FLASH
Shkruar nga Pamfleti
Shumë rusë, të cilët ikën nga lufta dhe sot jetojnë në Serbi, nuk e zgjodhën Putinin. Ai ka marrë vetëm 3 për qind të votave të tyre, ndërsa njëri nga kundërshtarët ka marrë 67 për qind...
Është i vogël numri i urimeve që ka marrë presidenti rus Vladimir Putin, pas atyre që ai i quan zgjedhjet në vendin e tij. Njëri prej tyre është ai në të cilin shkruhet emri i presidentit të Serbisë, Aleksandar Vuçiç, një njeri regjimi i të cilit është nën vëzhgim pikërisht për shkak të vjedhjes së zgjedhjeve të dhjetorit. Çdo ngjashmëri nuk është e rastësishme.
Përderisa liderët evropianë deklaruan qartë se zgjedhjet në Rusi nuk mund të quhen me atë emër, presidenti i Serbisë u mburr se e uroi Vladimir Putinin për fitoren e tij.
Dhe kështu ai iu bashkua edhe një herë grupit që përfshin presidentin kinez Xi Jinping, udhëheqësin e Koresë së Veriut Kim Jong Un, presidentin palestinez Mahmoud Abbas dhe liderët e Azerbajxhanit, Bjellorusisë, Kazakistanit, Kirgistanit, Taxhikistanit dhe Uzbekistanit... Sepse aty erdhën duartrokitjet për fitoren e Putin me 87 për qind të votave.
Nga ana tjetër, nga Europa ka pasur mesazhe se nuk ka arsye për të uruar, sepse këto zgjedhje nuk kanë qenë as të drejta e as të ndershme dhe se rezultati dihej paraprakisht.
Parlamenti Evropian së fundi i vlerësoi zgjedhjet në Serbi me fjalë të ngjashme dhe bëri thirrje për një hetim ndërkombëtar.
Edhe pse situata politike dhe fuqia e presionit të regjimit në Serbi nuk është ende afër asaj në Rusi, është e pamundur të mos shihen ngjashmëri. Këtë e ka thënë në një prononcim për Nova edhe kryetarja e Lëvizjes Evropiane në Serbi, Jelica Minić.
“Presidenti Vuçiç, me pak hezitim, e uroi Presidentin Putin për suksesin e tij në zgjedhjet jodemokratike në Rusi, një vend që po bën një luftë agresive dhe po likuidon sistematikisht opozitën. Kësaj i kanë paraprirë urimet nga lideri i radikalëve serbë, Sheshel dhe nga presidenti i Republikës Srpska, Dodik, të cilët në mesazhin e urimit shkruanin se “fitorja e presidentit Putin u përshëndet me gëzim në popullin serb”. Logjika e urimit në emër të popullit serb është e qartë: bota serbe e përgëzon botën ruse”, thotë Minic dhe shton se duke pasur parasysh se vetëm tetë për qind e popullsisë së botës jeton në sisteme politike demokratike, nuk duhet të jetë çudi që ka asnjë urime nga ajo pjesë e botës.
E pyetur nëse ka ngjashmëri mes regjimeve në Serbi dhe Rusi dhe se kjo mund të shihet në shembullin e zgjedhjeve, Minic thotë: “Ngjashmëritë janë padyshim, por në Serbi ka potencial për ndryshim, ndërsa në Rusi nuk shihet një potencial i tillë. Edhe pse, shumë rusë, të cilët ikën nga lufta dhe sot jetojnë në Serbi, nuk e zgjodhën Putinin. Ai ka marrë vetëm 3 për qind të votave të tyre, ndërsa njëri nga kundërshtarët ka marrë 67 për qind dhe dy të tjerët nga 1 për qind. Në shembullin e diasporës, Putini humbi zgjedhjet. Dhe ky është një mesazh”.
Si arriti Putini në këtë përqindje?
Para së gjithash, duke ndryshuar Kushtetutën në vitin 2020, e cila praktikisht i mundëson Putinit të qëndrojë në pushtet deri në vitin 2036. Nëse kjo ndodh, ai do të bëhej sundimtari më jetëgjatë i Rusisë, duke tejkaluar liderin komunist Jozef Stalin dhe perandoreshën Katerina e Madhe që mbajtën pushtetin për më shumë se 30 vjet.
Kundërshtarët e tij kanë paralajmëruar për dekada se Putini nuk i lë asgjë rastësisë. E njëjta gjë ishte edhe me këto zgjedhje. Dokumentet sekrete të Kremlinit, të siguruara nga mediat perëndimore, zbuluan se rreth një miliard euro janë shpenzuar për operacionin që bëri të mundur vjedhjen e zgjedhjeve. Segmentet kryesore, si në të gjitha vitet e mëparshme, ishin formimi i opinionit publik sipas dëshirës së tij, propaganda për luftën në Ukrainë dhe "shuarja" e opozitës.
Për vite me radhë, Putini ka burgosur dhe persekutuar liderët e opozitës, dhe shumë prej tyre tani kanë vdekur - në rrethana të pashpjegueshme. Njëri prej tyre është Alexei Navalny, i cili u gjet i vdekur në një koloni burgu në shkurt. Familja e tij dhe komuniteti ndërkombëtar fajësuan regjimin rus për vdekjen e tij
Ajo pak që mbeti nga opozita në Rusi u pengua të luftonte.
Kështu, Boris Nadezhdin dhe Ekaterina Duntsova - kundërshtarë të vërtetë të Putinit - u përjashtuan menjëherë nga gara zgjedhore. Në vend të tyre, në fletëvotim ishin Nikolay Karitonov, Leonid Slutsky dhe Vladislav Davankov - kundërshtarë të kontrolluar. /Përshtati “Pamfleti” nga “Nova”
Lini një Përgjigje