FLASH
Shkruar nga Pamfleti
Zëvendëssekretari i Përgjithshëm i NATO-s, Mircea Geoana, tha se nuk ka rrezik që Rumania, të futet në luftë pas incidenteve të fundit, kur u gjetën pjesë të një droni në territorin e saj, pranë kufirit me Ukrainën e përfshirë në luftë me Rusinë.
“Gjëja më e rëndësishme është që të rikonfirmojmë faktin që nuk ka asnjë tregues të një veprimi të qëllimshëm nga Rusia për të sulmuar territorin rumun, rrjedhimisht territorin e NATO-s”, tha Geoana për gazetarët gjatë një vizite që i bëri një shkolle afër kryeqytetit rumun, Bukuresht.
Komentet e zëvendësshefit të NATO-s vijnë disa ditë pasi autoritetet rumune konfirmuan se kanë gjetur pjesë të dronëve në territorin e tyre, pas sulmeve që forcat ruse kryen ndaj porteve të Ukrainës në lumin Danub, që gjenden përtej kufirit të Rumanisë.
Por, afërsi e sulmeve të Rusisë në pjesën tjetër të Danubit ka bërë që qytetarët rumunë që jetojnë aty pranë, të kenë frikë se shteti i tyre mund të përfshihet në luftë.
“Kur dëgjoni zhurmat e luftës disa qindra metra larg shtëpisë tuaj, vendit tuaj të punës, ato do të gjenerojnë emocion dhe ankth por, nuk ka asnjë rrezik që Rumania të përfshihet në këtë konflikt”, tha Geoana.
Pas zbulimit të dytë të fragmenteve të dronëve të shtunën, presidenti rumun, Klaus Iohannis, tha se ato ishin “të ngjashme me ato që përdoren nga ushtria ruse” dhe se incidenti lë të kuptohet se ka pasur “shkelje absolutisht të papranueshme të hapësirës ajrore sovrane të Rumanisë, aleates së NATO-s, me rreziqe reale të sigurisë për qytetarët rumunë në atë zonë”.
“Dua ta siguroj publikun rumun dhe veçanërisht ata që janë në kufi me Ukrainën se nuk kanë asnjë arsye për t’u shqetësuar”, tha Geoana, duke shtuar se ai do të vizitojë atë zonë.
Javën e kaluar, sekretari i Përgjithshëm i NATO-s, Jens Stoltenberg, tha se aleatët kanë parë “incidente të tjera në Poloni dhe gjetkë”, por nuk elaboroi më shumë.
Lini një Përgjigje