhë, Trump tha me sarkazëm: “Ai është veshur shumë bukur sot”.

Gjatë atij takimi, një gazetar pro-Trump e pyeti Zelenskyn: “Pse nuk vesh kostum?”

Zelensky i tha gazetarit atë që ka thënë që nga pushtimi i plotë i Rusisë në vitin 2022: se do të veshë uniformën e tij ushtarake derisa të ketë paqe në Ukrainë.

Presidenti ukrainas Volodymyr Zelensky ka mbërritur në Shtëpinë e Bardhë. Ai është pritur nga presidenti Donald Trump. Zelensky mbërriti afro 15 minuta me vonesë duke bërë që të shtyhet orari i parashikuar në axhendë.

Pritet që fillimisht ata të shtrëngojnë duart para mediave, teksa 15 minuta më pas do të nisë takimi zyrtar i cili do të zgjasë afro 1 orë.

Sipas agjendës, në orë 20:15 Trump përshëndesë liderët evropianë në State Dining Room. Në 20:30 shkrepet fotoja familjare e përbashkët. Dhe në 21:00 do të ndodhë takimi i presidentit Trump me liderët evropianë në East Room.

Takimi vjen pas Samitit në Alaskë ku Trump dhe Putin arritën një lloj akordi për paqen në Ukrainël. Trump do t’i vërë në tryezë Zelenskyt lëshimet e Putin dhe do të tentojë ta bindë të pranojë. Duhet të presim deri në fund nëse do të ketë një konsensus.

Duket se po vonon takimi mes presidentit Amerikan Donald Trump dhe presidentit ukrainas Volodymyr Zelensky. Liderët evropianë bashkë me kreun e NATO kanë mbërritur në Shtëpinë e Bardhë. Ata hynë njëri pas tjetrit, teksa u pritën nga zyrtarët vendas dhe me ceremoni zyrtare.

Në orën 19.00 ishte parashikuar që Trump dhe Zelensky të shtrëngojnë duart, por nuk ka ndodhur ende. Teksa në orën 19.15 parashikohej të niste takimi zyrtar, i cili duket se do të shtyhet më pas. Sipas mediave të huaja, nuk ka mbërritur ende Volodymyr Zelensky dhe kjo ka shtyrë axhendën. 

Sipas agjendës, në orë 20:15 Trump përshëndet liderët evropianë në State Dining Room. Në 20:30 ka foto familjare të përbashkët. Dhe në 21:00 takimi i presidentit Trump me liderët evropianë në East Room.

Liderët kryesorë të Evropës kanë nisur mbërritjet në Shtëpinë e Bardhë për samitin e rëndësishëm me presidentin amerikan Donald Trump.

I pari që arriti ishte Sekretari i Përgjithshëm i NATO-s, Mark Rutte, i ndjekur më pas nga presidentja e Komisionit Evropian, Ursula von der Leyen, dhe kryeministri britanik, Sir Keir Starmer, i cili u prit në South Lawn nga një zyrtar i lartë i Shtëpisë së Bardhë. Po ashtu mbërriti edhe kryeministrja italiane Giorgia Meloni.

Në orët në vijim priten të mbërrijnë presidenti francez Emmanuel Macron, kancelari gjerman Friedrich Merz dhe presidenti finlandez Alexander Stubb.

Axhenda sipas orës shqiptare

18:00 – Mbërritja e liderëve evropianë në Shtëpinë e Bardhë
19:00 – Trump pret presidentin ukrainas Volodymyr Zelenskyy
19:15 – Takim Trump–Zelenskyy në Zyrën Ovale
20:15 – Trump përshëndet liderët evropianë në State Dining Room
20:30 – Foto familjare e përbashkët
21:00 – Takim i presidentit Trump me liderët evropianë në East Room
Ky samit shihet si një moment kyç për koordinimin e qëndrimeve transatlantike mbi sigurinë, Ukrainën dhe marrëdhëniet me Rusinë.

Në orën 19:00 pritet të nisin zyrtarisht takimet e Presidentit amerikan Donald Trump me liderët europianë, që kanë zbarkuar në Uashington, në mbështetje të presidentit ukrainas, Volodymir Zelensky, ndërsa këto zhvillime konsiderohen si jetike për të ardhmen e luftës në Ukrainë.

Volodymyr Zelensky, siç raportohet nga agjencia Ukrinform, po takohet me udhëheqësit e vendeve të BE-së përpara se të takohet me kreun e Shtëpisë së Bardhë, Donald Trump.

