FLASH
Shkruar nga Pamfleti
Çmimet e naftës shënuan rënie të premten, teksa investitorët po shfaqin optimizëm për një zbutje të konfliktit mes SHBA-së, Izraelit dhe Iranit. Besimi në tregje u rrit pasi presidenti amerikan Donald Trump shpërndau një draft-marrëveshje paqeje mes palëve aleate.
Nafta Brent, që shërben si pikë referimi për tregun global, ra me 1.3%, duke u tregtuar me 91.54 dollarë për fuçi. Kjo e afron atë me një rënie prej rreth 17% krahasuar me nivelet e regjistruara në fillim të muajit maj.
Po ashtu, kontratat e ardhshme për naftën West Texas Intermediate (WTI), standardi i Amerikës së Veriut, pësuan një ulje prej 1.4%, duke zbritur në 87.64 dollarë për fuçi gjatë orëve të para të tregtimit të së premtes.
Sipas një raportimi të medias amerikane Axios, SHBA-ja dhe Irani kanë arritur një dakordësi paraprake për zgjatjen e armëpushimit me 60 ditë. Megjithatë, raporti thekson se presidenti Trump ende nuk ka miratuar kushtet përfundimtare të marrëveshjes. Ndërkohë, zëvendëspresidenti JD Vance deklaroi se një marrëveshje “nuk ishte arritur ende”, por se palët janë “shumë afër”.
Konflikti në Iran ka hyrë në ditën e 90-të dhe ka shkaktuar pasoja të konsiderueshme në ekonominë botërore. Situata u përshkallëzua pasi Irani reagoi duke mbyllur ngushticën e Hormuzit, një nga korridoret më të rëndësishme për transportin detar të naftës.
Mbyllja e kësaj rruge strategjike ka penguar një pjesë të konsiderueshme të eksporteve nga vendet e Gjirit Persik, një prej rajoneve më të mëdha prodhuese të naftës në botë.
Lini një Përgjigje