FLASH
Shkruar nga Pamfleti
Eric Trump dhe Donald Trump Jr., djemtë e presidentit amerikan Donald Trump, po mbështesin një kompani të re dronësh që synon të plotësojë kërkesën e re nga Pentagoni dhe të mbushë boshllëkun e krijuar nga ndalimi i administratës për dronët e rinj kinezë në SHBA.
Kompania Powerus, me bazë në West Palm Beach, Florida, është një startup i formuar vitin e kaluar që merret me prodhimin dhe shkallëzimin e sistemeve autonome të dronëve për përdorim ushtarak dhe komercial në mjedise me rrezik të lartë. Ajo ka blerë tashmë tre kompani të vogla në gjashtë muajt e fundit dhe synon prodhimin mujor të mbi 10,000 dronëve, duke përfshirë dronë me kapacitet të lartë ngarkese deri në 675 kg.
Sipas njoftimeve zyrtare dhe raportimeve nga Wall Street Journal, Reuters dhe Bloomberg, Powerus po bashkohet përmes një reverse merger me Aureus Greenway Holdings Inc. (Nasdaq: AGH), një kompani e listuar publike që zotëron fusha golfi në Florida dhe që mbështetet nga vëllezërit Trump përmes fondit të tyre të investimeve American Ventures.
Ky bashkim do ta bëjë Powerus-in një kompani të listuar në bursën Nasdaq në muajt e ardhshëm, me aksionet që do të vazhdojnë të tregtohen fillimisht nën ticker-in AGH derisa transaksioni të përfundojë.Investitorë të tjerë të shquar në kompaninë e kombinuar përfshijnë Unusual Machines një prodhues komponentësh dronësh ku Donald Trump Jr. është aksionar dhe anëtar i bordit këshillues, si dhe bankën e investimeve Dominari Securities me lidhje me familjen Trump.
Ky zhvillim vjen në një moment kur administrata Trump ka vendosur një ndalim kombëtar për modelet e reja të dronëve kinezë që dominonin tregun civil dhe komercial për më shumë se një dekadë, duke krijuar mundësi të mëdha për prodhuesit amerikanë.
Pentagoni po rrit shpenzimet miliarda dollarë për dronë të vegjël, taktikë dhe autonomë, sidomos pas konflikteve aktuale dhe nevojës për prodhim vendor të shpejtë. Powerus planifikon gjithashtu të licencojë teknologji dronësh nga Ukraina për t'i prodhuar në SHBA, duke shfrytëzuar përvojën e provuar në fushën e betejës. CEO i Powerus, Andrew Fox, tha se ky bashkim do të sigurojë kapital publik për zgjerimin e prodhimit dhe blerje të mëtejshme. Ky është hapi më i fundit në zgjerimin e investimeve të familjes Trump në sektorin e dronëve dhe mbrojtjes, pas lidhjeve të mëparshme me kompani si Unusual Machines dhe një marrëveshje me prodhuesin izraelit XTEND.
Ndërsa aksionet e Aureus Greenway u rritën ndjeshëm pas lajmit, kritikat po rriten për konflikt të mundshëm interesi, duke pasur parasysh rolin e presidentit si komandant i forcave të armatosura dhe mbikëqyrës i Pentagonit.
Lini një Përgjigje