Takimet me udhëheqësit evropianë po zhvillohen në ambasadën ukrainase në Uashington "në kohë të ndryshme".

Në morinë e takimeve me Zelenskyn janë Presidentja e Komisionit Evropian Ursula von der Leyen, Sekretari i Përgjithshëm i NATO-s Mark Rutte, Presidenti francez Emmanuel Macron, Kryeministri britanik Keir Starmer dhe Kancelari gjerman Friedrich Merz.

Një videokonferencë e 27 udhëheqësve të BE-së është planifikuar për të martën, rapoprtojnë mediat ndërkombëtare. Krerët e 27 shteteve dhe qeverive të Bashkimit Evropian do të takohen të martën përmes videokonferencës "për të bërë një bilanc" të bisedimeve të sotme në Shtëpinë e Bardhë, njoftoi Presidenti i Këshillit Evropian, Antonio Costa.

“Së bashku me Shtetet e Bashkuara, Bashkimi Evropian do të vazhdojë të punojë për një paqe të qëndrueshme, e cila do të mbrojë interesat jetësore të sigurisë së Ukrainës dhe Evropës”, shtoi ai në X.

Presidenti francez Emmanuel Macron tha se ata do t’ia bënin të qartë Presidentit Donald Trump se duan një marrëveshje paqeje, por se ajo “nuk do të përbëjë në asnjë mënyrë një kapitullim” ndaj Rusisë.

"Ne jo vetëm që do ta shoqërojmë Presidentin Zelensky. Ne do të mbrojmë edhe interesat e evropianëve", tha ai para udhëtimit.

Por ndërsa duket se europianët kanë marrë shumë seriozisht çdo diskutim dhe takim, një prej admiralëve të Marinës Amerikane nuk ka kursyer talljet.

James Stavridis, ish-komandant i NATO-s dhe kontraadmirali i Marinës Amerikane, ka postuar një foto duke i propozuar Zelenskyt dhe të gjithë liderëve europianë, që të vishen njëlloj, me bluza jeshile, e preferuara e Presidentit ukrainas që kur nisi pushtimi i Ukrainës nga Rusia.

Ndërkohë Zelensky, referuar takimit me Keith Kellogg, tha s"shpresoj se do të kemi kohë për të diskutuar arkitekturën e garancive të sigurisë. Kjo është me të vërtetë gjëja më e rëndësishme".

Përpara se të udhëtonte për në Uashington, Emmanuel Macron siguroi se evropianët do ta pyesin Donald Trumpin "deri në çfarë mase" ai do t'i mbështesë garancitë e sigurisë të ofruara Kievit...

Rusia vijon operacionet në terren, ndërsa në Shtëpinë e Bardhë në Uashigton, Presidenti Donald Trump, do të presë pasditen e sotme, homologun ukrainas dhe liderët europianë, për të diskutuar mbi një plan që synon përfundimin e luftës në Ukrainë, e nisur nga Rusia 3 vjet e 6 muaj më parë.

Sipas raportimeve ukrainase, nga sulmet e fundit ruse janë vrarë të paktën 10 persona. Një familje e tërë, përfshirë një fëmijë të vogël dhe vëllain e tij 16-vjeçar, ishin midis shtatë të vrarëve në një sulm me dron gjatë natës në një zonë banimi në qytetin verilindor të Kharkiv, thanë autoritetet. Si p[asojë e sulmit janë plagosur 23 persona.

Axhenda e takimit është si më poshtë:

Në orën 19:00, udhëheqësit evropianë do të mbërrijnë në Shtëpinë e Bardhë

Në orën 20:00, Presidenti i SHBA-së do të përshëndesë Zelenskyn

Në orën 20:15, në Zyrën Ovale do të fillojë një takim dypalësh midis presidentëve të Shteteve të Bashkuara dhe Ukrainës

Në orën 21:15, kreu i Shtëpisë së Bardhë do të takohet me udhëheqësit evropianë në Sallën e Shtetit

Në orën 21:30 do të ketë një foto të përbashkët të Presidentit Amerikan me udhëheqësit evropianë në Cross Hall

Në orën 22:00, në Sallën Lindore do të fillojë një takim shumëpalësh midis Presidentit të SHBA-së dhe udhëheqësve evropianë

Mesazhi i ri i Trump: E di saktësisht çfarë po bëj

Presidenti amerikan, Donald Trump ka publikuar mesazhin e rradhës në Truth Social, ku ka folur hapur për punën e tij në arritjen e paqes, përpara bisedimeve potencialisht vendimtare për Ukrainën që do të zhvillohen sot.

