FLASH
Shkruar nga Sokol Pepushaj
Nga zbulimi imagjinar i Trump te serumi i çuditshëm i Ramës; pse politika shqiptare po infektohet me teoritë e konspiracionit
Presidenti aktual i SHBA-së, Donald Trump, ka “zbuluar” së fundmi një virus global të ri të quajtur “Soros 2”, pas një kohe të gjatë kur realiteti dukej se kishte fshirë logjikën nga mendja e njerëzve. Me një skenografi të çuditshme, veshur me mantel laboratori, kapelë golfi dhe flamurin amerikan mbi shpatulla, Trump u shfaq mbi një bunker sekret në Florida dhe paralajmëroi botën se Alesi, djali i George Sorosit, është “pandemia” më e tmerrshme që ka kërcënuar ndonjëherë familjen, pronën dhe lirinë.
Në Shqipëri, në mënyrë ironike, ministri i Shëndetësisë në këtë kohë ka përfunduar në burg. Virusi i korrupsionit, tashmë kronik në vend, nuk ka prekur vetëm Ilir Beqajn, por edhe shumë figura të tjera politike e publike, të cilët vazhdojnë të trajtohen në "urgjencën" e SPAK-ut.
Por historia shpesh ka treguar se shpëtimi vjen nga vendet më të papritura. Ilir Beqja, ish-ministri që akuzohet se u vodhi shqiptarëve ilaçet, duket se ka ngjallur një reagim emocional tek kryeministri Rama, i cili vetë është nën presionin e “virusit” të Trump-it. Në mënyrë satirike, thuhet se Beqja ka krijuar një vaksinë me një recetë të çuditshme, duke përdorur çaj mali nga shoku i tij i burgut Ilir Meta, ca fije flokësh të ministreshave Olta Xhaçka e Frida Krifca, si dhe mbetje nga duhani special i Engjëll Agaçit, me të cilin mirëpret investitorët strategjikë rusë, kinezë e italianë.
Në fakt, vaksina e supozuar “Rama 4” mbetet ende një enigmë, pasi as SPAK-u e as amerikanët nuk e kanë certifikuar atë. Ajo paraqet një dilemë satirike por dhe simbolike për Ramën: ose të nxjerrë "shpikësin" e vaksinës nga burgu, ose të rrezikojë të përfundojë vetë aty.
Në prag të zgjedhjeve të 11 majit, vaksina “Rama 4” ende shihet me skepticizëm nga diplomatët evropianë dhe amerikanë, ndërsa teoritë konspirative vazhdojnë të ndezin zjarrin në kazanin politik. Komuniteti i "FB"-së në "fshatin" tonë po proteston jo vetëm për lirimin nga burgu të kriminelëve të vjetër, por edhe për mungesën e prangave për ata që synojnë të bëhen deputetë.
Ndërkohë, në këtë teatër politik, virusi imagjinar “Soros 2” dhe vaksina misterioze “Rama 4” duken si dy anë të së njëjtës medalje: absurdi që shoqëron politikën shqiptare./Pamfleti
Lini një Përgjigje