FLASH
Shkruar nga Pamfleti
Franca nuk planifikon të marrë pjesë në “Bordin e Paqes” të iniciuar nga presidenti amerikan Donald Trump, të paktën “në këtë fazë”, pavarësisht se ka marrë një ftesë zyrtare për t’u bashkuar. Lajmi është konfirmuar për agjencinë Associated Press nga një burim i afërt me presidentin Emmanuel Macron, i cili ka preferuar të mbetet anonim.
Ky refuzim i kujdesshëm vjen në një moment kur “Bordi i Paqes” po pozicionohet si një nga strukturat kyçe për menaxhimin e fazës së ardhshme të planit për Gazën. Sipas projektit të bërë publik nga administrata Trump, bordi do të mbikëqyrë komitetin ekzekutiv të Gazës, i cili do të merret me zbatimin e pikave thelbësore të planit – përfshirë disarmimin e Hamasit, vendosjen e një force ndërkombëtare sigurie dhe rindërtimin e territorit palestinez.
Sipas zyrtarit francez, krijimi i këtij bordi ka ngritur një sërë pikëpyetjesh serioze, sidomos për sa i përket respektimit të parimeve dhe strukturave të Kombeve të Bashkuara. Në Paris është shtuar shqetësimi se një strukturë paralele me OKB-në, e udhëhequr nga një administratë amerikane që tradicionalisht ka pasur qëndrime kritike ndaj multilateralizmit, mund të minojë institucionet ndërkombëtare ekzistuese dhe të shtojë përçarjen diplomatike.
Përveç Francës, ftesa për të marrë pjesë në këtë bord i është dërguar edhe Rusisë, Bjellorusisë dhe Tajlandës. Zgjedhja e këtyre vendeve ka ngjallur reagime të përziera në shumë kryeqytete perëndimore, ndërsa një zyrtar i lartë izraelit është shprehur prerazi për mediat lokale se iniciativa “është e dëmshme për Izraelin dhe duhet të anulohet”.
Kritikët e bordit paralajmërojnë se përbërja e tij, që përfshin aktorë me interesa kontradiktore dhe me histori të diskutueshme në rajonin e Lindjes së Mesme, mund të çojë më shumë në tension sesa në zgjidhje. Deri tani, përfshirja e vendeve me qëndrime të favorshme ndaj Hamasit apo me pozicione ambigue ndaj konfliktit ka thelluar ndasitë politike mbi legjitimitetin dhe qëllimet e kësaj strukture.
Ndërsa Shtëpia e Bardhë nuk ka komentuar ende mbi refuzimin e Francës, burime pranë administratës Trump kanë bërë të ditur se bordi do të vazhdojë të konstituohet dhe të marrë rolin e tij në procesin pas konfliktit, pavarësisht rezervave të disa aleatëve.
Ne vend te Makronit mund te cojme edhe Berishen .Mendoj qe te dy Rama e Bersha jane te domosdoshem ne kete bord dhe do ta zgjidhin planin e paqes ne Palestine.