"E di saktësisht se çfarë po bëj", tha presidenti amerikan.

Trump e ka quajtur vazhdimisht veten "paqebërës" gjatë mandatit të tij të dytë. Ai gjithashtu ka shprehur mospajtimin e tij me mbulimin mediatik të administratës së tij.

"Kam zgjidhur 6 luftëra në 6 muaj, njëra prej të cilave ishte një katastrofë e mundshme bërthamore, megjithatë më duhet të lexoj dhe të dëgjoj Wall Street Journal dhe shumë të tjerë që me të vërtetë nuk kanë idenë, duke më thënë gjithçka që po bëj gabim në rrëmujën Rusi/Ukrainë", tha Trump në një postim të fundit në rrjetet sociale.

Ukraina: Presim përparim në garancitë e sigurisë

Ministri i Jashtëm ukrainas Andriy Sibikha theksoi se pritshmëritë nga takimi në Shtëpinë e Bardhë janë të larta. "Nëse flasim për pritjet nga ky takim, bëhet fjalë për përparim të mëtejshëm, për një kuptim më të qartë të parametrave të garancive të sigurisë në të ardhmen, diçka jashtëzakonisht e rëndësishme.

Është gjithashtu një hap drejt një takimi trepalësh Zelensky - Putin - Trump, me pjesëmarrjen e mundshme të udhëheqësve të tjerë të aleatëve tanë. Sigurisht, ka edhe çështje të rendit të ditës dhe orarit", tha ai.

Sibiha e përshkroi situatën aktuale si "vendimtare", pasi, siç vuri në dukje ai, mobilizimi maksimal i përpjekjeve diplomatike mund të sjellë një paqe të drejtë më afër.

Duke iu përgjigjur një pyetjeje në lidhje me "vijat e kuqe" të Ukrainës, ai ishte kategorik: "qëndrimet themelore të palës ukrainase mbeten të pandryshuara. Presidenti ukrainas shkoi në Uashington, si gjithmonë, me një qëndrim të fortë, të koordinuar me të gjithë aleatët: Krimea është Ukrainë. Ekziston një Kushtetutë e Ukrainës, e cila përcakton të gjitha përgjigjet për këtë pyetje."

Sibiha shtoi se një tjetër parim i panegociueshëm për Kievin është mospranimi i çdo kufizimi në aftësitë e ushtrisë ukrainase dhe mbrojtjes së vendit.

Çfarë dimë rreth premtimit të SHBA-së për “garanci sigurie” të ngjashme me Nenin 5 të NATO-s?

Pas takimit Trump-Putin në Alaska, “ne arritëm të siguronim lëshimin e mëposhtëm: që Shtetet e Bashkuara të mund t’i ofrojnë [Kievit] mbrojtje të ngjashme me Nenin 5, i cili është një nga arsyet e vërteta pse Ukraina dëshiron të bashkohet me NATO-n”, tha i dërguari i SHBA-së për Ukrainën, Steve Witkoff.

Përpara se të udhëtonte për në Uashington, Emmanuel Macron siguroi se evropianët do ta pyesin Donald Trumpin "deri në çfarë mase" ai do t'i mbështesë garancitë e sigurisë të ofruara Kievit.

Çfarë është Neni 5?

Ai përcakton që çdo sulm ndaj njërit prej vendeve anëtare të aleancës konsiderohet sulm ndaj të gjithëve. Çdo shtet duhet të marrë “menjëherë masat që i konsideron të nevojshme, duke përfshirë përdorimin e forcës së armatosur”. Prandaj, nuk ka përfshirje automatike të drejtpërdrejtë ushtarake. Përgjigja mund të marrë, për shembull, formën e mbështetjes logjistike ose furnizimit me pajisje ushtarake.

Telefonanat e Putin pas takimit në Alaska

Presidenti rus Vladimir Putin zhvilloi një bisedë telefonike me kryeministrin indian Narendra Modi, gjatë së cilës e informoi kryeministrin për rezultatet e takimit të tij me presidentin amerikan Donald Trump në Alaska.

"Faleminderit miku im President Putin për telefonatën dhe për ndarjen e takimit tuaj të fundit me Presidentin Trump në Alaska", shkroi Modi në llogarinë e tij X. Në përfundim, ai vuri në dukje se pret kontakte të reja me Vladimir Putin në ditët në vijim.

