FLASH
Shkruar nga Pamfleti
Të tjera detaje zbardhen lidhur me ngjarjen e rëndë të ndodhur në Velipojë mbrëmjen e djeshme, ku dy persona u qëlluan për vdekje nga dy vëllezër që janë në arrati.
Viktimat janë Arsid Hoxha dhe Ersild Ishmi, ndërsa autorë të dyshuar të krimit janë Eduard dhe Gëzim Frroku, pronarë të një hoteli.
Si pasojë e të shtënave ka mbetur i plagosur edhe Zyber Zagradi, i cili ka marrë një plagë në këmbë dhe është jashtë rrezikut për jetën.
Sipas informacioneve, ngjarja është e lidhur me një konflikt të mëparshëm që ka ndodhur më 28 korrik. Në atë datë, një debat kishte shpërthyer mes kamarierit dhe kuzhinierit të një lokali dhe pronarëve të hotelit, Eduart dhe Gëzim Frroku.
Shtetasi Ersild Ishmi kishte ardhur për të diskutuar me pronarët për shkak të lidhjeve miqësore që kishte me kamarierin dhe kuzhinierin. Për këtë ngjarje, si rezultat, Ishmi ishte arrestuar dhe më vonë ishte liruar me masën arrest shtëpie nga gjykata, masë e cila ishte në fuqi deri natën e sotme.
Lidhur me ngjarjen e rëndë, në një intervistë për mediat ka folur Zef Frroku, xhaxhai i dy autorëve të dyshuar të ngjarjes. Sipas tij fajin e ka Prokuroria që kanë liruar një nga viktimat, pas një konflikti pak kohë më parë.
“Para dy javësh, nga data 28, kanë ardhur dhe janë konfliktuar para hotelit të vëllait. Ka nxjerrë armën ai zotëria, e ka marrë shteti e ka çuar në burg, e ka liruar për dy ditë.
Mbrëmë ka ardhur sërisht, se për kë ka ardhur nuk e di. Ai prokuror dhe ai gjykatës që i ka lëshuar nuk i ka bërë mirë as shtetit, as familjes sime dhe askujt tjetër.
Nuk e di në do të dorëzohen ose jo, nuk kemi asnjë komunikim me ta, por në këtë shtet nuk ka askush besim për tu dorëzuar me këta prokurorë dhe gjykatës që po e vjedhin këtë vend”, thotë Zef Frroku.
A do të dorëzohen dy vëllezërit?
Zef Frroku, xhaxhai i autorëve: Nuk e di se kur ndodhen, nuk kemi komunikim me ta. Këtij shteti është vështirë me iu dorëzuar kujt, se janë duke e bërë “rrush e kumbulla” këtë vend. Janë duke marrë në qafë njerëzit e ndershëm dhe duke favorizuar kriminelët. Kërkojmë drejtësi, Prokurorët e kanë lëshuar ditën e tretë, nuk merret vesh.
Ai shprehet se vëllai i tij ka hotelin në Velipojë qysh prej vitit 1994.
Lini një Përgjigje