FLASH
Shkruar nga Pamfleti
Një zyrtar i lartë iranian deklaroi se Irani është i përgatitur për një luftë të gjatë me Shtetet e Bashkuara dhe sinjalizoi se vendi mund të vazhdojë sulmet ndaj vendeve të Gjirit për t’i shtyrë ato të ushtrojnë presion ndaj presidentit amerikan Donald Trump që të tërhiqet nga konflikti.
Deklarata u bë në një intervistë ekskluzive për CNN në Teheran nga Kamal Kharazi, këshilltar për politikën e jashtme në zyrën e Liderit Suprem të Iranit. Ai tha se aktualisht nuk sheh hapësirë për diplomaci dhe se lufta mund të përfundojë vetëm kur presioni ekonomik të detyrojë ndërhyrjen e vendeve të tjera.
“Nuk shoh më hapësirë për diplomaci. Donald Trump ka mashtruar të tjerët dhe nuk ka mbajtur premtimet e tij. Këtë e kemi përjetuar dy herë gjatë negociatave, ndërsa ne negocionim, ata na sulmuan”, tha Kharazi për CNN.
Sipas tij, vetëm një rritje e madhe e presionit ekonomik ndaj vendeve të tjera mund t’i shtyjë ato të ndërhyjnë për të garantuar ndalimin e sulmeve amerikane dhe izraelite ndaj Iranit. Kharazi sugjeroi se vendet arabe të Gjirit dhe aktorë të tjerë ndërkombëtarë duhet të ushtrojnë presion ndaj SHBA-së për t’i dhënë fund konfliktit.
Ai theksoi se lufta tashmë ka shkaktuar pasoja ekonomike globale, përfshirë rritje të inflacionit dhe mungesë energjie. Sipas tij, nëse konflikti vazhdon, presioni mbi ekonomitë e tjera do të rritet dhe ato mund të detyrohen të ndërhyjnë.
Që nga fillimi i luftës midis SHBA-së, Izraelit dhe Iranit, Teherani ka goditur disa vende në Lindjen e Mesme. Autoritetet iraniane thonë se synojnë interesat amerikane në vendet e Gjirit, por sulmet kanë goditur edhe zona civile dhe aeroporte.
Konflikti ka tronditur tregtinë globale të energjisë. Trafiku detar në ngushticën e Hormuzit është reduktuar ndjeshëm dhe çmimi i naftës ka kaluar mbi 100 dollarë për fuçi.
Sipas të dhënave historike të Rapidan Energy Group, rreth 20% e furnizimit global me naftë është ndërprerë për shkak të konfliktit, një nivel më i lartë se ai gjatë krizës së Suezit në vitet 1956–1957.
Ndërkohë, një zëdhënës i Gardës Revolucionare Islamike (IRGC) deklaroi se Irani po përdor rreth 60% të kapaciteteve të tij ushtarake për të goditur bazat amerikane dhe objektiva strategjike në rajon.
Gjatë fundjavës, Mojtaba Khamenei, djali i dytë i ish-liderit suprem Ali Khamenei, mori postin më të lartë në vend, një zhvillim që analistët e lidhin me mundësinë e përshkallëzimit të mëtejshëm të konfliktit.
Kharazi tha për CNN se udhëheqja politike dhe ushtria iraniane janë të bashkuara në këtë drejtim. Ai theksoi se detyra e liderit suprem është të drejtojë kapacitetin mbrojtës të Iranit dhe se kjo do të vazhdojë edhe nën udhëheqjen e re.
Presidenti amerikan Donald Trump deklaroi javën e kaluar se emërimi i Mojtaba Khameneit si pasardhës i të atit është “i papranueshëm”. Kharazi e hodhi poshtë këtë qëndrim duke thënë: “Kjo nuk është puna e tij.”
Lini një Përgjigje