Më vonë, u bë e ditur edhe për një bisedë midis Vladimir Putin dhe Presidentit brazilian Lula da Silva, si dhe kreut të Kirgistanit, Sandir Japarov.

Këto nuk ishin të vetmet telefonata ndërkombëtare që Presidenti Putin bëri sot. Më herët gjatë ditës, ai diskutoi takimin në Alaska me Presidentin e Afrikës së Jugut, Cyril Ramaphosa, dhe Presidentin e Taxhikistanit, Emomali Rahmon.

Një ditë më parë, Putin zhvilloi gjithashtu bisedime me homologun e tij bjellorus, Alexander Lukashenko, nga Kazakistani, Kassym-Jomart Tokayev dhe nga Uzbekistani, Shavkat Mirziyoyev.

Gjermania dhe Polonia refuzuan të dërgonin paqeruajtës në Ukrainë

Gjermania nuk ka kapacitetin financiar për të vendosur trupat e saj në Ukrainë brenda kuadrit të garancive të sigurisë. Kjo u deklarua nga kreu i Ministrisë së Jashtme gjermane, Johann Wadephul, në podkastin Table Media.

“Bundesëehr-i ka vendosur tashmë një brigadë në Lituani. Një vendosje shtesë e ushtarëve gjermanë në Ukrainë ndoshta do të ishte një barrë shumë e madhe për ne”, tha ministri. Megjithatë, sipas tij, Berlini duhet të luajë një rol të rëndësishëm në sigurimin e një paqeje të mundshme në Ukrainë. “Ukraina ka nevojë për garanci sigurie. SHBA-të e kanë bërë të qartë se janë gati për këtë. Tani duhet të shohim se çfarë mund të zbatohet së bashku me evropianët”, vuri në dukje zyrtari.

Qeveria e presidentit të ri polak, Karol Nawrotski, gjithashtu kundërshtoi dërgimin e forcave paqeruajtëse në Ukrainë pas luftës.

“Sot kemi të bëjmë me të ashtuquajturin koalicion të të vullnetshmëve. Mund të kemi harruar tashmë se çfarë lloj koalicioni ishte, dhe ishte një koalicion vendesh që ishin gati të dërgonin trupat e tyre në Ukrainë. Kjo nuk është zgjidhja më e mire”, tha ai.

Presidenti Karol Nawrotski deklaroi drejtpërdrejt se nuk është dakord me dërgimin e ushtarëve polakë në Ukrainë.

Qeveria ukrainase pret që lufta të vazhdojë deri në vitin 2026

Kabineti pret që lufta në Ukrainë të vazhdojë vitin e ardhshëm. Vendit do t'i duhen 45 miliardë dollarë shtesë për këtë. Qeveria ende nuk e ka siguruar shumën e plotë. Kjo u njoftua nga Ministri i Financave Sergei Marchenko gjatë prezantimit të programit të qeverisë së re.

“Ne presim që operacionet ushtarake të vazhdojnë në vitin 2026. Kjo rrjedhimisht mbulon nevojën tonë, e cila është 45 miliardë dollar, kjo është nevoja për financim të jashtëm, duke përfshirë deficitin plus shlyerjen e borxhit. Sot, kjo nevojë nuk është mbuluar plotësisht. Mendoj se së bashku me FMN-në, aleatët tanë kryesorë, do të arrijmë në një opsion të pranueshëm se si t'i mbulojmë këto nevoja”, tha Marchenko.

Zelensky nuk do të mbajë kravatë, të njëjtën xhaketë si në Hagë

"Do të ishte një shenjë e mirë për botën nëse Zelensky do të vishte kostum sot. Por ne nuk presim që ai ta bëjë këtë", tha për Axios një nga këshilltarët e Presidentit të SHBA-së Donald Trump.

Sipas tij, ata gjithashtu nuk presin nga udhëheqësi ukrainas që të vendosë kravatë, megjithëse shoqëruesit e Trump shpresonin që këtë herë ai të dukej më formal.

“Këshilltarët e Trump do të donin që Zelensky të vishte kravatë sot, por ai nuk do të veshë kravatë”, komenton Axios.

Kontakti i parë i parë i Zelenskyt në SHBA

Volodymyr Zelensky, siç raportohet nga Ukrinform, është takuar me të dërguarin special të Donald Trump, Keith Kellogg, përpara fillimit të negociatave me udhëheqësit amerikanë dhe evropianë në Uashington.

