FLASH
Shkruar nga Pamfleti
Një person i dënuar për trafik narkotikësh dhe pjesëmarrje në grup kriminal është arrestuar nga Policia e Elbasanit gjatë një operacioni të koduar “Targeti”.
Sipas policisë, në pranga ka rënë Valmir Polisi, 37 vjeç, i cili ishte në kërkim për të vuajtur dënimin e dhënë nga Gjykata e Posaçme kundër Korrupsionit dhe Krimit të Organizuar.
Arrestimi u realizua pas një operacioni të organizuar nga shërbimet operacionale të Drejtorisë Vendore të Policisë Elbasan, në bashkëpunim me efektivët e Forcës së Posaçme “Shqiponja”. Policia kishte siguruar informacion për vendndodhjen e tij dhe ndërhyri për kapjen e 37-vjeçarit, i cili fshihej në një zonë të thellë në fshatin Pishkash.
Sipas burimeve policore, i kërkuari ka tentuar të largohet sapo ka konstatuar praninë e efektivëve, por është neutralizuar dhe arrestuar pas ndërhyrjes së forcave të policisë.
Gjykata e Posaçme e ka dënuar atë me 9 vjet e 4 muaj burgim për veprat penale “Trafikimi i lëndëve narkotike” dhe “Prodhimi dhe shitja e narkotikëve”, të kryera në kuadër të një grupi të strukturuar kriminal. Nga ky dënim, atij i kanë mbetur për të vuajtur 4 vjet, 7 muaj e 18 ditë burgim.
Pas arrestimit, 37-vjeçari do t’i dorëzohet Drejtorisë së Përgjithshme të Burgjeve për vijimin e procedurave dhe ekzekutimin e pjesës së mbetur të dënimit.
Lini një Përgjigje