FLASH
Shkruar nga Pamfleti
Mafia shqiptare në zemër të karteleve meksikane: Pastrimi i parave, droga dhe armët e kalibrit të lartë
Mediat meksikane kanë zbuluar detaje tronditëse mbi bashkëpunimin mes mafies shqiptare dhe karteleve më të fuqishme të drogës në Amerikën Latine. Sipas një raporti të publikuar së fundmi, mafia shqiptare po konsiderohet si “partner strategjik” i kartelit të Sinaloas dhe atij të Jalisco Nueva Generación (CJNG), për shkak të kontrollit që ajo ka mbi trafikun e kokainës në Evropë, pastrimin e parave dhe rrjetet e infiltrimit në porte strategjike.
Në fokus të lajmit është familja Hysa, me origjinë shqiptare dhe e vendosur në Meksikë, e cila është sanksionuar nga Departamenti Amerikan i Thesarit për përfshirje në pastrim parash në shërbim të kartelit të Sinaloas.
Raporti nënvizon se mafia shqiptare vepron përmes strukturave të mbyllura familjare, duke minimizuar rrezikun e tradhtisë dhe duke u bërë një aleat i besueshëm për organizatat kriminale ndërkombëtare.
Mafia shqiptare është kthyer në një partner kyç për kartelet më të fuqishme të drogës në Meksikë, Sinaloa dhe Jalisco Nueva Generación (CJNG), falë kontrollit të saj të fuqishëm mbi shpërndarjen e drogës në Evropë, strukturës së mbyllur familjare që e bën të besueshme, dhe sistemeve të sofistikuara të pastrimit të parave që ajo ofron. Rrjeti i saj global i ka dhënë mundësi karteleve meksikane të zgjerojnë bizneset, të qarkullojnë kapitalet dhe të furnizohen me armë pa rrezikuar zbulimin.
Deklarata e fundit e Departamentit Amerikan të Thesarit, që shpalli sanksione ndaj familjes Hysa, e vendosur në Meksikë por me origjinë shqiptare, për akuza për pastrim parash në favor të fraksionit “Mayiza” të kartelit të Sinaloas, është një tjetër dëshmi e lidhjeve gjithnjë e më të ngushta mes karteleve meksikane dhe klaneve kriminale shqiptare. Pyetja që lind natyrshëm është: Pse lidhjet mes krimit të organizuar në Meksikë dhe Shqipëri janë bërë kaq të zakonshme?
Në Meksikë dihet pak për mafien shqiptare, por në nivel ndërkombëtar ajo është një ndër grupet më me ndikim, përkrah mafies italiane 'Ndrangheta, me të cilën ndan kontrollin e trafikut të drogës në Evropë. Kjo e ka bërë aleate të preferuar për kartelet e Sinaloas dhe CJNG-së. Përveç Evropës, mafia shqiptare është aktive edhe në SHBA, Kanada dhe Australi, ku ka depërtuar nëpërmjet komuniteteve shqiptare të emigrantëve.
Që nga fundi i viteve ’80, mafia shqiptare dhe 'Ndrangheta ishin organizata të vogla krahasuar me gjigantët e krimit si Cosa Nostra apo Camorra. Por pas viteve ’90, ato filluan të rriteshin fuqishëm për dy arsye kryesore:
Dobësimi i mafieve tradicionale evropiane, për shkak të ndjekjes penale dhe bashkëpunimit të brendshëm me autoritetet, çka i bëri të pabesueshme për kartelet kolumbiane dhe meksikane.
Struktura familjare e mbyllur, ku anëtarët janë vetëm të lidhur me gjak (baballarë, bij, vëllezër, xhaxhallarë, nipër), gjë që ul ndjeshëm rrezikun e tradhtisë.
Diaspora shqiptare dhe rrënjët në portet strategjike
Falë valës së madhe të emigracionit nga Shqipëria dhe Kalabria (rajoni i 'Ndranghetas), këto mafie u vendosën shpejt në qytetet kyçe evropiane, veçanërisht në porte, qendra financiare dhe zona me zhvillim ekonomik të lartë.
Mafia shqiptare është sot aktive në Londër, Berlin, Paris, Stokholm, Stamboll, Nju Jork, Sidnei, Toronto, Madrid, Romë, si dhe në portet me fluksin më të madh të drogës si Hamburgu (Gjermani), Algeciras dhe Valencia (Spanjë), Amberes (Belgjikë) dhe Roterdami (Holandë).
Këto porte janë pikat hyrëse të kokainës dhe fentanilit në Evropë, dhe mafia shqiptare është e pozicionuar në mënyrë të përkryer për t’i menaxhuar këto flukse – duke u bërë aleat i pazëvendësueshëm për kartelet meksikane.
Pastrimi i parave dhe fuqia financiare
Përveç kontrollit të trafikut të drogës, mafia shqiptare ofron diçka që shumë organizata kërkojnë: rrjete ndërkombëtare për pastrimin e parave. Investimet e saj janë të përqendruara në prona luksoze në të gjithë Evropën, kazino, hotele, qendra turistike, spa dhe restorante. Njëkohësisht, ajo bashkëpunon me rrjete kineze dhe turke në tregti të paligjshme dhe pirateri produktesh në qytete të mëdha.
Mafia shqiptare është gjithashtu aktive në qendrat kryesore financiare të Evropës si Zvicra, Gjermania dhe Britania e Madhe. Ajo përdor kriptovaluta, platforma lojërash digjitale dhe mashtrime online për të qarkulluar kapitalet e pista.
Një strukturë fleksibile, pa “luftëra mes bandash”
Ndryshe nga kartelet meksikane që përplasen shpesh në luftëra të përgjakshme, mafia shqiptare nuk është një organizatë unike, por një rrjet klanesh familjare të pavarura, që bashkëpunojnë dhe ndajnë fitimet. Kjo e bën të mundur që një klan i vetëm shqiptar të bashkëpunojë njëkohësisht me dy kartele rivale si Sinaloa dhe CJNG, sepse çmimi i konfliktit është shumë më i lartë sesa përfitimet nga ekskluziviteti.
Prandaj nuk është aspak befasuese që familja Hysa në Meksikë shërben si urë lidhëse me klanet shqiptare në Evropë, duke ofruar jo vetëm pastrim parash përmes kazinove, por edhe hyrje në skema investimesh që janë thuajse të pamundura për t’u gjurmuar nga autoritetet meksikane. /Pamfleti
Lini një Përgjigje