FLASH
Shkruar nga Pamfleti
Ministri i Brendshëm Taulant Balla ka njoftuar pezullimin nga detyra të dy efektivëve të policisë, të cilët hetuan rastin e 26-vjeçares në Vlorë që u drogua dhe u përdhunua nga disa persona ditë më parë.
Përveç pezullimit nga detyra, dy policëve Ervis Cipa dhe Ornela Hajrulla me detyrë Specialist për Hetimin e Krimeve ne Komisariatin e Policisë Vlorë, u është ndaluar dalja jashtë vendit.
AMP dhe Prokuroria e Juridiksionit të Përgjithshëm Vlorë kanë hetuar veprimet e policisë së shtetit lidhur me këtë rast dhe kanë arritur në vendimin e sotëm të Gjykatës së Vlorës.
Balla shkruan se arsyeja e këtij vendimi është vonesa në kryerjen e veprimeve të plota hetimore. Sipas tij, kjo është e pafalshme dhe akoma më e rëndë është bashkëpunimi me dhunuesit.
“Rasti i dhunës seksuale dhe i nxitjes së përdorimit të lëndëve narkotike ndaj një vajze në Vlorë ishte një ngjarje e rëndë, për të cilën drejtësia duhet të bëjë detyrën në nivelin e pritshmërive të mbarë opinionit publik. Siç jam angazhuar prej momentit të parë pasi u njoftova për këtë ngjarje, kam kërkuar verifikimin e veprimeve të Policisë së Vlorës për këtë ngjarje tronditëse. Për këtë qëllim Agjensia e Mbikqyrjes Policore dhe Prokuroria e Juridiksionit të Përgjithshëm Vlorë kanë hetuar veprimet e policisë së shtetit në këtë rast, duke çuar në vendimin e sotëm të Gjykatës Vlorë për pezullim nga detyra dhe ndalim dalje jashtë vendit të dy punonjësve të Drejtorisë së Policisë. Vonesa në kryerjen e veprimeve të plota hetimore që në momentin e parë është e pafalshme dhe më rëndë akoma bashkëpunim me dhunuesit. Prandaj e kam thënë dhe ta them çdo ditë se rritja e performancës së Policisë së Shtetit lidhet në mënyrë të pandashme me procesin e vetëpastrimit, për të çrrënjosur një herë e përgjithmonë nga trupa e shëndoshë e policisë së shtetit elementët e dëmshëm të inkriminuar apo shkelës së etikës, të cilët njollosin punën e palodhur të shumicës së Policisë së Shtetit që shërbejnë me vendosmëri të palëkundur shtetit të së drejtës dhe në mbrojtje të qytetarëve të këtij vendi”, njoftoi Balla.
Lini një Përgjigje