Takimi i politikanit me Përfaqësuesin Special të SHBA-së për Ukrainën dhe Rusinë ka përfunduar.

"Kjo është hera e parë që një takim është mbajtur në një kontekst të tillë, me seriozitet të madh", tha Zelensky.

Në një deklaratë të postuar në mediat sociale, ai falënderoi Kellogg për takimin dhe shtoi: "Rusia mund të detyrohet të bëjë paqe vetëm me forcë, dhe Presidenti Trump e ka atë forcë."

Starmer: Duhet të sigurohemi që paqja të jetë e qëndrueshme

Në një video të postuar në X nga aeroplani që e çonte në Uashington, kryeministri britanik Keir Starmer tha se lufta përveç Ukrainës, "ka pasur pasoja për Evropën dhe për çdo familje në Mbretërinë e Bashkuar". Në këtë kuadër Starmer në mesazhin e tij thotë se lufta duhet të zgjidhet nga "të gjithë, jo vetëm ukrainasit". "Ne duhet të sigurohemi që paqja [që duam] të jetë e qëndrueshme, e drejtë dhe e barabartë. Kjo është arsyeja pse po shkoj në Uashington", vazhdoi ai.

Evropianët takohen me Zelenskyn përpara se të takohen me Trumpin

Udhëheqësit evropianë në Uashington do të zhvillojnë bisedime me Volodymyr Zelensky përpara takimit të tij me Donald Trump në Shtëpinë e Bardhë, i cili është planifikuar për në orën 19:00, sipas një deklarate nga Komisioni Evropian. /Përshtatur nga Pamfleti/

Zv/presidenti JD Vance do të marrë pjesë në takimin midis Volodymyr Zelenskyy dhe Donald Trump sot. 

Gjatë përplasjes së ashpër të Trump me Zelenskyy në Zyrën Ovale në shkurt, ishte JD Vance ai që udhëhoqi sulmin ndaj presidentit të Ukrainës përpara se Trump t'i bashkohej përleshjes.

Vance akuzoi Zelenskyy-n për mungesë mirënjohjeje ndaj SHBA-së për mbështetjen e saj, duke e pyetur konkretisht nëse ai kishte thënë "faleminderit" gjatë takimit.

Ai e quajti gjithashtu ukrainasin "mungesë respekti" për shfaqjen e mosmarrëveshjeve para mediave amerikane, duke argumentuar se ishte e papërshtatshme të "lidheshin" çështjet publikisht në Zyrën Ovale.

Ai tha gjithashtu se ukrainasi kishte bërë fushatë në emër të demokratëve gjatë zgjedhjeve presidenciale të vitit 2024, pretendoi se organizoi "turne propagande" në Ukrainë dhe po "detyronte rekrutët të shkonin në vijën e frontit" për shkak të mungesës së fuqisë punëtore.

Ndryshimi i qëndrimit të Donald Trump pas takimit të samitit në Alaska, Donetsku në plan të parë dhe garancitë e sigurisë nga SHBA-ja, aleatët evropianë në anën e Volodymyr Zelensky-t

Tema kryesore në të gjitha mediat është takimi i mbrëmjes së sotme mes Presidentit amerikan, Donald Trump me homologun ukrainas, Volodymyr Zelensky, dhe udhëheqësit evropianë, me "shkëmbimin e territoreve" midis Rusisë dhe Ukrainës në krye të axhendës. Në të njëjtën kohë ndryshimi në qëndrimin e presidentit amerikan është ajo që po shkakton shqetësim të madh midis zyrtarëve evropianë.

Takimi i sotëm, me rëndësi të madhe, zhvillohet në gusht, i cili tradicionalisht është konsideruar si një muaj "i vdekur" për konsultime diplomatike dhe bisedime në nivel samiti, por takimi kokë më kokë midis Presidentit të Shteteve të Bashkuara Donald Trump dhe Presidentit rus Vladimir Putin më 15 gusht ringjalli pritjet për një fund të luftës që filloi pas pushtimit të Ukrainës nga ushtria ruse.

Donald Trump pretendon se ndaj Vladimir Putinit do të vendoseshin sanksione të ashpra nëse ai nuk do të ndërmerrte hapat e nevojshëm që do të çonin në një armëpushim, ndërsa pas samitit në Alaska, ai duket se është i hapur ndaj idesë së presionit ndaj ukrainasve që t'i lëshojnë territor Rusisë.

