FLASH
Shkruar nga Pamfleti
Policia spanjolle ka arrestuar në Madrid një nga trafikantët më të kërkuar në Europë. Ai është një shqiptar, i cili drejtonte një organizatë kriminale të përbërë nga shtetas të Shqipërisë dhe të Kosovës që ka vepruar në fushën e kultivimit dhe trafikut të kanabisit në Belgjikë në vitet 2014-2018.
Ai është Haredin Fejzulla 59 vjeç, sipas mediave spanjolle që kanë publikuar identitetin e tij, foton dhe pamjet e momentit të arrestimit.
Kush është Haredin Fejzulla?
Haredin Fejzulla u dënua me 9 dhe 4 vjet burgim nga Gjykata e Shkallës së Parë të Brukselit, si dhe 5 vjet nga Gjykata e Apelit të Brukselit, për veprat penale të trafikut të lëndëve narkotike dhe përkatësisë në organizatë kriminale, pra 18 vjet në total.
Një gjyq i vitit 2021 kundër Fejzullait zbuloi se 13 nga plantacionet gjeneruan rreth katër milionë euro, para të cilat besohet se u riinvestuan nga banda.
Haredin Fejzulla ka lindur në Shqipëri, por ka jetuar në Belgjikë për shumë kohë. E gjithë familja e tij ishte e përfshirë në organizim dhe trafik droge. Me 3 vite burg u dënua edhe djali i tij 31-vjeçar, si ndihmës logjistik dhe roje i plantacioneve.
Haredin Fejzulla akuzohet për drejtimin e një grup kriminal të drogës me bazë në Belgjikë, si edhe është i përfshirë në kultivimin dhe trafikimin e kanabisit, nga ku përfituan një pasuri prej më shumë se 4 milionë euro.
Ai u dënua në vitin 2022 me 29 vjet burg nga gjykata e Brukselit, por pas vendimit ai u arratis.
Sipas Policisë, hetimet për gjetjen e tij kanë nisur në janar të vitit 2023, për shkak të dyshimeve se ai mund të fshihej në Madrid. I arratisuri mori masa të shumta sigurie për të mos u lokalizuar dhe kishte mjete të ndryshme me të cilat udhëtonte, si dhe shtëpi të shumta ku kalonte natën me ndërprerje.
Ai ndërronte rregullisht edhe celularin. Megjithatë, ai u gjet të enjten e kaluar në lagjen Carabanchel kur po shkonte drejt një furgoni që kishte shkuar për ta kërkuar pranë njërës prej vendstrehimeve të tij.
Policia Kombëtare arrestoi Haredin Fejzullën sipas një urdhër-arresti të lëshuar nga autoritetet belge, vend në të cilin ai u dënua me më shumë se 29 vjet burg për 13 krime të trafikut të drogës, anëtarësimit në organizatë kriminale dhe falsifikimit të dokumenteve të kryera, mes viteve 2014 dhe 2018. Pas arrestimit, ai është vënë në dispozicion të Gjykatës Qendrore Hetimore të Gjykatës Kombëtare, e cila duhet të vendosë nëse do ta ekstradojë në Belgjikë.
Rrjeti kishte një strukturë hierarkike të mirëpërcaktuar, me të arratisurin në krye që koordinonte të gjitha aktivitetet. Në nivelet më të ulëta kishte kopshtarë, punonjës pastrimi, grumbullues parash dhe menaxherë logjistikë.
Grupi kriminal përdorte dokumentacion fals për të marrë shtëpi me qira dhe për të lidhur kontratat e energjisë elektrike në banesat ku kultivonin kanabis në masë. Ata gjithashtu rekrutuan njerëz në një situatë të parregullt për të punuar në kulturat e drogës. Hetimi nga autoritetet belge kundër bandës Haredin Fejzulla kulmoi me çmontimin e 13 plantacioneve të kanabisit dhe arrestimin e tyre.
Megjithatë, pasi u dënua, ai arriti të arratisej dhe Belgjika kishte lëshuar tre urdhër-arreste evropiane kundër tij. Ai ishte në listën e Europolit për të arratisurit më të kërkuar në Evropë, e cila mbledh së bashku të arratisurit më të kërkuar nga drejtësia në kontinent./ Pamfleti
Lini një Përgjigje