FLASH
Shkruar nga Pamfleti
Zbardhen detaje të tjera nga të shtënat me armë zjarri në Malësi të Madhe, të cilat terrorizuan banorët e fshatit Gruemirë. Dy persona me motor qëlluan mbi 100 plumba, duke sjellë dhe përplasje me banorët.
Fillimisht u tha se personat kishin qëlluar me armë ndaj disa kamerave të sigurisë, ndërkohë që policia në një reagim zyrtar bën me dije se është bërë identifikimi i tyre. Sipas hetimeve paraprake, dyshohet se dy personat kishin shkuar për të vjedhur në fshat, por janë pikasur nga banorët. Policia shprehet se ata kanë qëlluar në ajër.
“Specialistët për Hetimin e Krimeve të Komisariatit të Policisë Malësi e Madhe, në vijim të ngjarjes së ndodhur në fshatin Gruemirë, bazuar edhe në informacionet e siguruara nga inteligjenca policore dhe si rezultat i veprimeve të shpejta u bë e mundur zbardhja e ngjarjes, identifikimi dhe shpallja në kërkim e tyre.
U shpallën në kërkim shtetasit E. V., 22 vjeç, banues në fshatin Hot i Ri dhe R. Z(P)., 27 vjeç, banues në fshatin Shtoj i Vjetër;
Nga veprimet paraprake rezulton se dy shtetasit e mësipërm dyshohet se kishin shkuar për të vjedhur në fshatin Gruemirë por janë diktuar nga tre shtetas banorë të fshatit e të cilët këta dy shtetas kanë debatuar dhe më pas gjatë largimit kanë qëlluar me armë zjarri në ajër. Vijon puna intensive për lokalizimin dhe kapjen e tyre”, tha policia.
Materialet i kaluan Prokurorisë, për veprat penale “Kanosja” dhe “Mbajtja pa leje dhe prodhimi i armëve, armëve shpërthyese dhe i municionit”.
Lini një Përgjigje