FLASH
Shkruar nga Pamfleti
Një ngjarje e rëndë është shënuar këtë mbrëmje në Kavajë, ku si pasojë e një konflikti kanë humbur jetën dy persona. Mësohet se dy të rinj janë përplasur me thikë dhe armë zjarri e për pasojë kanë ndërruar jetë.
Emrat e viktimave janë Edomd Gosa dhe Altin Rexha, të dy në moshë të re. Edmond Gosa ka goditur me thikë Altin Rexhën, më pas ky i fundit ka qëlluar tre herë ndaj Gosës.
Lidhur me ngjarjen ka reaguar edhe policia, e cila bën me dije se të dy viktimat janë të moshës 43 vjeç. Ata kanë ndërruar jetë në spital si pasojë e plagëve të marra.
"Më datë 29.03.2023, në Kavajë, tek kryqëzimi i valutës, ka ndodhur një konflikt midis dy shtetasve, ku shtetasi Edmond Gosa 43 vjeç, ka plagosur me thikë shtetasin Altin Rexha, 43 vjeç, ndërsa ky i fundit ka plagosur me armë zjarri shtetasin Edmond Gosa. Si pasojë e plagëve të marra të dy shtetasit e përfshirë në konflikt, kanë ndërruar jetë në spital. Grupi hetimor ndodhet në vendngjarje dhe po punon për sqarimin e rrethanave të ngjarjes. Në përfundim të veprimeve paraprake në vendngjarje, do të kemi një informacion vijues", njofton policia.
Kjo është ngjarja e radhës e rëndë që ndodh në vend. Më 12 mars Tirana u trondit nga një sulm me armë ndaj një lokali në Don Bosko, ku persona të paidentifikuar qëlluan me breshëri plumbash pa asnjë lloj droje. Ata vranë bankieren e lokalit, një zonjë e cila ishte krejt e pafajshme, ndërsa mbetën të plagosur 5 të tjerë. Gjithashtu u dëmtua dhe një vajzë 1-vjeçare, mbesa e viktimës.
Por nuk u mbyll me kaq. Mesnatën e së dielës dhe mëngjesin e së hënës, u qëllua me automatik ndaj godinës së “Top Channel”. Për pasojë vdiq një tjetër i pafajshëm, roja i objektit. Edhe për këtë ngjarje nuk dihet se cili është motivi dhe kush janë autorët.
Ndërkohë sot kemi një tjetër krim me viktima. Këtë herë në Kavajë.
Lini një Përgjigje