FLASH
Shkruar nga Pamfleti
Rrugët e Shqipërisë dhe Maqedonisë së Veriut drejt integrimit në Bashkimin Europian janë ndarë.
Procesi i Shqipërisë në BE u shkëput nga ajo e Maqedonisë së Veriut, me kapitujt e parë të negociatave që do të hapen zyrtarisht më 15 tetor, sipas një vendimi unanim të ambasadorëve të vendeve anëtare të Bashkimit Evropian të mërkurën (25 shtator), tha një zëdhënës.
Rruga e dy vendeve të Ballkanit Perëndimor drejt anëtarësimit në BE u shoqërua me fillimin e negociatave të nisura zyrtarisht në verën e vitit 2022. Megjithatë, për shkak të mosmarrëveshjeve midis Shkupit dhe Bullgarisë, hapja aktuale e kapitujve është shtyrë pa fund, duke ndikuar drejtpërdrejt në progresin e Tiranës.
Vendimi është shoqëruar edhe me reagime nga pala bullgare. Ish-kryeministri bullgar, Bojko Borisov, njëkohësisht kreu i grupit më të madh parlamentar deklaroi se Maqedonia e Veriut po vuan pasojat e vendimeve të saj.
Borisov theksoi se shqetësimet e Bullgarisë u pritën mirë nga institucionet evropiane dhe vlerësoi përparimin e Shqipërisë.
“Nga ne kërkohet durim. Reaguan të gjitha institucionet. Ne nuk duhet të tregohemi agresivë, sepse taktika e kolegëve tanë nga Maqedonia e Veriut është që të na bëjnë fajtorë. Dua të siguroj popullin bullgar se gjithçka që bëmë në Partinë Popullore Evropiane, në Këshillin e Evropës, në Komisionin Evropian është dëgjuar shumë mirë. Kështu funksionojnë institucionet evropiane. Ata nuk kërcënojnë, nuk bëjnë fyerje, dhe rezultati është se Shqipëria do të ecë përpara, ajo e pranoi pakicën bullgare, dhe kolegët tanë nga Maqedonia e Veriut duhet të mbajnë pasojat e sjelljes së tyre. Komisioni i Çështjeve të mos sillet emocionalisht, por të sillet në mënyrë pragmatike dhe të arsyeshme. Ndonjëherë ata thonë se hakmarrja shërbehet më së miri e ftohtë. Ne si shtet duhet të ngrihemi dhe të mos ndjekim tonin e ndonjë ministri”, tha Borisov.
“Ai theksoi se Shqipëria ka pranuar pakicën bullgare në vendin e saj, ndërsa Maqedonia e Veriut do të duhet të përballet me pasojat e veprimeve të saj, veçanërisht në lidhje me marrëdhëniet me Bullgarinë”, shkruajnë mediat vendase.
Politikanët bullgarë kritikuan palën maqedonase për nxitjen e hapur të armiqësisë ndaj Bullgarisë. Sipas tyre, Bullgaria nuk duhet të lejojë një vend me një bindje të tillë të fillojë negociatat me BE nëse nuk respekton plotësisht kushtet e marrëveshjes franceze dhe nuk i njeh bullgarët në kushtetutën e saj.
Lini një Përgjigje