FLASH
Shkruar nga Pamfleti
Pekini ka reaguar ndaj deklaratave të presidentit të SHBA-së, Donald Trump, lidhur me “opsione shumë të forta” që ushtria amerikane po shqyrton ndaj Iranit, duke theksuar kundërshtimin e saj të vazhdueshëm ndaj ndërhyrjeve në punët e brendshme të vendeve të tjera.
Zëdhënësja e Ministrisë së Jashtme kineze, Mao Ning, gjatë një konference të rregullt për shtyp, deklaroi se Kina mbetet e palëkundur në parimin e mosndërhyrjes dhe u bëri thirrje të gjitha palëve të veprojnë me përmbajtje.
“Kina shpreson që qeveria dhe populli iranian të mund të kapërcejnë vështirësitë aktuale dhe të ruajnë stabilitetin e vendit,” tha Mao Ning, duke nënvizuar rëndësinë e paqes dhe stabilitetit rajonal.
Ajo gjithashtu u bëri thirrje të gjitha palëve të përfshira të shtojnë përpjekjet për të ruajtur paqen dhe stabilitetin në Lindjen e Mesme, në një kohë kur tensionet në rajon mbeten të larta.
Deklarata e Pekinit vjen në një moment ndjeshëm ndërkombëtar, ndërsa vëmendja globale është përqendruar te zhvillimet në Iran dhe qëndrimet e fuqive të mëdha lidhur me to.
Presidenti Donald Trump po shqyrton seriozisht disa opsione për veprim ndaj Iranit, përfshirë edhe ndërhyrjen ushtarake, pas dhunës së regjimit iranian kundër protestuesve, raportoi CNN duke cituar zyrtarë amerikanë. Trump është informuar për plane që fokusohen në shënjestrimin e forcave të sigurisë iraniane të përdorura për shtypjen e protestave, por ende nuk ka marrë një vendim përfundimtar.
Presidenti amerikan tha se Irani ka kërkuar negociata dhe se shqetësimi i tij kryesor mbetet vrasja e civilëve.
“Udhëheqësit e Iranit duan të negociojnë. Mendoj se janë të lodhur duke u rrahur nga Shtetet e Bashkuara. Irani dëshiron të negociojë me ne”, deklaroi ai.
Megjithatë, brenda administratës amerikane ka frikë se sulmet ushtarake mund të kenë efekt të kundërt, duke bashkuar popullin iranian rreth regjimit dhe duke nxitur hakmarrje ushtarake.
“Duket se ka disa njerëz të vrarë që nuk duhet të vriten. Këta janë të dhunshëm, nëse i quani udhëheqës. Nuk e di nëse udhëheqësit e tyre janë thjesht ata që sundojnë përmes dhunës, por ne po e shqyrtojmë shumë seriozisht”, u tha Trump gazetarëve të dielën në Air Force One. “Ushtria po e shqyrton këtë dhe po shqyrtojmë disa mundësi shumë të forta. Do ta bëjmë me vendosmëri.”
Përveç opsioneve ushtarake, SHBA po shqyrton masa alternative si sulme kibernetike, sanksione të reja ekonomike dhe mbështetje teknologjike për protestuesit, përfshirë ofrimin e internetit përmes Starlink.
Lini një Përgjigje