FLASH
Shkruar nga Pamfleti
Vrasje, trazira dhe zgjedhje në horizont: Bangladeshi në një moment kritik
Në Bangladesh kanë shpërthyer sërish protesta të dhunshme pas disa muajsh qetësie të dukshme. Dukej se faza më e vështirë kishte kaluar pas rrëzimit të qeverisë së Sheikh Hasina dhe ardhjes në pushtet të ekzekutivit të përkohshëm të drejtuar nga fituesi i Çmimit Nobel për Paqen, Muhammad Yunus, një figurë që u konsiderua gjerësisht si profili ideal për të udhëhequr një tranzicion gradual, por të vendosur drejt demokracisë.
Megjithatë, kryeqyteti Dhaka është përfshirë nga një valë e re trazirash, në një kontekst tashmë të brishtë, pas vrasjes së papritur të Sharif Osman Hadi, student aktivist dhe figurë e njohur e lëvizjes rinore pro-demokracisë që kishte luajtur rol kyç në përmbysjen e ish-kryeministres Hasina. Hadi, 32 vjeç, u qëllua me armë zjarri më 12 dhjetor nga agresorë të maskuar, teksa po dilte nga një xhami në zemër të kryeqytetit.
Ai u transportua me helikopter drejt një spitali në Singapore, por ndërroi jetë një javë më vonë si pasojë e plagëve të marra. Ngjarja ndodhi një ditë pasi autoritetet kishin njoftuar se zgjedhjet e para kombëtare pas rrëzimit të Hasinës do të mbaheshin në shkurt 2026, në rrethana që mbeten ende të paqarta.
Vdekja e Hadi-t ka ndezur sërish protestat në vend. Në Dhaka, disa ndërtesa u përfshinë nga flakët, përfshirë godinat ku ndodhen dy nga gazetat më të mëdha të vendit, Daily Star dhe Prothom Alo, me punonjës të bllokuar brenda. Protestuesit i kanë akuzuar këto media se janë të afërta me India, ku Sheikh Hasina ka gjetur strehim pas largimit nga pushteti.
Qindra persona rrethuan gjithashtu rezidencën e zëvendësambasadorit indian në Bangladesh, me synimin për të organizuar një protestë të ulur, por policia ndërhyri duke përdorur gaz lotsjellës për të shpërndarë turmën. Në zona të tjera, protestuesit bllokuan një autostradë kryesore që lidh kryeqytetin me pjesë të tjera të vendit dhe sulmuan rezidencën e një ish-ministri në Chattogram, në juglindje të Bangladeshit.
Qeveria e përkohshme e drejtuar nga Yunus ka konfirmuar vdekjen e Hadi-t, duke deklaruar se “humbja e tij është e pariparueshme për kombin” dhe se “rruga e vendit drejt demokracisë nuk mund të ndalet nga frika, terrori apo gjakderdhja”. Nga ana tjetër, Komisioneri i Lartë i Kombeve të Bashkuara për të Drejtat e Njeriut, Volker Türk, ka shprehur shqetësim të thellë për vrasjen, duke u bërë thirrje autoriteteve për qetësi dhe për një hetim të shpejtë, të pavarur, të plotë dhe transparent, si dhe për garantimin e drejtësisë dhe përgjegjësisë së autorëve.
Policia bengaleze ka nisur menjëherë një operacion të gjerë për kapjen e autorëve të dyshuar. Janë publikuar fotografitë e dy personave të kërkuar dhe është ofruar një shpërblim prej 5 milionë taka, rreth 42 mijë dollarë, për informacione që çojnë në arrestimin e tyre.
Ndërsa hetimet vijojnë, vendi mbetet në tension të lartë. Muhammad Yunus përfaqësonte për shumëkënd shpresën e një fillimi të ri, por kritikët argumentojnë se, pavarësisht premtimeve për reforma, qeveria e tij ka hasur vështirësi serioze për t’i zbatuar ato, për shkak të trazirave të vazhdueshme politike dhe sfidave të mëdha në ruajtjen e rendit publik.
Në këtë klimë të pasigurt, zgjedhjet e shkurtit marrin një rëndësi vendimtare. Partia Nacionaliste e Bangladeshit shihet si favorite për fitore dhe drejtohet nga Khaleda Zia, ish-kryeministre për tre mandate, e cila aktualisht ndodhet në terapi intensive në Dhaka për shkak të një infeksioni të dyshuar pulmonar. Ndërkohë, djali i saj dhe trashëgimtari politik, Tarique Rahman, pritet të kthehet në atdhe nga mërgimi në Britaninë e Madhe më 25 dhjetor, pas 17 vitesh mungesë. /Përshtatur nga “Inside Over”
Lini një Përgjigje