FLASH
Shkruar nga Pamfleti
Valter Lavitola, sot pronar i një restoranti peshku në Romë që frekuentohet edhe nga gazetari, është nën hetim për masakër. Ai ishte dënuar më parë për zhvatje ndaj Silvio Berlusconit në vitin 2014…
“Jam i tronditur. Me Lavitolën jemi miq. Nuk mund ta besoj.” Kështu e komentoi Sigfrido Ranucci zhvillimin e papritur të hetimeve për atentatin ndaj tij. Sipas hetimeve, pista nuk të çon as te Camorra dhe as te grupet shqiptare.
Pista që konsiderohet më e besueshmja për identifikimin e porositësit është njëkohësisht edhe më e papritura. Ajo të çon te Valter Lavitola, i dënuar më parë për zhvatje ndaj Silvio Berlusconit (në vitin 2014), i cili sot është rikthyer në jetën publike si pronar i një restoranti peshku pranë Trasteveres. Sipas akuzës, ai i kishte ngarkuar kamarierit të tij rolin e ndërmjetësit me autorët materialë të atentatit dhe, pas sulmit, e kishte dërguar në Kamerun, raportojnë mediat italiane.
Në procedimin e nxjerrë nga Drejtoria e Prokurorisë Antimafia të Romës, në kuadër të hetimeve për atentatin ndaj Ranuccit dhe të zbatuar nga karabinierët e Njësisë Hetimore të Romës, përveç Valter Lavitolës janë nën hetim edhe Pellegrino D'Avino, Antonio Passariello, Saverio Mutone, Luca Amato, Marika De Filippis dhe Clesio Tavares Gomes (kamarieri). Prokuroria u atribuon atyre, sipas roleve përkatëse, veprat penale të bashkëpunimit në tentativën për masakër, posedimit, mbajtjes dhe përdorimit të paligjshëm të lëndëve shpërthyese, dëmtimit të rëndë dhe kërcënimit të rëndë, të gjitha me rënduesen e metodës mafioze.
Sipas hipotezës së akuzës, Lavitola ka pasur rolin e porositësit të atentatit, ndërsa Gomes ka shërbyer si ndërmjetës mes porositësit të dyshuar dhe autorëve materialë të sulmit.
Ish-drejtori i gazetës Avanti! është kontrolluar nga karabinierët e Njësisë Hetimore, të koordinuar fillimisht nga prokurori Carlo Villani dhe më pas nga kolegu Edoardo De Santis, i cili ka marrë në dorë vazhdimin e hetimeve. Sipas rindërtimit paraprak, ende të paplotë, edhe automjeti i tij ishte mes atyre që u panë gjatë vëzhgimit të kryer nga atentatorët pranë banesës së gazetarit. Bashkë me të është nën hetim edhe një person tjetër, i cili dyshohet se ka shërbyer si lidhje me ekzekutorët. Sipas hetimeve, ai ishte ngarkuar pikërisht nga Lavitola, i cili do të merret në pyetje nesër.
Motive personale apo profesionale?
Përpara prokurorëve, Lavitola do të duhet të sqarojë marrëdhëniet e tij me autorët e dyshuar të shpërthimit: Antonio Passariello, Saverio Mutone, Pellegrino D'Avino dhe Marika De Filippi, të arrestuar javën e kaluar.
Ranucci e njeh mirë Lavitolën dhe është shumë e mundshme që emisioni investigativ Report, i transmetuar nga Rai 3, të jetë marrë më parë me aktivitetet e tij. Jo vetëm kaq. Ranucci është në dijeni edhe të aktivitetit të Lavitolës si restaurator dhe herë pas here e viziton restorantin e tij. Në këtë pikë lind vetëm një pyetje: çfarë e shtyu atë të kontaktonte katër personat, duke i bindur të vendosnin eksploziv përpara shtëpisë së drejtuesit të emisionit? A ishte motivi personal apo profesional?
Këto janë përgjigje që ende mungojnë. Ndërkohë, hetimi i Prokurorisë së Romës, i drejtuar nga Francesco Lo Voi, ka rindërtuar rolet dhe veprimet e katër të arrestuarve. Sipas gjyqtares së hetimeve paraprake, Passariello kishte siguruar automjetin, ndërsa të tjerët kishin kryer një vëzhgim një javë para atentatit, duke vendosur “mjetin shpërthyes përpara banesës së Ranuccit”.
Katër të arrestuarve u është kontestuar gjithashtu rënduesja e metodës mafioze, një rrethanë që avokatët e tyre e kanë kundërshtuar që në fillim, duke pretenduar se “mafia këtu nuk ka lidhje”. Ata kanë ngritur edhe hipotezën se të arrestuarit nuk e njihnin fare drejtuesin e emisionit investigativ.
