FLASH
Shkruar nga Pamfleti
Ditë gjakderdhjeje në Lindjen e Mesme: mbi 100 të vrarë në Gaza, konflikti përhapet në Liban dhe Siri
Të paktën 104 palestinezë janë vrarë sot në sulmet izraelite mbi Rripin e Gazës, sipas burimeve spitalore të cituara nga Al Jazeera. Më shumë se një e treta e viktimave ishin në pritje për ndihma humanitare, një skenë që po përsëritet gjithnjë e më shpesh në një rajon ku civilët e pambrojtur janë kthyer në objektiv lufte. Më shumë se 30 persona u vranë në zonën e Rafah, pranë një qendre ndihmash, ndërsa ushtria izraelite pretendon se u qëllua ndaj “suspesh” që përbënin kërcënim, në një distancë prej një kilometri nga objektivi humanitar.
Këto episode e shtojnë bilancin tragjik të një dite që ka parë sulme intensive në të gjithë territorin e Gazës,– me IDF që njofton se ka goditur rreth 90 objektiva në 24 orët e fundit. Objektivat përfshijnë tunele, depo armësh dhe pozicione të supozuara të Hamasit. Megjithatë, shifra e lartë e viktimave civile hedh dyshime serioze mbi “precizionin” e pretenduar të këtyre operacioneve. Vatikani ka reaguar përmes kardinalit Pietro Parolin, i cili e ka quajtur të ligjshëm dyshimin se goditja e një kishe të krishterë në Gaza mund të mos ketë qenë aksident.
Nga ana tjetër, Gaza Humanitarian Foundation deklaroi se kishte paralajmëruar qytetarët të mos i afroheshin qendrave të ndihmës gjatë natës dhe në orët e para të mëngjesit, një përpjekje për të shmangur viktima që, sipas saj, nuk janë ndodhur pranë qendrave të vetë fondacionit. Por realiteti mbetet brutal: dhjetëra palestinezë të uritur janë vrarë duke pritur bukë dhe ujë.
Ndërkohë, tensioni po përhapet edhe përtej Gazës. Ushtria izraelite ka vrarë një militant të njësive elitare të Hezbollahut në jug të Libanit, në zonën e Khiamit, duke pretenduar se ai po përpiqej të rindërtonte pozicione terroriste në shkelje të marrëveshjeve ndërkombëtare. Për më tepër, në një akt të rrallë dhe shqetësues, dhjetëra druzë izraelitë kanë kaluar kufirin me Sirinë në Lartësitë e Golanit, duke hyrë në përplasje me ushtarët izraelitë dhe duke kaluar barrierën kufitare. Incidenti ka alarmuar autoritetet ushtarake, të cilat e konsiderojnë këtë akt si një rrezik për trupat dhe civilët.
Në Siri, situata mbetet dramatike në krahinën jugore të Sweidas. Sipas Observatorit Sirian për të Drejtat e Njeriut (SOHR), në një javë janë vrarë 940 persona, shumica dërrmuese prej tyre druzi, përfshirë 182 të ekzekutuar në mënyrë të përmbledhur nga forcat e regjimit. Edhe Izraeli ka vrarë 15 ushtarë të forcave siriane në ndërhyrjet e tij të fundit. Bashkimi Evropian ka përshëndetur armëpushimin e shpallur në Siri dhe ka bërë thirrje për një tranzicion të gjerë dhe gjithëpërfshirës që respekton të drejtat e të gjitha komuniteteve.
Nga Shtëpia e Bardhë, presidenti amerikan Donald Trump ka deklaruar se të tre objektet bërthamore të Iranit janë “shkatërruar ose eliminuar”, një deklaratë me ndikim të madh gjeopolitik që mund të ndezë më tej tensionet rajonale. Njëkohësisht, ai ka lajmëruar se së shpejti do të lirohen edhe 10 pengje të tjera në Gaza, një zhvillim i ndërlidhur me negociatat që po zhvillohen në Doha mes Hamasit dhe Izraelit, me ndërmjetësim amerikan për një armëpushim 60-ditor.
Këto zhvillime nxjerrin në pah një të vërtetë të frikshme: konflikti në Lindjen e Mesme nuk është më vetëm mes dy palëve, por një luftë e shumëfishtë që po përfshin Gaza, Libanin, Sirinë, Iranin dhe përtej. Dhe çmimin më të lartë, si gjithmonë, e paguajnë civilët. /Pamfleti
Lini një Përgjigje