FLASH
Shkruar nga Pamfleti
Shqipëria e paradokseve: Kosto jetese dhe korrupsion, por shqiptarët optimistë për të ardhmen...
Një sondazh i gjerë i zhvilluar në 11 vende të Ballkanit dhe më gjerë, me pjesëmarrjen e mbi 10 mijë qytetarëve, ofron një panoramë të detajuar të perceptimeve mbi ekonominë, politikën, sigurinë dhe ndikimet e jashtme.
Shqipëria del si një nga vendet më optimiste në rajon, por njëkohësisht përballet me të njëjtat shqetësime bazë që dominojnë në gjithë Ballkanin: koston e jetesës, korrupsionin dhe pasigurinë ekonomike.
Inflacioni dhe rritja e çmimeve renditen si problemi kryesor për qytetarët në të gjitha vendet e përfshira në sondazh. Pas tyre vjen korrupsioni, i cili në disa vende si Bosnja dhe Serbia konsiderohet sfida më e madhe. Edhe pse në Shqipëri nuk renditet domosdoshmërisht i pari, ai mbetet një ndër shqetësimet kryesore, i lidhur ngushtë me ekonominë, papunësinë dhe pabarazinë.
Ndryshe nga klima e përgjithshme pesimiste në rajon, shqiptarët rezultojnë ndër popullsitë më optimiste për të ardhmen e vendit. Së bashku me Kosovën dhe Malin e Zi, shumica e të anketuarve në Shqipëri shprehen se presin përmirësim të situatës në vitet e ardhshme. Ky perceptim bie në kontrast me vende si Greqia dhe Bullgaria, ku dominon ndjesia e pasigurisë dhe zhgënjimit.
Ky optimizëm shoqërohet edhe me një preferencë për stabilitet politik. Shqiptarët, ashtu si kosovarët, janë më të prirur të kërkojnë ruajtjen e balancave aktuale, ndërsa në vende të tjera të rajonit ka një kërkesë më të fortë për ndryshime të thella politike.
Në aspektin e funksionimit të demokracisë, Shqipëria renditet ndër vendet ku qytetarët kanë më shumë besim te zgjedhjet. Sipas sondazhit të “Lord Ashcroft Polls”, vendi ynë është një nga tre shtetet ku shumica e popullsisë beson se proceset zgjedhore janë të drejta dhe pasqyrojnë vullnetin e votuesve. Ky tregues e dallon nga vende si Serbia apo Bullgaria, ku mosbesimi ndaj zgjedhjeve është dukshëm më i lartë.
Megjithatë, një tjetër dimension i rëndësishëm i studimit lidhet me median dhe informacionin. Në të gjithë rajonin vihet re një rënie e besimit tek lajmet, me një pjesë të konsiderueshme të qytetarëve që shprehen skeptikë ndaj asaj që lexojnë apo shohin. Rrjetet sociale janë kthyer në burimin kryesor të informacionit për shumë njerëz, duke rritur shqetësimet për përhapjen e dezinformimit.
Shumica e qytetarëve në vendet e analizuara besojnë se aktorë të huaj përpiqen të ndikojnë në politikën e brendshme përmes propagandës dhe lajmeve të rreme. Edhe pse provat më konkrete lidhen shpesh me ndërhyrjen ruse, perceptimet e qytetarëve janë më të shpërndara. Në shumë vende, përfshirë pjesë të rajonit, Shtetet e Bashkuara perceptohen si një nga aktorët kryesorë që ndikojnë në politikën e brendshme, të ndjekura nga Bashkimi Europian dhe Rusia.
Në Shqipëri, megjithatë, orientimi gjeopolitik mbetet i qartë. Popullsia shfaq një mbështetje të fortë për Perëndimin, me nivele shumë të larta aprovimi për Bashkimin Europian dhe NATO-n. Shqipëria rezulton ndër vendet me mbështetjen më të lartë për aleancën ushtarake, me rreth 95% të qytetarëve që e konsiderojnë anëtarësimin pozitiv. Po ashtu, një shumicë e konsiderueshme e shikon Rusinë si kërcënim, ndryshe nga disa vende të tjera të rajonit ku perceptimet janë më të ndara.
Një tjetër tregues i rëndësishëm lidhet me sigurinë. Shqiptarët janë ndër më të bindurit se NATO do të ndërhynte në rast të një kërcënimi ushtarak, një nivel besimi që tejkalon shumë vende të tjera, përfshirë edhe disa anëtare të aleancës.
Sondazhi evidenton gjithashtu ndarje të thella brenda rajonit në lidhje me orientimin strategjik. Ndërsa shumica e vendeve priren drejt Bashkimit Europian dhe Shteteve të Bashkuara, në vende si Serbia, Turqia apo Bullgaria ka një prirje më të madhe drejt Rusisë ose një qëndrim neutral.
Në tërësi, të dhënat tregojnë një Ballkan të fragmentuar, ku vendet ndajnë shqetësime të përbashkëta ekonomike dhe sociale, por ndryshojnë ndjeshëm në perceptimet politike dhe orientimin ndërkombëtar. Shqipëria pozicionohet si një nga vendet më pro-perëndimore dhe më optimiste, por kjo nuk e përjashton nga sfidat që prekin rajonin, veçanërisht korrupsioni, pasiguria ekonomike dhe ndikimi në rritje i dezinformimit. /Pamfleti
Nuk jemi me mire se Bosnja e Maqedonia jo. Te fundit ne te gjitha testet jemi, por vendin e pare per lepirje bythes te NATO e USA e kemi siguruar. Patem shancin me te mire nga te gjitha vendet e tjera si ne ne Europe. E patem token e reliefin te virgjer e te benim cdo gje , qe te infrastruktura me rregull e mend por, shkaterruam e ndertuam kot pa mend e me humbje, shkaterruam shpresat e njerezve te vuajtur e u larguan te shkretet nga syte kembet. Nuk fillohet ekonomia e brekegrisurve me kazino e diskoteka por me mend ne koke. Kane bota kazino e vendi qejfi, por kane edhe mundesi e para te teperta per t'i qef.
Fatkeqesi qe ende ata qe kane mbetur ketu nuk e kane kuptuar qe ketu nuk mund te behet asnjere ky sondazh tregon qe ata qe kane mbetur ketu ende nuk e kane kuptuar ku jetojne ose nuk kane opsion ku te shkojne
Po ti ku jeton? Apo je nga ata që nuk ke opsion ku të shkosh?!