FLASH
Shkruar nga Pamfleti
Në video dëgjohet Goxhara që akuzon Kostën se po i mban peng prej katër vitesh bashkëshorten dhe po “i ha lekët”.
Është bërë publike fotoja që Erion Goxhara ka regjistruar me celularin e tij, në momentin që ka plagosur me armë zjarri në zonën e Komunës së Parisit, 45-vjeçarin Lorenc Kosta, pasi dyshohet se ky i fundit kishte krijuar një lidhje jashtëmartesore me bashkëshorten e efektivit.
Në video dëgjohet Goxhara që akuzon Kostën se po i mban peng prej katër vitesh bashkëshorten dhe po “i ha lekët”.
“Kështu e pësojnë të gjithë ata që u hyjnë njerëzve në hak, që u hynë në familje.
Ti të më mbash mua peng nusen për katër vjet, t’i hash lekët?
Nuk e ha dot ti djersën e familjes time o k*rvë, nuk hyn dot ti në familjen time”, dëgjohet të thotë Goxhara.
Pasi i filmoi videon, Goxhara ia ka dërguar kunatit të tij.
Dy ditë më parë efektivi i Policisë së Rinasit, Erjon Goxhara, u shfaq i penduar në sallën e gjyqit për plagosjen Lorenc Kostës dhe këmbënguli se nuk kishte dashur ta vriste. Ai mohoi akuzën e “vrasjes me paramendim”, mbetur në tentativë duke kërkuar një masë të butë sigurie, por gjykata pranoi kërkesën e prokurorisë për ta lënë në masën e sigurisë “arrest në burg”.
Përveç kësaj akuze, Goxhara do të hetohet edhe për “armëmbajtje pa leje”, derisa hetimi të provojë shkencërisht që arma e përdorur në ngjarje ishte ajo që mbante për shkak të detyrës.
Para gjyqtarit Goxhara ka pretenduar se veprën e ka kryer në kushte të tronditjes së rëndë psikike, për shkak të situatës që kishte shkaktuar inxhinieri i ERE-së, Kosta, në familjen e tij.
Sipas efektivit të policisë kufitare, përveçse kishte mësuar raportin intim të së shoqes, ai kishte kontaktuar përmes e-mailit bashkëshorten e Kostës, duke e vënë në dijeni. Për këtë fakt, ai ka pretenduar të jetë kërcënuar verbalisht nga Lorenc Kosta, pak para se ta qëllonte pasditen e së hënës tek Komuna e Parisit.
Për ditën e ngjarjes, Goxhara, ka treguar se pasi kishte kryer ritet fetare në një xhami ka dërguar vajzën te tezja e saj në zonën e Komunës së Parisit. Në zonë ai ka ndeshur Lorenc Kostën, të cilin e ka njohur. Mes të dyve është zhvilluar një debat verbal, ku Goxhara, shprehet se i ka kërkuar llogari pse i ka shkatërruar familjen. Sipas tij, Kosta i ka folur me ton kërcënues, duke i thënë “unë ta jap me deklaratë noteriale, që s’kam bërë gjë” dhe duke e prekur në sup.
Pas këtij momenti Kosta është larguar edhe pse efektivi ka kërkuar të sqarohen. Goxhara ka treguar se pasi ka zhvendosur makinën pak metra, e ka parë sërish para një marketi Kostën, vend ku ka zbritur dhe qëlluar disa herë me armë në gjymtyrët e poshtme.
Lini një Përgjigje