FLASH
Shkruar nga Pamfleti
Dy persona kanë rënë në prangat e policisë pasi dyshohet se përgatisnin dhe shisnin lëndë narkotike të llojit ekstazi, të cilën e shpërndanin kryesisht në lokalet e natës në Tiranë.
Sipas hetimeve, të arrestuarit Elvis Lezo dhe Bujar Lezo ishin të përfshirë prej kohësh në aktivitetin e shpërndarjes së drogave sintetike. Lënda narkotike sigurohej në Itali dhe transportohej drejt Shqipërisë në rrugë tokësore. Në shtetin fqinj ata merrnin tableta dhe pluhur ekstazie, të cilat më pas i përpunonin në banesën e tyre në zonën e Ali Demit.
Sipas informacioneve, dyshohet se Elvis Lezo kishte lidhje me një grup tjetër në Itali dhe rezulton me precedent penal të mëparshëm.
Gjatë kontrollit në banesë, Policia konstatoi ambientin e përshtatur për përgatitjen e ekstazisë dhe sekuestroi 2200 tableta me lëndë të dyshuar narkotike MDMA, si edhe dy telefona celularë.
"Finalizohet si rezultat i hetimeve të kryera për disa javë, me metoda proaktive, operacioni policor i koduar “Blue Punisher”.
Kishin përshtatur një ambient në banesën e tyre, për përgatitjen e tabletave të lëndës narkotike ekstazi (MDMA), me qëllim shitjen, vihen në pranga 2 shtetas (të afërm).
Sekuestrohen 2200 tableta me lëndë të dyshuar narkotike ekstazi (MDMA).
Specialistët e Sektorit për Hetimin e Narkotikëve, si rezultat i hetimeve të kryera për disa javë, me metoda proaktive, në drejtimin e Prokurorisë, në kuadër të një procedimi penal në fushën e narkotikëve, kanë organizuar dhe kanë finalizuar operacionin policor të koduar “Blue Punisher”.
Si rezultat i këtij operacioni u arrestuan në flagrancë shtetasit: E. L., 42 vjeç dhe B. L., 59 vjeç, banues në Tiranë (të afërm).
Gjatë operacionit, shërbimet e Policisë kanë ndërhyrë në banesën e këtyre shtetasve, në rrugën “Ali Demi”, ku kanë konstatuar një ambient që ata e kishin përshtatur për përgatitjen e tabletave të lëndës narkotike ekstazi (MDMA), me qëllim shitjen në lokalet e natës.
Gjatë kontrollit në këtë ambient u gjetën dhe u sekuestruan në cilësinë e provës materiale, 2200 tableta me lëndë të dyshuar narkotike ekstazi (MDMA) dhe 2 celularë.
Materialet procedurale iu referuan Prokurorisë, për veprime të mëtejshme", njofton polica.
Lini një Përgjigje