FLASH
Shkruar nga Pamfleti
Detaje të reja kanë dalë në dritë lidhur me mënyrën sesi atentatorët organizuan dhe kryen vrasjen e Kreshnik Mujecit dhe bashkëshortes së tij në Lezhë. Mësohet se një makinë u preu rrugën, ndërsa dy persona me kallashnikovë dolën nga një automjet pa targa dhe hapën zjarr.
Sipas burimeve hetimore, çifti po udhëtonte me automjetin e tyre tip “Audi” në aksin Balldren–Torovicë, kur u përballën me pritën e organizuar. Pas bllokimit të rrugës, autorët kanë qëlluar me breshëri plumbash në drejtim të mjetit, duke i lënë të vdekur në vend.
Verifikimet paraprake tregojnë se ndaj automjetit janë qëlluar mbi 30 plumba, çka tregon intensitetin e sulmit. Sipas hetimeve paraprake, shënjestër e atentatit dyshohet të ketë qenë Kreshnik Mujeci, ndërsa bashkëshortja e tij mbeti viktimë e sulmit. Dyshohet se autorët kanë përdorur më shumë se një automjet dhe kanë monitoruar lëvizjet e viktimave gjatë gjithë ditës.
Mësohet se çifti kishte qenë më herët në një lokal dhe dyshohet se është ndjekur që nga momenti i daljes. Pas atentatit, autorët janë larguar pa lënë gjurmë.
Në kuadër të hetimeve, policia ka sekuestruar kamerat e sigurisë në zonë dhe po analizon pamjet filmike për të identifikuar autorët e dyshuar.
Ndërkohë, pista kryesore e hetimit mbetet ajo e hakmarrjes, për shkak të së kaluarës së 39-vjeçarit, i cili ishte akuzuar për përfshirje në vrasjen e Genc Mhillajt në vitin 2016.
Policia e Shtetit ka bërë të ditur se po punohet intensivisht për “zbardhjen e plotë të dinamikës së ngjarjes” dhe për sigurimin e provave që do të çojnë në identifikimin dhe kapjen e autorëve. Ngjarja bëhet edhe më e rëndë pasi çifti lë pas katër fëmijë të mitur.
Lini një Përgjigje