FLASH
Shkruar nga Pamfleti
GJJKO ka caktua masa e sigurisë “arrest me burg” për ish-drejtorin e Policisë së Lezhës, Henerigert Mitri.
Gjykata e Posaçme ka lënë në burg Henerigert Mitrin, ish-drejtorin e Policisë Lezhë në hetim në kuadër të operacionit “Revanshi”.
Henerigert Mitri u dorëzua në polici pak ditë më parë.
Mitri së bashku me avokatin e tij, kanë kërkuar të njihen me dosjen dhe nuk kanë dhënë sqarime në gjykatë. Ata njoftuan se do të apelojnë vendimin në Apelin e GJKKO-së.
Henerigert Mitri, u shpall në kërkim pas zbërthimit të aplikacionit SKY ECC, ku sipas SPAK drejtonte aktivitetin kriminal të kultivimit të narkotikëve, në qarkun e Lezhës, ndërsa në bashkëpunim me biznesmenin Pëllumb Gjoka organizonte aktivitetin e paligjshëm të lojërave të fatit.
Prokuroria e Posaçme e akuzon ish-zyrtarin e lartë të policisë për kryerjen e veprave penale “kultivim i bimëve narkotike, kryer në bashkëpunim”, “grup i strukturuar kriminal” dhe “pjesëmarrje në grup të strukturuar kriminal”.
Si dekonspiroi operacionet e ‘Guardia di Finanza’?
Si drejtues i Policisë së Lezhës, Henerigert Mitri ishte i pari që merrte informacion nga Guardia di Finanza të kontrolleve nga ajri, me koordinata të përcaktuara saktë, urdhra të cilët firmoseshin pikërisht nga ai. Por para sa të bënte detyrën si funksionar i lartë i policisë së shtetit, ai komunikonte me vartësin e tij, shefin e Antidrogës, Klodian Shahini, të cilin e pyeste ku janë parcelat e mbjella me kanabis nga bashkëpunëtorët dhe nëse përkonin me koordinatat ku do të fluturonte GdF, njoftoheshin trafikantët, të cilët merrnin masat.
Në këtë skemë, Mitri dhe Shahini ishin së bashku, ndërsa bashkëpunëtor i tyre i ngushtë ishte Elson Reçi, i fisit të Reçëve të Rrëshenit apo edhe për parcela të tjerë në zonën e Mirditës. Por, me gjithë përpjekjet për të mos lejuar kontrollet anti-kanabis, Mitri dhe Shahini nuk ia dalin do të mbrojnë parcelat dhe njerëzit e tyre.
Mitri po ashtu mbylli sytë për një kazino të biznesmenit Pëllumb Gjoka, i arrestuar më parë në kuadër të dosjes “Metamorfoza”, të cilën e kishte në Lezhë dhe që e mbante jashtë rregullave të ligjit. Por, kur oficeri i krimit ekonomik, Gentian Ndoji, i futet në kazino, arreston menaxherin dhe sekuestron kompjuterët, për Henerigert Mitrin, që kishte dalë garant mbi ecurinë e biznesit, dalin probleme.
Gjatë operacionit ‘Revanshi’ falë hetimeve të SPAK dhe Policisë së Shtetit u firmosën 50 urdhër-arreste për bosë të krimit brenda dhe jashtë vendit ku u goditën 7 grupe kriminale dhe u zbardhën disa ngjarje të rënda të viteve të fundit.
Lini një Përgjigje