FLASH
Shkruar nga Pamfleti
Irani ka reaguar ashpër pas sulmit të Izraelit ndaj fushës së gazit Pars Jugor, duke e cilësuar atë një “gabim të rëndë”. Ai ka paralajmëruar se do të ketë pasoja të rënda nëse objektet energjetike iraniane shënjestrohen sërish.
Një zëdhënës i komandës së përbashkët të shtabit të përgjithshëm deklaroi se çdo sulm i ri do të pasohet nga reagime të zgjeruara ndaj infrastrukturës energjetike, jo vetëm të Izraelit, por edhe të aleatëve të tij.
“Sulmet nuk do të ndalen deri në shkatërrimin e plotë të objektivave, nëse infrastruktura jonë energjetike goditet përsëri", tha ai, duke shtuar se përgjigja e Iranit do të jetë “shumë më e ashpër” se ajo e mëparshme.
Në shenjë hakmarrjeje, Irani ka ndërmarrë sulme ndaj objekteve energjetike në rajon, duke goditur një strukturë kyçe në Katar dhe duke vënë në shënjestër Emiratet e Bashkuara Arabe, Kuvajtin dhe Arabinë Saudite.
Zhvillimet sinjalizojnë një përshkallëzim të tensioneve në Lindjen e Mesme, me rrezik të drejtpërdrejtë për infrastrukturën energjetike dhe stabilitetin rajonal.
Lini një Përgjigje