FLASH
Shkruar nga Pamfleti
Detaje të tjera janë zbardhur nga operacioni antidrogë i zhvilluar në rajonin e Umbrias, Itali, ku janë sekuestruar 68 kilogramë kokainë. Në pranga ranë 7 persona, ndërsa 3 të tjerë u shpallën në kërkim. Mes të ndaluarve janë pesë shqiptarë, të dyshuar për bashkëpunim me elementë vendas dhe struktura të tjera kriminale.
Sipas autoriteteve italiane, grupi përdorte pajisje elektronike të avancuara, përfshirë kriptofonë, për të shmangur përgjimet dhe për të monitoruar komunikimet, me synim mbrojtjen nga ndërhyrjet e forcave të rendit.
Operacioni, i koduar “Shqiponja e Bardhë”, nisi pas arrestimeve të para në maj 2022 në Umbria dhe u intensifikua gjatë vitit 2024. Hetimet zbuluan një bashkëpunim të ngushtë mes grupeve të trafikantëve shqiptarë, të cilët, sipas autoriteteve, ndihmonin njëri-tjetrin në rastet kur zinxhiri i furnizimit përballej me vështirësi.
Brenda tre viteve të fundit, Komanda Provinciale e Guardia di Finanza në Perugia ka zbuluar dhe goditur tre organizata kriminale që dyshohet se shpërndanin kokainë me pastërti të lartë në qytet dhe në zona të tjera të Italisë.
Në periudhën 2022–2023, pas arrestimeve fillestare nga Guardia di Finanza në Città di Castello, u hap një hetim i dytë i drejtuar nga prokurori i DDA-së së Perugias, Gennaro Iannarone. Sipas hetuesve, Fatjon Cardaku, i njohur si “Fabio”, dyshohet se drejtonte një rrjet të shtrirë në disa zona të Umbrias, përfshirë Perugia, Corciano dhe Passignano sul Trasimeno, me lidhje në Napoli, Arezzo dhe qytete të tjera veriore.
Hetimi dokumentoi edhe furnizime me kokainë nga Holanda, Belgjika, Spanja, Ekuadori, Brazili, Zvicra, Shqipëria dhe Peruja. Në dhjetor të vitit të kaluar u ekzekutuan katër masa paraburgimi, ndaj tre shqiptarëve dhe një italiani.
Për 13 persona të tjerë të përfshirë në hetim, të cilët nuk janë akuzuar për organizatë kriminale, është zhvilluar seancë paraprake dëgjimore, sipas kërkesave të reformës në fuqi. Vendimmarrja për ta mbetet në pritje, ndërsa prokuroria ka kërkuar masa sigurie.
Nga hetimet e Guardia di Finanza, e udhëhequr nga nënkoloneli Enrico Fiorenza, rezulton se përmes përgjimeve dhe vëzhgimeve janë dokumentuar shitje të konsiderueshme kokaine. Në bisedat e përgjuara është përmendur edhe emri i një tjetër personi të dyshuar si drejtues i organizatës së fundit të goditur, i konsideruar si bashkëpunëtor i Gianpaolo Coresi-t, pronar restoranti në Foligno.
Coresi u arrestua në janar 2025 me 65 kilogramë e 500 gramë kokainë. Sipas hetimeve, droga ruhej në emër të bashkëpunëtorëve të tij dhe, pas analizave, u vlerësua se mund të prodhonte rreth 283 mijë doza. Autoritetet theksojnë se nuk bëhej fjalë për një strukturë të vetme të centralizuar, por për bashkëpunime mes grupeve të ndryshme që operonin në zona të caktuara.
Në prill 2024, një tjetër shqiptar u arrestua pranë Torricella me drogë në automjet. Më pas, në banesën e tij në Salsomaggiore, u gjetën 40 kilogramë kokainë. Ai u dënua me gjashtë vite burg, më pak se 14 vitet e kërkuara nga prokuroria. Po ashtu, një tjetër shtetas shqiptar, i arrestuar në vitin 2022 me 17 kilogramë kokainë në Foligno, u dënua me tre vite burg dhe më pas u deportua. Sipas urdhrit të fundit të paraburgimit, ai dyshohet se ka vijuar aktivitetin kriminal nga Tirana drejt Umbrias.
Hetimet tregojnë se pjesëtarët e përfshirë në çështjen më të fundit furnizoheshin kryesisht nga Spanja dhe vepronin në zonën e Folignos, ku dyshohet se ruanin sasi të mëdha droge dhe riinvestonin një pjesë të të ardhurave të paligjshme. Sipas Prokurorisë së Perugias, e drejtuar nga Raffaele Cantone, gjatë tre viteve janë dokumentuar dhjetëra dërgesa, ndërsa në disa raste janë ndërhyrë për sekuestrime që kapin mbi 70 kilogramë kokainë.
Në përgjimet e publikuara nga mediat italiane, disa prej të dyshuarve flasin për sasi dhe mënyra shpërndarjeje, duke përmendur nevojën për të shitur të paktën një kilogram në muaj. Në një tjetër rast, pronari i restorantit në Foligno dëgjohet të flasë për dërgimin e disa kilogramëve në pika të ndryshme takimi.
"Duhet të shesim të paktën një kilogram në muaj, sepse nëse e kapin, do ta lirojnë”, do t’i thoshte një nga tregtarët bashkëpunëtorit të tij napolitan ndërsa prisnin të merrnin ato “200 copë” kokainë.
"Ne dërgojmë tetë kilogramë në një parking, pesë në një tjetër. A do ta shkatërronit jetën tuaj për një mijë euro në muaj?"
Lini një Përgjigje