Mediat ndërkombëtare po analizojnë të gjitha të dhënat rreth takimit të sotëm vendimtar dhe po shpjegojnë se si udhëheqësit evropianë kanë ndërtuar një mur mbrojtës rreth presidentit ukrainas gjatë negociatave me Donald Trump. Kjo në thelb do të ndihmojë në shmangien e një përsëritjeje të një përplasjeje midis dy udhëheqësve, siç ndodhi në shkurt.

Starmer mëson Zelenskyn si të flasë me Trumpin

Kryeministri britanik e ka këshilluar Volodymyr Zelensky-n se si ta “përkëdhelë” egon e Donald Trump-it ndërsa ai paraqet argumentet e tij politike , shkruan Telegraph.

Më 28 shkurt, Keir Starmer shënoi një fitore diplomatike në takimin e tij të parë me presidentin e SHBA-së, sipas medias, pasi arriti të balanconte kënaqësinë e egos së Trump me avancimin e qëllimeve kritike të Britanisë. Rezultati ishte mbështetja për marrëveshjen e Keir Starmer për të ceduar Ishujt Chagos dhe fjalë të ngrohta për një marrëveshje tregtare nga i fuqishmi Trump.

Pra, ministrat dhe zyrtarët britanikë i mësuan udhëheqësit ukrainas se si të “fliste si Trump”. Ndër udhëzimet që i dhanë ishte të mos “thumbonte” çdo deklaratë provokuese dhe të mos përpiqej publikisht ta “çonte” presidentin amerikan në një cep, sepse kjo do ta bënte të reagonte. Ata e këshilluan Zelenskyn të lavdëronte presidentin amerikan.

Skynews: Ukrainasit e zhgënjyer nga qëndrimi i Trumpit

Sipas Skyneës, zyrtarët ukrainas thuhet se ndihen të tradhtuar nga presidenti amerikan, i cili duket se ka ndryshuar qëndrimin e tij në favor të Vladimir Putinit në një numër pikash kyçe pas takimit me të në Alaska.

Analiza pohon se Presidenti Trump ka minuar unitetin e Aleancës Perëndimore duke braktisur thirrjet e tyre për një armëpushim të menjëhershëm në Ukrainë. Presidenti amerikan, thuhet në analizë, nuk po kërcënon më me sanksione më të ashpra, dhe më shqetësuese është se ai duket i hapur ndaj idesë së detyrimit të ukrainasve të dorëzojnë territore që rusët nuk i kanë pushtuar ende.

Në fakt, raporton Skyneës, Donald Trump beson se konflikti mund të zgjidhet duke shkëmbyer territore. Putin, nga ana tjetër, e ka bërë të qartë se po lufton për të eliminuar Ukrainën si një entitet të pavarur dhe demokratik.

Ndërkohë, ukrainasit thonë se dorëzimi i tokës nga Zelensky, të cilën trupat ukrainase kanë luftuar për ta mbrojtur që nga viti 2014, do të ishte një veprim vetëvrasjeje politike dhe çmendurie strategjike.

Garanci sigurie nga SHBA-të

Nga ana e saj, gazeta Ëashington Post raporton se mes presionit ndaj Zelenskyt për një marrëveshje, SHBA-të do të ofrojnë disa garanci sigurie. Megjithatë, të gjithë parametrat do të diskutohen më tej midis Shteteve të Bashkuara, Ukrainës dhe aleatëve evropianë gjatë takimit të tyre këtë pasdite në Uashington.

Aleatët evropianë në anën e Zelensky-t

Aleatët evropianë kanë arritur në përfundimin e qartë se një konflikt i ri në Shtëpinë e Bardhë duhet të shmanget me çdo kusht. Kjo është arsyeja pse ata do të jenë në krah të Volodymyr Zelensky në takimin e sotëm. Konkretisht, do të jenë të pranishëm Presidentja e Komisionit Evropian Ursula von der Leyen, Sekretari i Përgjithshëm i NATO-s Mark Rutte , Kryeministri britanik Keir Starmer, Presidenti francez Emmanuel Macron, Kancelari gjerman Friedrich Merz, Kryeministrja italiane Giorgia Meloni dhe Presidenti i Finlandës Alexander Stubb.

