FLASH
Shkruar nga Pamfleti
Me tone kërcënuese ndaj Perëndimit, Dmitry Medvedev komentoi sipas stilit të tij të zakonshëm testimin nga Rusia të sistemit të ri raketor Sarmat.
Në një postim në versionin anglisht të llogarisë së tij në X, Medvedev uroi “miqtë” perëndimorë të Rusisë për testimin e suksesshëm, siç e quajti ai, të raketës balistike ndërkontinentale, duke shtuar se ky zhvillim i sjell ata “shumë më afër” vendit të tij.
“Urime të gjithë ‘miqve’ të Rusisë në Perëndim për testimin e suksesshëm të sistemit strategjik raketor ‘Sarmat’. Tani jemi të gjithë shumë më afër!” shkroi ai.
Testimin e suksesshëm të raketës e njoftoi dje vetë Vladimir Putin. Rusia kishte kryer edhe në vitet e mëparshme prova të ngjashme, të cilat kishin dështuar dhe kishin shkaktuar vonesa në zhvillimin e sistemit.
Sipas pamjeve të publikuara të martën nga Kremlini, Putin u informua për testimin përmes videokonference nga komandanti i Forcave Strategjike të Raketave të Rusisë, Sergei Karakayev. Ky i fundit deklaroi se lëshimi konfirmoi besueshmërinë e projektimit dhe karakteristikave teknologjike të sistemit.
“Lëshimi ishte i suksesshëm”, i tha Karakayev presidentit rus.
Congratulations to all Russia's western “friends” on the successful test of the Sarmat strategic missile system. Now we're all so much closer! pic.twitter.com/6xcBLIXQCO
— Dmitry Medvedev (@MedvedevRussiaE) May 13, 2026
Putin përsëriti se Sarmat është “sistemi raketor më i fuqishëm në botë”, duke pretenduar se ka një rreze veprimi mbi 35.000 kilometra. Gjithashtu, fuqia totale e kokës bërthamore që mund të mbajë Sarmat është katër herë më e madhe se ajo e sistemeve të ngjashme, ndërsa shpejtësia e tij mund të kalojë 10 Mach, duke përshkuar 12.000 kilometra në orë. Zëdhënësi i Kremlinit, Dmitry Peskov, deklaroi se Moska kishte njoftuar paraprakisht Shtetet e Bashkuara dhe vende të tjera për testimin.
Raketa Sarmat është projektuar për të zëvendësuar raketat e vjetra sovjetike Voevoda, të njohura në NATO me emrin “Satan”. Megjithatë, programi është shndërruar në një nga projektet më problematike strategjike të armatimit të Rusisë.
Kremlini kishte njoftuar fillimisht se raketa do të hynte në shërbim operacional në vitin 2020, por afatet u shtynë vazhdimisht për shkak të problemeve teknike. Pavarësisht vonesave, Putin dhe zyrtarë të tjerë rusë kanë deklaruar prej vitesh se sistemi ishte pranë gatishmërisë së plotë operacionale.
Rusia njoftoi për herë të parë një testim të suksesshëm të Sarmat menjëherë pas nisjes së pushtimit të plotë të Ukrainës në vitin 2022. Në atë kohë, Putin deklaroi se arma e re do të forconte parandalimin bërthamor të vendit dhe do t’i detyronte kundërshtarët e Rusisë “ta mendonin dy herë”.
Në fillim të vitit 2024, presidenti rus deklaroi se raketat e para Sarmat të prodhuara në seri ishin dorëzuar tashmë te forcat e armatosura ruse. Megjithatë, në tetor të vitit 2025 ai pranoi publikisht se sistemi ende nuk ishte futur në shërbim të rregullt operacional.
Disa testime të mëparshme kishin dështuar. Në shtator të vitit 2024, një raketë Sarmat shpërtheu brenda një silosi lëshimi gjatë provave në kozmodromin Plesetsk. Gjithashtu, sipas raportimeve, një tjetër testim në nëntor të vitit 2025 përfundoi po ashtu me dështim, pasi raketa qëndroi në ajër për rreth një minutë përpara se të rrëzohej.
Testimi i fundit u zhvillua vetëm disa ditë pas arrestimit të Aleksandër Gavrilov, drejtues i industrisë së mbrojtjes Krasmash, kompania që prodhon raketat Sarmat. Autoritetet ruse e akuzojnë atë për përvetësim fondesh.
Lini një Përgjigje