FLASH
Shkruar nga Pamfleti
Kaq e thjeshtë është dhe, atë që mazhoranca përpiqet ta paraqesë si "Veza e Kolombit", nuk ka shqiptar të mos e kuptojë se në fakt është "Veza e Shalsit" që lëshoi në Parlament më 28 tetor 2022.
Një ndër veprimet më të fundit të mazhorancës socialiste, që ka ngjallur diskutime të shumta, është krijimi i një Nënkomisioni të Përhershëm Parlamentar që do të ketë si qëllim "kontrollin" e Kontrollit të Lartë të Shtetit.
Në thelb, ky veprim interpretohet nga shumë analistë dhe vëzhgues politikë si një përpjekje për të shantazhuar dhe penguar KLSH-në në përmbushjen e funksionit të saj të rëndësishëm: mbikëqyrjen e veprimtarisë financiare të qeverisë dhe institucioneve shtetërore.
Mazhoranca socialiste e prezanton këtë nismë si një formë të përmirësimit të transparencës dhe llogaridhënies, duke pretenduar "Vezën e Kolombit"... Por, në realitet, kjo përpjekje duket të jetë një manovër për të kontrolluar KLSH-në, një institucion që historikisht ka treguar guxim dhe integritet në nxjerrjen në pah të parregullsive dhe abuzimeve me fondet publike.
Një incident që nënvizon këtë shqetësim ishte kërcënimi i mëparshëm i Kryetarit të Komisionit Parlamentar për Ekonominë e Financat, Eduart Shalsi. Në mënyrë të qartë, Shalsi e lidhi ngritjen e këtij nënkomisioni me kontrollin që KLSH kishte bërë në ministrinë që ai drejtonte.
Sjellja e Shalsit ishte një dëshmi e qartë se ngritja e nënkomisionit nuk synon të jetë një përpjekje e sinqertë për përmirësimin e qeverisjes, por një përpjekje për të frenuar veprimtarinë audituese të KLSH-së ndaj saj. Kaq e thjeshtë është dhe, atë që mazhoranca përpiqet ta paraqesë si "Veza e Kolombit", nuk ka shqiptar të mos e kuptojë se në fakt është "Veza e Shalsit" që lëshoi në Parlament më 28 tetor 2022.
Krijimi i një nënkomisioni të tillë, që do të ketë autoritetin për të kontrolluar KLSH-në, është një kërcënim direkt ndaj parimeve të transparencës dhe llogaridhënies në qeverisje. Nëse ky nënkomision përdoret si një mjet shantazhi, KLSH-ja do të jetë më pak e lirë për të kryer kontrollet e saj dhe për të raportuar mbi abuzimet dhe korrupsionin. Në vend që të përmirësojë qeverisjen, kjo lëvizje ka potencialin të përkeqësojë situatën duke krijuar një klimë frike dhe presioni mbi zyrtarët e KLSH-së.
Është thelbësore që shoqëria civile, mediat dhe qytetarët të jenë të vëmendshëm dhe kritikë ndaj këtyre veprimeve të mazhorancës socialiste. KLSH duhet të mbetet i pavarur dhe i lirë nga presionet politike. Vetëm në këtë mënyrë mund të sigurojmë që institucionet tona të jenë në shërbim të qytetarëve dhe jo të interesave të ngushta politike. Prandaj, "Veza e Shalsit" duhet të konsiderohet si një kërcënim ndaj integritetit institucional dhe një hap mbrapa në luftën për një qeverisje të drejtë dhe transparente./Pamfleti
Lini një Përgjigje