Sot, ish-gazetari dhe botuesi jeton nga aktiviteti i restorantit të tij. Megjithatë, nuk kanë kaluar shumë vite që kur ai shoqëronte kryeministrin e atëhershëm Silvio Berlusconi në misione zyrtare me krerë shtetesh dhe përfaqësues të diplomacisë ndërkombëtare.
“Pista e Camorrës është përjashtuar”
Tani çështja ka marrë një kthesë të re, ndërsa Ranucci rezulton viktimë e një paralajmërimi në stil mafioz.
Ditët e fundit, drejtuesi i Report ishte thirrur në Prokurori, ku magjistratët i kishin sugjeruar të “rikujtonte me kujdes” dhe të rishikonte temat e emisionit në dritën e zhvillimeve të reja hetimore që çuan në arrestimin e Passariellos. Ky reflektim mund të kishte ndihmuar për të kuptuar më mirë përgjegjësitë dhe motivin e sulmit me eksploziv. Megjithatë, askush nuk e kishte menduar se emri i Lavitolës do të dilte sërish nga e kaluara e vetë gazetarit.
Ndërkohë ishte përjashtuar pista që e lidhte atentatin me Camorrën, si për shkak të profilit kriminal të autorëve të dyshuar, të gjithë me precedentë për trafik droge, ashtu edhe për shkak të një emaili anonim, të konsideruar të besueshëm, që prokurori Villani kishte marrë në prill me titullin domethënës “Dhuratë Pashkësh”.
Në të thuhej: “Po ta tregoj se kush është ai budallai që bëri atë rrëmujë jashtë shtëpisë së Ranuccit. Po ta shes sepse ai ka punuar për klanin Moccia të Afragolës, pa i njoftuar shokët. Neve Ranucci nuk na ka bërë asgjë.”
Ky mesazh synonte të përjashtonte çdo lidhje mes bombës dhe klanit mafioz. Dhe duket se kjo hipotezë po gjen tani konfirmim, nëse do të provohet përfshirja e Valter Lavitolës.
Si u ngritën dyshime mbi Artur Shehun
Disa muaj më parë u ngritën dyshime se atentati ndaj gazetarit italian ishte kryer nga grupe shqiptare. ‘La Repubblica’, shkruante se emri mbi të cilin po hetohet është Artur Shehu, 58 vjeç, sipërmarrës me origjinë nga Shqipëria, i konsideruar nga disa hetime si një figurë me peshë e krimit të organizuar shqiptar. Aktualisht ai jeton në Shtetet e Bashkuara, në Florida, ku bën një jetë të rezervuar në Miami, ku është vendosur prej disa vitesh.
Sipas burimeve hetimore, edhe Drejtoria Antimafia Italiane (DIA) ka marrë informacion nga Vlora, në jug të Shqipërisë, për mundësinë e përfshirjes së Shehut në shpërthimin e ndodhur më 16 tetor, në banesën e drejtuesit të emisionit Report.
Bëhet fjalë, për momentin, për një hipotezë, që kërkon ende verifikime dhe prova përfundimtare, por që po ndiqet me kujdes nga magjistratët e Drejtorisë Rajonale Antimafia të Romës, prokurorja Ilaria Calò dhe zëvendësi i saj Carlo Villani, në bashkëpunim me karabinierët e Njësisë Hetimore të Frascatit dhe ata të Via In Selci, të angazhuar prej ditësh për të rindërtuar çdo detaj të atentatit.
Motivi i mundshëm mendohet të lidhet me një emision të Report të datës 21 prill 2024, me titullin “(Hot) Spot Albanese”, kushtuar projektit të qendrave për migrantë që Italia ka ndërtuar në Shqipëri, në Shëngjin dhe Gjadër, në kuadër të marrëveshjes mes qeverive të Romës dhe Tiranës.
Në programin e Raitre, 58-vjeçari shqiptar përshkruhet si një trafikant i rëndësishëm droge, i cituar më parë në hetime ndërkombëtare për lidhje të mundshme me Cosa Nostra dhe Sacra Corona Unita.
Emri i Shehut nuk ishte i panjohur as për shtypin ndërkombëtar. Në mars 2021, gazeta amerikane Miami Herald i kishte kushtuar atij një hetim të thelluar me titullin: “Nga një vilë në Miami Beach, një burrë me lidhje të dyshuara me mafien ndërton një perandori tregtare në Shqipëri.”
Artikulli përshkruan me detaje jetën e tij në SHBA, duke treguar për një vilë në Alton Road, “pak hapa larg gjirit të Biscayne”, e rrethuar me palma mbretërore, me një kopsht të rregullt dhe dy makina luksoze të parkuara në hyrje. /Pamfleti/
Lini një Përgjigje