FLASH
Shkruar nga Pamfleti
Prokuroria e Posaçme Kundër Korrupsionit dhe Krimit të Organizuar (SPAK) ka lëshuar në total 8 urdhër-arreste në kuadër të operacionit kundër grupit kriminal të lidhur me Inez Hajrullën.
Bëhet me dije se, mes personave të arrestuar është edhe Hams Demushi, një ish-efektiv policie që më parë ka shërbyer në Zvicër.
Ndërkohë, në pranga ka rënë gjithashtu edhe Rezart Kuçi, drejtues i një sektori në Policinë e Tiranës dhe ish-shef i Krimeve në Vlorë. Ai akuzohet për trafik droge, pjesëmarrje në grup të strukturuar kriminal dhe shpërdorim detyre.
Operacioni i SPAK është pjesë e një hetimi më të gjerë ndaj grupit kriminal të dyshuar se vepronte në Vlorë dhe që lidhet me disa ngjarje të rënda kriminale.
Urdhrat e arresit janë ekzekutuar nga Agjencia e Mbikëqyrjes Policore (AMP). Ndaj Kuçit rëndojnë akuza të rënda, përfshirë shpërdorim detyre, përfshirje në trafik të lëndëve narkotike dhe pjesëmarrje në grup të strukturuar kriminal.
Aktualisht, Rezart Kuçi ushtron detyrën e shefit të seksionit/ekspert në Seksionin e Policisë Shkencore pranë Drejtorisë Vendore të Policisë Kukës.
Më herët ai ka mbajtur disa poste drejtuese në Policinë e Shtetit. Kuçi ka shërbyer si zëvendësshef komisariati dhe shef për Hetimin e Krimeve në Komisariatin e Policisë Nr.1 në Tiranë, ndërsa më parë ka mbajtur edhe detyrën e zëvendësshefit të komisariatit dhe shef për Hetimin e Krimeve në Drejtorinë Vendore të Policisë Vlorë.
Lini një Përgjigje