FLASH
Shkruar nga Pamfleti
Dokumentet e deklasifikuara përfshijnë raporte të FBI-së, fotografi dhe video të reja, ndërsa CIA zbulon hetime të hershme mbi fenomenet ajrore të paidentifikuara…
Administrata Trump ka publikuar një grup të tretë dokumentesh të deklasifikuara që lidhen me Fenomenet Anomale të Paidentifikuara (UAP), duke shtuar dhjetëra dokumente, fotografi dhe video në arkivin qeveritar mbi vëzhgimet e pashpjeguara.
Materialet u publikuan të premten në faqen zyrtare të Departamentit të Luftës së SHBA-së dhe përfshijnë një sërë rastesh për të cilat hetuesit nuk kanë arritur të japin një shpjegim përfundimtar, duke lënë natyrën e fenomeneve ende të paqartë.
Ndër dokumentet e reja ndodhet edhe një raport i FBI-së i vitit 2025, i cili përshkruan një video të regjistruar nga një qytetar në verilindje të Shteteve të Bashkuara. Sipas dëshmisë së tij, një objekt i ndritshëm qëndronte pezull mbi oborrin e shtëpisë, duke u dukur si një “sferë e kuqe e ndritshme”.
Një video tjetër, e publikuar për herë të parë, tregon atë që zyrtarët e përshkruajnë si një “sferë të tipit plazmë”, e cila lëvizte mbi një liqen në një vendndodhje të panjohur në SHBA, duke ndryshuar formë dhe intensitet ndriçimi gjatë lëvizjes.
Publikimi përfshin gjithashtu dosje të CIA-s që kanë qenë për dekada të klasifikuara. Dokumentet tregojnë se agjencia kishte ngritur grupe ekspertësh dhe shkencëtarësh për të hetuar raportimet mbi të ashtuquajturat “pjata fluturuese”, nga frika se incidente të tilla mund të ndikonin në sistemet ushtarake të paralajmërimit ose të shkaktonin panik publik.
Sekretari i Luftës, Pete Hegseth, deklaroi se departamenti po bashkëpunon ngushtë me presidentin Donald Trump për të siguruar “transparencë të paprecedentë” lidhur me njohuritë e qeverisë mbi UAP-të.
“Këto dosje, të mbajtura për vite me radhë nën klasifikim sekret, kanë ushqyer spekulime të shumta. Ka ardhur koha që publiku amerikan të ketë qasje në to. Publikimi i këtyre dokumenteve të deklasifikuara dëshmon angazhimin e administratës për transparencë,” thuhet në deklaratën e tij.
Sipas autoriteteve amerikane, shumë nga fotografitë dhe videot e përfshira në dosje janë dorëzuar nga qytetarë dhe janë regjistruar me telefona iPhone.
Raporti i FBI-së përshkruan një incident të ndodhur në korrik 2025. Një dëshmitar, pasi kishte parkuar automjetin pas kthimit nga puna, vuri re një dritë që qëndronte pezull rreth 7,5 metra mbi tokë dhe afërsisht 27 metra larg tij.
Pas disa çastesh ai mori telefonin për të filmuar objektin, ndërsa edhe bashkëshortja e tij doli për të parë fenomenin.
Sipas raportit, ajo e përshkroi objektin si një “sferë të kuqe të ndritshme” me diametër rreth një metër. Në qendër të saj dukej një bërthamë e bardhë, e ngjashme me një “diell plazmatik”, me madhësinë e një topi basketbolli.
FBI vlerëson se objekti u ngrit ngadalë dhe u zhvendos majtas, ndërsa të dy dëshmitarët vunë re një sferë të dytë identike që qëndronte mbi të parën. Më pas, burri regjistroi ngjarjen me një iPhone 14 Pro Max, ndërsa objektet lëviznin drejt perëndimit mbi një zonë pyjore aty pranë.
Raporti thekson se sferat lëviznin në mënyrë të qetë dhe pa zhurmë, sikur të ishin në formacion ose të lidhura me njëra-tjetrën. Para se të zhdukeshin nga fusha e shikimit, dëshmitarët deklaruan se dy objektet dukej se u bashkuan në një të vetëm.
Incidenti ndodhi brenda një rrezeje prej rreth 40 kilometrash nga disa raste të tjera të pashpjeguara, të njohura në dokumente me emra si “Triangle Orbs”, “Red Orb Rotation” dhe “Orbs Over the Pond”, në një zonë me popullsi të rrallë në SHBA.
Lini një Përgjigje