FLASH
Shkruar nga Pamfleti
Inspektorati Kombëtar i Mbrojtjes së Territorit (IKMT) ka gjobitur me 1 milionë lekë kompaninë “Gjikuria.”
Gjatë një inspektimi të kryer nga Drejtoria Qendrore e IKMT-së në zonën e Dhërmiut, u konstatua një vend depozitimi i mbetjeve inerte dhe dherave të nxjerra nga gërmimet, i vendosur në pjesën e sipërme të fshatit.
Nga verifikimet e kryera rezultoi se subjekti nuk dispononte Lejen e Mjedisit të tipit B, sipas kërkesave të përcaktuara në shtojcën 5.2. Për këtë arsye, IKMT vendosi masën administrative me gjobë në vlerën 1,000,000 lekë.
Sipas vlerësimeve të bëra në reagimet publike, kjo shumë konsiderohet nga disa si një gjobë simbolike për një kompani të madhe ndërtimi dhe jo në përpjesëtim me dëmin e pretenduar në një nga zonat më të rëndësishme turistike të vendit.
Rasti ka rikthyer diskutimet mbi mënyrën se si institucionet veprojnë ndaj kompanive të mëdha, duke nxitur perceptime se në raste të caktuara masat ndëshkuese mund të mos jenë në përputhje me peshën e shkeljeve të konstatuara.
Përveç gjobës, IKMT vendosi edhe masën plotësuese të pezullimit të aktivitetit deri në pajisjen e subjektit me lejen përkatëse, në përputhje me legjislacionin në fuqi. Gjithashtu, kompanisë “Gjikuria” iu ngarkua detyrimi për të eliminuar pasojat e shkaktuara dhe për të rehabilituar zonën ku janë depozituar mbetjet inerte, brenda një afati të arsyeshëm.
Lini një Përgjigje