FLASH
Shkruar nga Pamfleti
Në rrjetet sociale po qarkullon gjerësisht një pretendim i pavërtetë që lidh futbollistin francez Kilian Mbape me një akuzë të supozuar për ngacmim seksual ndaj presidentit francez Emanuel Makron. Sipas postimeve dhe videove të shpërndara online, kjo akuzë pretendohet të ketë qenë arsyeja e largimit të Mbapr nga PSG-ja drejt Real Madridit.
Megjithatë, verifikimet e kryera tregojnë se ky informacion është i rremë dhe nuk mbështetet nga asnjë burim i besueshëm mediatik. Asnjë media ndërkombëtare e njohur nuk ka publikuar një lajm të tillë dhe nuk ekziston asnjë provë që të mbështesë pretendimet e shpërndara në internet.
Burimi i dezinformimit rezulton të jetë një faqe mashtruese që imiton median sportive “Eurosport”. Faqja përdor një adresë interneti shumë të ngjashme me atë zyrtare, si dhe kopjon elemente të identitetit vizual të medias, përfshirë logon dhe dizajnin, me synimin për ta bërë përmbajtjen të duket autentike.
Ekspertët e verifikimit të fakteve vlerësojnë se ky është një rast tipik dezinformimi, ku emra të njohur dhe figura publike përdoren për të tërhequr vëmendjen e publikut dhe për të gjeneruar klikime. Dyshimet shtohen edhe nga fakti se videoja që shoqëron pretendimet mund të jetë manipuluar dhe të përmbajë zë të krijuar me inteligjencë artificiale.
Rasti nxjerr në pah rrezikun e përhapjes së lajmeve të rreme në platformat online dhe rëndësinë e verifikimit të informacionit përpara se ai të konsiderohet i vërtetë ose të shpërndahet më tej.
Lini një Përgjigje