Shqetësim i thellë pas samitit në Alaskë

Lordi britanik Darroch, një ish-ambasador në Uashington gjatë mandatit të parë të Donald Trump, tha se "formimi i shpejtë i delegacionit evropian të nivelit të lartë që shoqëron Zelenskyn në Uashington është një shenjë e shqetësimit të thellë në lidhje me dy aspekte të rezultatit të samitit të Alaskës. Së pari, Presidenti Trump tani beson se një marrëveshje gjithëpërfshirëse paqeje duhet t'i paraprijë armëpushimit. Dhe së dyti, sugjerimet se rruga drejt paqes mund të përfshijë lëshimin e edhe më shumë territorit nga Ukraina".

Qytetet e Donetskut janë "bastioni i fundit" për Ukrainën

Një nga temat kryesore në bisedimet e sotme në Shtëpinë e Bardhë do të jenë dy rajonet e Ukrainës lindore, të njohura si Donbas.

Rusia dëshiron që si Donetsku ashtu edhe Luhansku të dorëzohen, duke përfshirë zonat që aktualisht nuk janë nën kontrollin e saj. Forcat ruse kontrollojnë të gjithë Luhanskun dhe rreth 70% të Donetskut.

Shumë qytete në Donetsk që janë ende nën kontrollin ukrainas janë me rëndësi strategjike, tha analisti ushtarak Justin Crump për emisionin Today të BBC Radio Four.

Ato përbëjnë “forcën e fundit” dhe një “pikë qendrore të mbrojtjes së Ukrainës”, tha ai, me linja hekurudhore që kalojnë përmes tyre dhe që janë kritike për furnizimet ushtarake.

Ukrainasit kanë “luftuar për çdo pëllëmbë toke”, kështu që do të ishte e papranueshme për ta që ta humbnin këtë territor ndaj Rusisë, shtoi Kramp, duke theksuar se “askush në Ukrainë - në këtë pikë - nuk i beson asnjë premtimi rus për të mos vazhduar sulmet”. /Përshtatur nga BBC, Skynews, Telegraph dhe Washington Post/

Presidenti Donald Trump ka reaguar në rrjetet sociale mbi takimet që priten sot në Shtëpinë e Bardhë. Ai e ka cilësuar ditën e sotme një "ditë të madhe për Shtëpinë e Bardhë".

"Nuk kemi pasur kurrë kaq shumë udhëheqës evropianë këtu në të njëjtën kohë", shkroi ai në llogarinë e tij në Truth Social.

"Një nder i madh për Amerikën!!!! Le të shohim se cilat do të jenë rezultatet???"

Ndërkohë, Agjencia Ukrinform raporton se Volodymyr Zelenskyy do të takohet me të dërguarin e SHBA-së Keith Kellogg në Uashington përpara bisedimeve të tij me Trump.

Të dyve të fundit nuk do t’u vinte keq, por edhe këtu beteja vazhdon: duket se dje Macron është nxehur përballë kësaj hipoteze, duke propozuar më mirë Gjenevën. Meloni me një batutë e ka qetësuar. Nuk është ky momenti për t’u përçarë.

Emmanuel Macron dhe Giorgia Meloni

Fillimisht ajo fluturoi drejt Romës, për t’u lidhur me video konferencwn e  Koalicionit të të Vullnetshmëve dhe për të përgatitur një linjë të përbashkët që do të paraqitet sot në Shtëpinë e Bardhë, kur liderët kryesorë europianë, presidentja e BE-së von der Leyen, kreu i NATO-s Rutte do të takojnë Trump dhe Zelensky.

Pastaj në mbrëmje Giorgia Meloni gjithnjë me telefon në dorë u nis për në Uashington.

Askush nuk e di nëse do të bëhet një hap i vërtetë përpara. Sigurisht që synimi është të mos përsëritet skena e gjashtë muajve më parë, kur Trump e “shpërfilli” Zelenskyn para kamerave, në një përplasje epike. Aq sa, tregojnë, pika e vërtetë e ngërçit mbrëmjen e djeshme në bisedimet mes liderëve ka qenë pikërisht formati i deklaratave për shtyp. Në Shtëpinë e Bardhë kishin menduar për komunikime të shpejta të Trump dhe Zelensky-t në Zyrën Ovale menjëherë pas takimit ballë për ballë. Por rreziku që po shihej  siç Meloni u ka shpjeguar aleatëve është që gjithçka të kthehet në një shfaqje nga ana e Trump që përfundon duke e lënë Zelenskyn dhe gjithë liderët e tjerë pa zë, ose në një mbivendosje të rrezikshme zërash e pozicionesh. Prandaj, presioni mbi Trump është i madh që të adoptohet një model më institucional, si në Alaska: deklarata të të dy presidentëve pa pyetje, në fund të ditës.

