FLASH
Shkruar nga Pamfleti
Ka përfunduar Festivali Folklorik, ngjarja më e rëndësishmë kulturore ndër vite. Pas 8 ditësh intensive, Festivali u mbyll në qytetin e Gjirokastrës, ku nata finale kishte rezervuar një përmbledhje emocionuese të pjesëve më autentike dhe prurjeve burimore nga të gjitha krahinat.
Mbrëmja kulmoi me Ansamblin Shota të Kosovës dhe Ansamblin Kombëtar të Këngëve dhe Valleve të Shqipërisë të cilët për herë të parë erdhën në festival si një trupë e vetme. Vallja e Drenicës, dhe motive tradicionale të valleve të Veriut dhe të Jugut sollën në skenë shumë dinamika. Drejtuesi artistik i Ansamblit Shota tha se festivali është një hap përpara në drejtim të mbrojtjes së trashëgimisë dhe dëshmi se gjithashtu ajo bartet çdo ditë në çdo krahinë nga vetë banorët.
Numri i të rinjve që morën pjesë në Festivalin Folklorik 2023 ka qenë si asnjëherë më parë. Në disa prej grupeve ata mbanin peshën kryesore dhe ekspertët e trashëgimisë vlerësojnë se përcjellja tek brezat është duke ndodhur. Violeta Beshiri është 15 vjeç dhe një prej solisteve më të reja të grupit të Durrësit. Ajo ushtrohet prej 6 vitesh me ansamblin. Grupi i fëmijëve të Vlorës gjithashtu solli në festival disa nga pjesët më autentike të polifonisë së bregut.
Mbrëmja u mbyll pas mesnate me koncertet në pazar të Marsela Çibukaj e më pas të grupit të Flamur Canës. Festivali përgjatë 8 ditëve është ndjekur nga më shumë se 10 mijë vetë ndërsa në skenë debutuan 1200 artistë. Eventi që rikthehej pas 8 vitesh në Gjirokastër ishte një sfidë për shërbimet e akomodimit dhe pritjes, e cila provoi se ngjarje të këtyre përmasave meritojnë të koordinohen më mirë me operatorët turistikë të rajonit dhe ti shërbejnë në një shkallë më të gjerë ekonomisë lokale.
Lini një Përgjigje