FLASH
Shkruar nga Pamfleti
Flotilja Ndërkombëtare Humanitare “Global Sumud”, që kishte nisur një mision me rreth 200 tonë ndihma për Gazën me synimin për të thyer bllokadën detare izraelite, u ndalua mbrëmjen e 1 tetorit nga marina izraelite.
Sipas aktivistëve, njësi ushtarake izraelite hipën në disa prej anijeve, ndërsa Ministria e Jashtme e Izraelit deklaroi se flotilja ishte paralajmëruar të ndryshonte kursin pasi po afrohej “një zone aktive luftimesh”. Më pas, autoritetet izraelite publikuan një video ku tregonin ushtarë që shoqëronin në mënyrë të sigurt aktivistët, mes tyre edhe ambientalisten Greta Thunberg. Ministria konfirmoi se pasagjerët po transferoheshin drejt një porti izraelit.
Footage of Israeli navy vessels intercepting global sumud flotilla pic.twitter.com/0PfcTFnnrO
— Global Sumud Flotilla Commentary (@GlobalSumudF) October 1, 2025
Ndër aktivistët e ndaluar janë edhe figura politike si deputetja franceze Marie Messmer dhe eurodeputetja franko-palestineze Rima Hassan. Anija “Alma” dhe anija “Cyrus” u shënjestruan të parat nga forcat izraelite, ndërsa në bordin e “Cyrus” u arrestua edhe një gazetar i Al Jazeera.
Operacioni u konfirmua edhe nga Parisi, me ministrin e Jashtëm francez Jean-Noel Barrot që kërkoi garantimin e sigurisë së shtetasve francezë dhe kthimin e tyre sa më shpejt. Ai theksoi se qeveria franceze kishte paralajmëruar më herët shtetasit e saj të mos merrnin pjesë në mision.
Ndalimi i flotiljes “Global Sumud” shënon një tjetër episod të tensionuar në përplasjen mes aktivistëve ndërkombëtarë pro-palestinezë dhe autoriteteve izraelite, në një moment kur kriza humanitare në Gaza vazhdon të thellohet.
Communication between Alma Boat and Israeli Navy vessel pic.twitter.com/OVyJHnSVNG
— Global Sumud Flotilla Commentary (@GlobalSumudF) October 1, 2025
Lini një Përgjigje