Do të shihet nëse Trump do të bindet. Sigurisht, siç u thotë Meloni të vetëve, për momentin nuk mbetet gjë tjetër veçse të shoqërohen përpjekjet e tij me durim dhe këmbëngulje, pa e sulmuar, edhe kur dëshira do të mungonte për shkak të toneve tepër miqësore që ka përdorur me Putinin. Por edhe dje kryeministrja ua tha liderëve të tjerë: rreziku është që Trump, nëse sulmohet, të hedhë gjithçka në erë dhe të thotë që Ukraina nuk do paqen, Evropa nuk bashkëpunon, dhe atëherë bëni si të doni sepse amerikanët do të merren vesh direkt me rusët. Një katastrofë, që do ta linte Europën në një ngërç. Pra, endje me fillin që kemi.

Pra, çfarë qëndrimi mban Italia në Uashington?

Duke thënë se kryeministrja italiane nuk u jep shumë peshë telefonatave ku marrin pjesë shumë vende pa arritur në një përfundim tjetër veçse  komentojnë të sajët — për të kënaqur Macronin që do të tregojë "se është ai udhëheqësi i vërtetë i Europës", në një shënim Meloni shkruan se në diskutim "është përsëritur rëndësia e vazhdimit të punës me Shtetet e Bashkuara për t’i dhënë fund konfliktit dhe për të arritur një paqe që të sigurojë sovranitetin dhe sigurinë e Ukrainës, e cila duhet të përfshihet në çdo vendim". Për më tepër "diskutimi ka konfirmuar nevojën për të mbajtur presionin kolektiv mbi Rusinë dhe për garanci të forta e të besueshme sigurie".

Këto fjalë, sigurisht, ishin më të përgjithshme se ato që liderët kanë shkëmbyer në bisedimet më të ngushta. Pika kyçe, për kryeministren italiane që e ka diskutuar edhe me Zelensky-n, është të sigurohet që Ukraina nuk do të mbetet vetëm në të ardhmen. Dhe që, ky është plani "i shpikur nga ne", siç përsërit ajo, të zgjerohet aplikimi i nenit 5 të NATO-s në mënyrë që nëse Ukraina do të sulmohej, ajo do të mbrohej nga aleanca, edhe pse pa qenë pjesë strukturore e saj.

Ideja nuk e bind Macron, që shtyn për një ndërhyrje të drejtpërdrejtë të vendeve europiane në mbrojtje të Ukrainës, me kontingjente ushtarake. Por Meloni i është përgjigjur: "Rusia ka një milion e treqind mijë ushtarë: sa duhet t’i dërgojmë ne që të jemi në të përmbushim detyrën?". Dhe shton: "Nëse një nga ushtarët tanë do të vdiste, a do të bënim sikur s’ka ndodhur apo do të duhej të reagonim? Sepse nëse reagojmë është e qartë që do ta bëjë edhe NATO. Dhe atëherë aq më mirë të aktivizojmë menjëherë klauzolën".

Ideja duket se i intereson si Zelenskyt, ashtu edhe Trumpit, më pak Macronit që nuk e pëlqen qëndrimin italian, në një përplasje qëndrimesh që vazhdon prej kohësh. Do të jetë një moment vendimtar, i pari nga çështjet "jashtëzakonisht komplekse", siç thotë kryeministrja italiane: adoptimi i rusishtes si gjuhë zyrtare, territoret që kërkon Putini, armëpushimi. Por paraprake mbetet çështja e sigurisë: çfarë mund të marrë Zelensky në dorë për të pranuar disa nga kushtet e rusëve dhe për t’u shpjeguar bashkatdhetarëve të tij se "vdekja kishte ndonjë dobi?". Një mbrojtje automatike, është e bindur kryeministrja italiane, do të ishte "një rezultat konkret, solid" për të. Do të shihet që sonte nëse do të ketë hapa përpara. Dhe ndoshta do të mund t’i jepet vazhdim propozimit italian që Roma të jetë vendi i një takimi tre palësh të mundshëm Putin, Zelensky, Trump. Të dyve të fundit nuk do t’u vinte keq, por edhe këtu beteja vazhdon: duket se dje Macron është nxehur përballë kësaj hipoteze, duke propozuar më mirë Gjenevën. Meloni me një batutë e ka qetësuar. Nuk është ky momenti për t’u përçarë./ Corriere della sera