FLASH
Shkruar nga Pamfleti
Operacioni zbuloi lidhjet e organizatës me kartele shqiptare të drogës dhe furnizues në Amerikën e Jugut.
Një operacion i gjerë i zhvilluar nga Karabinierët italianë dhe Drejtoria Antimafia e Romës ka çuar në goditjen e një organizate të fuqishme kriminale që vepronte në kryeqytetin italian dhe që, sipas hetimeve, kishte lidhje të ngushta me grupe shqiptare të trafikut të drogës.
Bastisjet u zhvilluan në orët e para të mëngjesit në zonat Magliana dhe Trullo, në jugperëndim të Romës, ku autoritetet ekzekutuan shtatë urdhër-arreste dhe sekuestruan pasuri me vlerë qindra mijëra euro, armë zjarri, municione dhe sasi të konsiderueshme lëndësh narkotike.
Sipas mediave italiane, në krye të organizatës qëndronin Sergio Gioacchini dhe Roberto Caputo, emra të njohur për autoritetet, të cilët kishin ngritur një rrjet të strukturuar kriminal me aktivitet në trafikun ndërkombëtar të drogës, zhvatje, dhunë dhe shfrytëzim prostitucioni.
Hetimi, i mbështetur në përgjime telefonike, survejime dhe deshifrimin e bisedave të koduara mes anëtarëve të grupit, zbuloi se organizata kishte krijuar kontakte direkte me furnizues të kokainës në Amerikën e Jugut, ndërsa bashkëpunonte edhe me kartele shqiptare që operojnë në Italinë Veriore. Po ashtu, grupi kishte lidhje me eksponentë të njohur të krimit të organizuar romak dhe me klane të mafias kalabreze.
Qindra kilogramë drogë në qarkullim
Sipas dosjes hetimore, organizata ishte në gjendje të menaxhonte sasi të mëdha droge. Në një episod të dokumentuar nga autoritetet, grupi kishte në dispozicion deri në 500 kilogramë hashash, ndërsa trafikonte edhe kokainë me pastërti të lartë, me vlerë qindra mijëra euro në tregun ilegal.
Një pjesë e lëndëve narkotike ruheshin në apartamente dhe ambiente të përdorura si magazina të fshehta, të shpërndara në zona të ndryshme të Romës.
Rrahje brutale për një borxh droge
Hetimet zbuluan edhe anën më të dhunshme të organizatës. Për të rikuperuar një borxh prej 20 mijë eurosh, të krijuar nga aktiviteti i trafikut të drogës dhe transaksione të tjera të paligjshme, drejtuesit e grupit urdhëruan rrahjen brutale të një bashkëpunëtori.
Dy persona u angazhuan për ekzekutimin e sulmit, ndërsa viktima përfundoi në gjendje të rëndë, me plagë të shumta në fytyrë dhe me një mushkëri të shpuar.
Prostitucion i detyruar dhe fitime për klanin
Një tjetër pistë e hetimit ka të bëjë me shfrytëzimin e prostitucionit. Sipas prokurorëve italianë, organizata kishte vënë nën kontroll një grua, të cilës i ishte siguruar një apartament dhe që më pas detyrohej të prostituohej për llogari të klanit.
Pothuajse të gjitha fitimet e saj transferoheshin në llogaritë e organizatës përmes kartave Postepay, ndërsa një nga anëtarët e grupit merrte një tarifë fikse prej 50 eurosh për çdo klient që hynte në apartament.
Armë lufte dhe plane për atentate
Një nga elementët më shqetësues të hetimit lidhet me arsenalin e armëve që kishte në dispozicion organizata. Përgjimet zbuluan se drejtuesit e grupit diskutonin sigurimin e armëve të luftës për të organizuar atentate ndaj rivalëve.
Në bisedat e koduara përmenden pushkë sulmi të tipit M4 me dylbi, armë automatike dhe armë të tjera që do të përdoreshin në pritë të planifikuara kundër figurave të rëndësishme të grupeve rivale kriminale.
Gjatë kontrolleve të kryera sot, karabinierët gjetën dhe sekuestruan një arsenal të vërtetë armësh. Në banesën e njërit prej të dyshuarve u zbuluan një automatik AK-47 (Kallashnikov), një mitraloz Skorpion, një pushkë gjahu e prerë, një pistoletë, një jelek antiplumb dhe rreth 650 gramë kokainë.
Ndërkohë, në banesën e një personi tjetër u sekuestruan 100 gramë kokainë, 170 gramë hashash dhe 35 gramë manitol, substancë që përdoret zakonisht për përzierjen e kokainës.
Sekuestrohen para, pasuri dhe aksione kompanish
Përveç armëve dhe drogës, autoritetet italiane sekuestruan 15 mijë euro cash, tre orë luksoze, automjete, një motoçikletë, aksione kompanish dhe karta financiare që dyshohet se përdoreshin për të fshehur dhe ricikluar fitimet e përfituara nga trafiku i drogës dhe shfrytëzimi i prostitucionit.
Në të njëjtën kohë, Gjykata e Romës urdhëroi sekuestrimin paraprak të pasurive të lidhura me familjen e njërit prej organizatorëve të grupit, në kuadër të hetimeve për pastrim parash dhe pasuri me burim kriminal.
Autoritetet italiane e konsiderojnë operacionin si një goditje të rëndësishme ndaj një prej rrjeteve më të strukturuara kriminale që vepronte në kryeqytet, ndërsa hetimet vijojnë për identifikimin e bashkëpunëtorëve të tjerë dhe zbardhjen e plotë të lidhjeve mes organizatës, grupeve shqiptare të trafikut të drogës dhe qarqeve të tjera të krimit të organizuar në Itali.
Lini një Përgjigje