FLASH
Shkruar nga Pamfleti
Apeli uli dënimin për papajtueshmërinë me funksionet publike, duke i lejuar kandidimin në vitin 2027, por liderja e Tubimit Kombëtar duhet të mbajë një byzylyk elektronik për një vit.
Liderja e së djathtës franceze, Marine Le Pen, mund të kandidojë në zgjedhjet presidenciale të Francës në pranverën e vitit 2027, pasi Gjykata e Apelit në Paris uli dënimin e saj për ndalimin e ushtrimit të funksioneve publike. Megjithatë, vendimi shoqërohet me një kusht që mund të ndikojë në të ardhmen e saj politike: ajo duhet të mbajë një byzylyk elektronik për një vit.
Gjykata konfirmoi fajësinë e Le Pen për përvetësim të fondeve të Parlamentit Evropian, por zbuti dënimin e dhënë në shkallën e parë. Ndalimi për të kandiduar në poste publike u reduktua në 45 muaj, nga të cilët 30 muaj u pezulluan, duke lënë në fuqi vetëm 15 muaj. Meqenëse kjo periudhë konsiderohet tashmë e vuajtur, nga pikëpamja ligjore ajo mund të marrë pjesë në garën presidenciale të vitit 2027.
Megjithatë, gjykata e dënoi gjithashtu me tre vjet burg, ku dy vjet janë me kusht, ndërsa një vit do të vuhet në arrest shtëpiak me mbikëqyrje përmes byzylykut elektronik. Vetë Le Pen ka deklaruar më parë se nuk dëshiron të zhvillojë një fushatë presidenciale nëse detyrohet të mbajë këtë pajisje, duke argumentuar se një kandidat për president duhet të ketë liri të plotë lëvizjeje.
Liderja e Tubimit Kombëtar (Rassemblement National) pritet të sqarojë qëndrimin e saj në një intervistë televizive mbrëmjen e së martës. Nëse vendos të tërhiqet nga gara, kandidati më i mundshëm i partisë mbetet Jordan Bardella, presidenti 30-vjeçar i RN.
Le Pen dhe dhjetë bashkëpandehur u shpallën fajtorë për përdorimin e paligjshëm të fondeve të Parlamentit Evropian, të destinuara për asistentët parlamentarë, të cilët sipas gjykatës punonin në fakt për partinë. Përveç dënimeve penale, të dënuarit do të kompensojnë rreth 2 milionë euro ndaj Parlamentit Evropian, do të paguajnë 150 mijë euro dëm moral dhe shpenzimet gjyqësore. Le Pen u gjobit gjithashtu me 100 mijë euro.
Lini një Përgjigje